【麻甩教仔學】本地薑父母同細路只講英文國語？嘥Ｘ氣啦！

好幾年前，我帶阿仔去睇醫生，突然間聽到一個打扮好中產嘅麻甩佬同個細路講疑似係英文嘅話。要將佢講嗰句疑似英文較全神咁描述，就只可以用通勝英文拼音法喇：
「車士他，襟奧花吐爹哋，奧畸？」
如果我冇估錯，小孩名字應該係 Chester，個老豆應該係想講「come over to daddy, OK?」

大家唔好誤會，我絕對唔係以番書仔身分去笑其他人啲英文。我從來都相信口音唔緊要，最緊要係清楚，有啲好重香港英文口音嘅人其實清楚過好多「鬼聲鬼氣」嘅人。我覺得奇怪嘅係，點解明明一聽就知係本地薑嘅麻甩佬有廣東話唔講，要同個仔講英文？

其實，呢個現象都幾常見，只係個語言有時可能有啲變動。有啲本地薑父母就同仔女講英文，有啲就講國語，但點都係一聽就知道佢哋根本就係母語講廣東話嘅香港人。有時同呢種父母傾，佢哋通常都會話係為咗佢哋啲仔女會講英文或者講國語講得好啲。想仔女乜都識講嗰啲父母就會搵一個同仔女講廣東話、一個同仔女講英文或國語，話咁樣係兩全其美。

但我真係覺得咁樣有啲嘥Ｘ氣。

先講淨係同細路講英文或國語嗰啲本地薑父母。自己講英文或國語都未講得掂（嗱，我唔係講口音呀，我係講整體清唔清楚、會唔會詞不達意咋）走去夾硬講又點會可以同細路好好溝通？

仲有，用唔多掂嘅英文或國語去同啲細路講英文、國語，教壞細路已經算係事小。更大鑊嘅係，如果啲細路喺出面或者喺電視、書本裏面學到較正確嘅英文、國語，你作為父母嘅仍然懶乜咁喺度同佢哋講英文、國語嘅話就只會俾啲細路鄙視。

所以，無論係親子溝通、細路學嘢或者係搞到啲細路自以為是，我都睇唔到本地薑父母走去同啲細路平時講英文、國語有乜好處喎。

咁嗰啲一個同細路講廣東話、一個同細路講英文、國語嘅本地薑父母又點？如果係好彩嘅，就會好快發覺咁樣係維持唔到落去嘅，因為影響一家人溝通，多數都會揀返用廣東話：喺咁嘅情況會最終揀淨係用英文、國語嗰啲通常都係嗰啲英文、國語係佢哋母語嘅父母喇。如果係唔好彩咁樣維持落去嘅，就會發覺啲細路乜話都講得唔流利囉！我咁多年嚟都見過唔少呢啲細路，真係好Ｘ悲。

講到呢度，實會有啲本地薑父母話，咁如果我唔同啲細路講英文、國語，咁點樣令佢哋啲英文、國語好啲呀？我唔係啲乜嘢教育專家，所以都唔敢亂咁班門弄斧。但係我都認識一啲英文、國語好勁但佢哋細個嗰陣啲父母冇同佢哋講英文、國語又冇捉佢哋去補習嘅人。佢哋通常都係靠睇書同埋睇或者聽英文、國語節目慢慢學㗎咋，唔使咁多唔鹹唔淡嘅大龍鳳囉。

返番去呢篇文開始嗰陣提到通勝式英文，其實講起通勝，就好容易諗起過年。本來我諗住過年就提早收爐、今日提早同大家拜年。但係 01 博評班友真係 chur 到爆，話要我下星期交稿，講下同細路過年嘅嘢，喺年初一、二推出喎。咁我下星期再同大家拜年啦！

（本文純屬作者個人意見，並不代表他所屬律師行或團體，亦不代表香港01立場。）