【午夜場】做人老豆甚艱難 古天樂演繹何為《一個好爸爸》
撰文：陳運濬
出版：更新：
父親節過咗兩個月有多，偏偏暑期壓軸檔幾套大片都是老豆做主角，幾個父親為保護仔女，化身地上最強，包括印度神片《打死不離3父女》、吳鎮宇提名影帝作品《脫皮爸爸》、古天樂主演的《殺破狼．貪狼》，位位擔得抬得兼打得，這陣子影壇父親當家，今周午夜場，決定同大家介紹七位電影界最強爸爸，邊個話做老豆嘅，淨係識得騎膊馬。
古天樂手抱女兒一幕，非常溫馨，這樣柔情的古仔確是少見。（《一個好爸爸》劇照）
古仔在《殺破狼．貪狼》中為了尋回失蹤愛女，單人匹馬遠赴泰國硬撼黑幫，其實古仔都唔是第一次做威猛老豆，2008年上畫的《一個好爸爸》，就是做個偉大慈父，單睇片名就知道是個講父愛的故仔，其實劇情有啲老土，話說戲中本身係黑社會的古仔自從生咗囡囡，組織家庭後，決心脫離黑幫，改紋身、做教徒、兼轉做正行開補習社，但人在江湖身不由己，始終脫離不到黑社會身份，於是乎決定聯同警察捉拿毒販，兼詐死遠走高飛隱性埋名生活，正式離開黑社會之餘，又可保住妻兒安逸生活。戲中古仔演出，確是從影而來較少見，尤其一幕手抱女兒𠱁佢瞓覺，表現柔情十足，媲美佢唱住《男朋友》一樣，另外更有古仔唱兒歌、陪愛女去沙灘的溫情場面，一套戲睇足多面古天樂。
《一》片由張艾嘉執導編劇，又有影后劉若英做女主角，電影可以話為古仔度身訂造，戲中他亦由頭帶到尾後生演到老年，演出難度高，古仔亦演出水準，當年更憑電影，於第45屆台灣金馬獎首度提名影帝。《殺破狼．貪狼》內地上映後反應不俗，更有網民指古仔展現影帝級演技，睇嚟古天樂演父親角色特別旺，未知今次新戲又做最強老爸，他又能否一嚐影帝滋味呢？
古仔演黑幫的父親因為愛女被其紋身嚇怕，遂決定改圖案哄回女兒。
戲中演古仔媽媽的苗可秀戲份不多，但極為搶鏡，將惡死慈母角色演得說服力十足，更憑電影獲當年電影評論學會最佳女演員獎。
劉若英戲中飾演古仔老婆，影后扶持，加上大導張艾嘉執導，電影可謂為古仔度身訂造，銳意衝帝。