【溫多娜手記】譚仔三哥夥KOL肥蛙推利是封 任何消費加2蚊就換到
撰文：溫多娜
出版：更新：
譚仔三哥一直都好支持本地創作，1月初時響荔枝角D2 Place同埋饒宗頤文化館搞咗手作市集，兩個場地每一日都有過萬人流，吸引唔少文青到場買嘢，仲有影相放上網「呃Like」。
最近公司就同90後KOL及本土設計師肥蛙（Mandies）推出「三哥 x 肥蛙利是封」，希望同顧客共慶新春。由聽日開始，客人無論消費幾多都好，只要加2蚊，就可以換到一包6個嘅「三哥 X 肥蛙利是封」，數量有限，換完即止。
肥蛙在2012年開始繪畫青蛙公仔「肥蛙」，並推出一些自家製產品，如手機殼、貼紙等。（譚仔三哥提供圖片）
譚仔三哥發言人同溫多娜講，公司一直追求原創及獨創，多年來對推廣本地創意工業不違餘力。早前的手作市集都係想俾本地手作人盡展所長，協助佢哋渡過經濟寒冬。未來譚仔三哥亦會繼續與本地創作、手作人合作，希望推廣香港匠人精神。