【成勛專訪】聖誕節病住孤單過 《焦急的羅曼史》後有搵宋枝恩？
2017年除夕，韓劇《焦急的羅曼史》嘅車本部長成勛就奉獻咗自己嘅第一次嚟到香港同大家倒數，迎接2018！不過當日成勛就唔係咁好彩，因為佢搭嚟香港嘅飛機竟然延誤，搞到本身已經感冒嘅成勛一落機就要準備接受傳媒訪問。幸好成勛接受《HK01》訪問時完全不見倦容，非常專業！
攝影：陳順禎 鳴謝：上水廣場
想不到成勛真人同《焦急的羅曼史》嘅佢都一樣咁好笑，當《HK01》記者問本部長2017的聖誕節點過時？成勛第一時間竟然係問返記者轉頭：「我做咗啲咩呢？啊！等等先，我要諗一諗…」過咗一陣成勛先話：「我聖誕節病咗，就咁喺屋企過咋！宜家都未病好晒，仲有少少感冒。」《HK01》記者再追問成勛如果有得休息會想去邊度放鬆時，賣口乖嘅成勛就話：「我想嚟香港玩啊！所以我今次完咗倒數嘅行程會留喺香港玩多2日先走。」仲話呢個係粉絲都知道嘅「秘密」！唔知有冇粉絲喺香港野生捕獲到成勛呢？畢竟今次係成勛出道7年以嚟第一次嚟香港，梗係要玩夠、食夠先返韓國繼續開工拍《心裡的聲音2》啦！
有留意開成勛Instagram嘅粉絲都會知道佢成日都會上載機場圖，《HK01》問到成勛對於機場fashion會點樣特別打扮時？成勛又搞笑回應：「我嘅服裝師會幫我打點！」不過成勛個人就鍾意舒適為主，好似運動服裝，只要着得舒服就可以喇！之後又再講到成勛宜家嘅髮型比起《焦急的羅曼史》短，原來本部長就鍾意宜家短髮多啲，佢唔鍾意染髮、電髮，總之一切都係要以舒適為主！
半年前成勛曾經出演過韓國綜藝《我獨自生活》，當時嘅預告片令粉絲好震驚咁話：「成勛喺屋企同出街嘅形象差太遠喇，好似大叔咁！不過都係成勛嘅反轉魅力嚟嘅！」《HK01》記者將呢翻話轉告畀成勛聽時，佢好率直咁承認：「其實唔係似大叔，而係我嘅年齡根本就係大叔，我宜家唔後生喇！」《HK01》記者就相信粉絲一定唔會咁諗，正所謂男人三十一枝花，更何況36歲嘅成勛仲因為《焦急的羅曼史》圈咗好多妹妹飯添！
成勛廣東話祝《HK01》讀者，2018新年快樂
下載《香港01》App，更多韓星靚相、影片率先睇！
iOS：http://bit.ly/hk01app-iOS-download
Android：http://bit.ly/hk01app-Android-download
我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/