爸媽反思——邊學邊做先會進步│嶠媽

最後更新日期:

2018年啱啱過左,1月好靜,因為好想陪吓對仔女!反思2018下半年,日日都追追趕趕,唔知為咩,做完嘅野都唔記得,去嘅地方多到10隻手指都數唔哂!但琴日發生咗件事,又令我反思一下。

每次有人叫你去玩,你第一時間會諗,我仔/女應該會鐘意嘅,去玩嘛!邊個小朋友會唔想?去到玩,你又要佢做呢樣,做嗰樣,去比你影相,去比你拍片,其實佢真係有玩到咩?真係佢想玩咩?

【編按:撰文及攝影為嶠媽】

好似呢張相,我平時好想芊嶠坐定定比我影,佢會勁唔合作,因為覺得我迫佢!但朋友仔爸爸拎住相機話影佢,佢就自己擺哂 pose 比人影!諗深一層,其實平時佢真係唔想影,但做媽媽嘅就迫佢就範;佢想影時,就算你唔叫,佢都會行埋去叫你幫佢影!所以又一證明,爸媽嘅控制慾其實好強!

又好似呢個活動咁,我參加前都好怕佢去到話唔玩,又怕佢攰!但原來去到係咁多嘢玩,而且佢仲玩得好投入!如果當初我又照自己嘅諗法去諗佢,可能又會錯過咗比佢開心、投入去參加活動嘅機會!

而且我發覺,每次去活動,爸媽大多數都係企喺隔離影相,玩嘅可能得小朋友自己一個!但你從來都唔會諗,可能小朋友唔介意你有冇影低相做留念,可能更想你陪住佢地玩?又一爸媽需要反思嘅問題!

見到呢張相,你會有咩感覺呢?佢頭頂上嗰個飛碟,本身係放喺地下,佢地要跑去對面,執返來再交比姐姐!但芊嶠就當係帽咁戴,但在爸媽眼中呢?多數爸媽會話:「好污糟㗎!頭先放喺地下,你而家又擺上頭?」係咪呢?我都曾經咁樣諗!但諗深一層,其實佢都幾有創意,因為佢發現到原來個飛碟好似頂帽咁,所以佢先會有咁嘅舉動!

 

去到最後,我最想分享嘅係琴日發生嘅事,話說有朋友要搵6歲以上小朋友同家長一齊拍段 video,我話芊嶠得4歲想推,但朋友叫我試下,我不停同佢重復練,當然媽媽係好想幫到朋友啦!芊嶠一直都好投入咁同我一齊練!但夜晚一訓低,突然又好想問芊嶠一句:「其實你想唔想拍?」佢只擰頭作回應,佢唔敢開口,因為驚我會嬲!我再話:「你係咪唔想?你可以講!」佢答我:「唔想!因為真係好難!」我個下「叮」咗一聲,成個人醒哂!原來好多嘢都係我一廂情願想佢做,但佢未必想做!有好多活動係我以為佢好想參加所以帶佢去,原來佢未必想去!

今次呢件事令我反思咗好多,小朋友其實都應該有自己嘅權利,去表達自己想要嘅嘢,想去參加嘅活動!所以多聽聽小朋友嘅心聲,咁會幫助到你成為一個更成功嘅爸媽!當然,唔係話就哂佢地啦!都要教佢地分啱同錯!

芊嶠與細佬·雞蛋仔

芊嶠與細佬·雞蛋仔
我係80後媽媽,育有一仔一女,芊嶠和劻霖,生左芊嶠後,就成為了全職媽媽。我好享受這份工作,可以陪住小朋友成長,見證好多佢地嘅第一次。兩年後亦都誕下細佬,常常都會找一些親子好去處,想帶兩姊弟去玩之餘,亦想同大家分享湊小孩的喜與悲,希望在湊小朋友路上尋找知音人。

為情人節增添更多意義!請即入去「01心意」平台支持和諧之家,捐款$214,香港01送您兩 張「友人抱抱音樂會」門票,同您一齊重新定義214。門票數量有限,送完即止。(推廣日期 : 1月9日至1月21日):https://heart.hk01.com/zh/project/10083



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。