【午夜場】《恐怖熱線之大頭怪嬰》 冇樣你睇但有排你驚
撰文：許育民
出版：更新：
都市傳聞是每個鬼故最引人入勝的地方，一句說話傳下傳下都可以變質啦，更何況是一個故事？傳到你耳邊時，七除八拆加鹽加醋都唔知會變成點。
一個電台節目，一個聽眾來電，就將「大頭怪嬰」這個傳聞傳得興起，人人講到似層層，後來仲拍成電影，而電影最厲害之處，係你唔會見到大頭怪嬰個真身，而但你又會好驚。
電影圍繞出事的一眾同學們，逐個搵番睇睇間接俾大頭怪嬰害成點。
到底有冇大頭怪嬰呢件事？冇人知，但成件事就傳到真一樣，仲要追溯到60年代。事緣當年有位產婦在西區某醫院誕下一名怪嬰後過身，而這怪嬰的怪狀在於頭，一個比正常嬰兒大3倍的頭，而且頭部長滿縐紋同埋眼睛，而且不是發出喊聲，而是像野獸般的猛烈叫聲，相當恐怖。
俾你係醫生，你會點搞？梗係報警啦！結果警方來到就將怪嬰運走，並進行研究。你可能會問，發生咁大件事，點會唔知呀！呢個世界有個手續叫封鎖消息，唔係美國、北韓先會有，香港都有，香港政府就將呢單新聞封鎖，唔俾佢洩露出去引起公眾恐慌……傳聞係咁講，我都係咁聽。
同學們中有人慘死，有人瘋癲，更有人發生靈魂轉移，幾奇都有。
至於點樣被揭發呢？事源有位聽眾，致電到電台節目《恐怖熱線》將事件「爆出」，聽眾丁生先話自己初中年代，跟7、8名同學在校內踢足球，其中一人大腳一踢，將個波踢到去遠處草叢，在執波期間，竟發現一個頭顱像竹籮大的小朋友，被困在鐵籠內不斷發出怪叫。望完都夠驚，更驚係事後幾位同學們，多年來逐一遇上離奇遭遇，而電影就將呢段疑幻似真的故事拍出來。電影有鄭保瑞編劇及執導，又有吳鎮宇、何超儀、周麗淇主演，成功營造陰森氣氛，縱使睇完成套戲都搵唔到大頭怪嬰個真身望下，但觀眾全程都被那團氣氛牽住走，愈要驚愈要睇。