【來稿】新年最怕：教你湊仔音波功

文：許詠妍（90後在職媽咪）

在過去的初一、二、三、四，經過一連四日的假期又要初四的樣去上班，見完一班一年先見一次臉的親戚，就明年再會了！不過雖然話這四天是放假，但卻在這四天面對一大堆被訓話、說教，真的比上班還要累。

育有一子一女的我，兒子2歲，女兒則在上年的聖誕節剛剛出世，與老公帶著他們去親戚家拜年，那些親戚大都是育有幾個孩子的長輩，所以去到哪家都聽到不同類型的育兒經：「哎呀，你成日抱著bb點得，等佢喊囉，唔係第日你返咗工邊個抱呀！」；「阿b飲奶飲咁慢，你要催下佢呀嘛！」；「阿哥咁痴身點得架，畀佢返N班學下野啦！」；「畀個奶嘴堵住佢個嘴咪唔喊囉！」

基本上是你做什麼，他們都好像習慣了都是不對，都要話下你先心安，那些音波功真的疲勞轟炸，訓緊覺都識無限loop。

看他們好像很有育兒心得，個個都生3個以上咁，大部分仔女都大曬出黎做緊野，但我都有兩件，都已經不是新手媽咪啦，加上他們老一輩的育兒方法，我並不覺得在這個年代還能完美的套用上，真的無野搵野講。

尤記得我當初成為新手媽咪的時候，帶著我才2個月大的仔仔去拜年，因為是第一年帶孩子去，所以一班親戚都很熱情在第一天不停要抱著我個仔，但同時湧來的就是「你要點點點」。

每個bb總是很喜歡哭，因為還沒能說話，哭就是唯一他們能表達的方法，對於陌生環境更是哭到不停，我那幫親戚就提議我說：

「你買個奶嘴畀佢啦，話就話好難戒，但你等佢大啲，整污糟個奶嘴，佢見到污糟就唔會食架啦！」

當時在群情洶湧的情況下我即刻落街買奶嘴，好啦，全晚吃飯我個仔都好乖咁訓覺，大家都吃了一個安靜的晚餐。而我個仔呢，到現在2歲都未戒到奶嘴呀！我都試過整污糟個奶嘴，我個仔都毫不介意的吃著呢！我真係多得佢唔少呀，所以妹妹儘管現在哭得厲害，我都絕對不會買奶嘴給她！

面對這些音波功，我試過最好的辦法就是充耳不聞，因為不管你博嘴講咩都無用，他們都只會覺得你年少無知、「我食鹽多過你食米」，所以話呢，最好就是你有你講，我有我做，反正一年先見得個一次，你都是講得個一、兩日，仔女都是我，教又是我教。

一些只有幾個月大的嬰兒，離不開喝奶、睡覺、哭，而大人則抱住bb講下野唱下歌，嬰兒更會因為感興趣而開心笑著。年初三，我同老公帶住兩個細路去拜年，期間妹妹喊，咁避免吵到其他人，我當然二話不說咁抱下妹妹，再加搖下搖下，再哼下兩聲歌，好快妹妹就安靜下來。這個時候，一位最高輩份的姨媽就話：

「唉，要成日抱住唱歌，第日你返工之後負責湊嗰個就知味！」

佢都未講完，第二位姨媽已經接住話：

「放低佢啦，成日抱同埋搖！」

再者，第三位姨媽又話：

「唔好成日搖呀，之後一唔搖咪唔得！」

聽住大家車輪轉咁講野，個下唔投降都唔得，好啦，放低佢啦，阿妹即刻大喊，依個時候，三位姨媽再度來襲：

「都話唔好抱慣架啦，依家放低又喊啦！」

有位姨丈就話：

「畀個奶嘴佢啦！」

我個刻已經想爆：點啫，放低阿妹唔理又話，抱起又話，唔畀奶嘴都話。根本就做咩都話，那何不按照自己鍾意的湊法呢！

湊仔沒有一百分的方法，只有適合自己孩子的育兒方法！

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）