《與神同行》勁多韓星打醬油 點止EXO?楚江大王同任達華kiss過

撰文:沈洛嘉
出版:更新:
《與神同行》香港大賣,已衝破3,000萬票房!(網上圖片)

韓國超賣座電影《與神同行》截至昨日(22號)喺香港已經突破3,000萬票房,河正宇、車太鉉、朱智勳、金香起同李政宰仲特登拍片多謝香港觀眾入場支持!朱智勳更因為《與神同行》翻生,被封為韓國型男,嚟緊仲有好多粉絲等睇佢嘅作品。

馬東錫嘅《與神同行2》雖然未有得睇住,但佢嘅《犯罪都市》就將於2月1日在香港上畫。(網上圖片)

不過今日唔同大家講主角,來介紹《與神同行》一眾「大卡士」配角!追開韓劇、韓國電影嘅韓迷喺睇《與神同行》時,一定會見到好多熟悉嘅面孔!嗱!真係唔止片尾先出場,將會拍《與神同行2》嘅馬東錫(又譯:馬東石)㗎!

有冇韓劇、韓片迷,認得《與神同行》嘅楚江大王先?(網上圖片)

睇親韓劇都見的楚江大王金海淑

在《與神同行》睇到車太鉉差啲過唔到怠惰地獄嘅「冥河」時,可能大家都會好緊張!不過記者就將焦點放咗係楚江大王身上,因為飾演楚江大王嘅演員金海淑,佢實在演出過太多韓劇喇!由《藍色生死戀》、《聽見你的聲音》、到近期的《悄悄話》佢演過半百套韓劇。而在2012年的電影《盜賊門》中,除咗有金秀賢激咀全智賢之外,楚江大王金海淑同「卡士蘭」任達華都係一對㗎!金海淑同任達華喺《盜賊門》內發生一夜情後,因為喺賭枱上搶錢而畀人追殺,任達華仲為咗保護金海淑而中槍,最後仲雙雙殉情,大家又覺得夠唔夠「sweet」先?

其實呢…卡士蘭同橡皮糖(金海淑《盜賊門》戲名)係同年1955年出生嘅…不過卡士蘭就真係keep得好好…(網上圖片)
+10
有份出演《盜賊門》嘅吳達庶,亦有喺《與神同行》入面做判官。(網上圖片)
金秀安飾演泰山大王嘅造型真係好可愛,今次終於唔使被喪屍同日本皇軍追殺喇!(網上圖片)

惡過喪屍泰山大王金秀安

而《與神同行》喺說謊地獄嘅「劍樹林」入面,相信大家都一定會認得泰山大王金秀安,因為呢個只有11歲嘅妹妹,就曾經飾演《屍殺列車》男主角孔劉個女,亦在《軍艦島》中做黃晸玟個女。金秀安在呢幾套戲入面都表現出成熟嘅演技,值得一讚!不過記者最滿意都係泰山大王最尾一句對白:「我因為你哋(判官)變老喇!你哋跟我出嚟!」雖然好似好老成,但成個畫面睇落又的確可愛兼帶畀人歡笑!

睇返《與神同行》劇照,先記得金荷娜個造型原來係咁樣。(網上圖片)
+37

《紳士的品格》reunion宋帝大王金荷娜

另外,《與神同行》仲有好多出名嘅韓星,好似金秀路做被救貓嘅主人,最後出場嘅地獄使者金旻鐘,喺《與神同行》入面都有出場打醬油!但數到最打醬油嘅就一定非金荷娜奠屬!呢一刻可能你都會問《與神同行》有金荷娜咩?就等記者提提你啦!金荷娜在《與神同行》扮演宋帝大王,係負責背叛地獄嘅「天地鏡」一關。不過成場戲真係快到唔記得佢做咗啲咩?車太鉉就過咗關!如果記得嘅戲迷絕對係超級韓片、韓劇迷!有齊金秀路、金旻鐘同金荷娜,其實《與神同行》嘅串星,係咪《紳士的品格》reunion來㗎?

平時好打得嘅金秀路,在《與神同行》反而要車太鉉幫佢爬出窗外捉貓!(網上圖片)
《紳士的品格》其實真係好好睇集集又有韓星客串,唔知《與神同行2》會唔會請埋張東健、李鐘赫來打醬油呢?(網上圖片)

《與神同行》片尾彩蛋馬東錫 續集拍好戲名都有埋?

下載《香港01》App,更多韓星靚相、影片率先睇!

iOS:http://bit.ly/hk01app-iOS-download

Android:http://bit.ly/hk01app-Android-download

我哋01韓迷嘅facebook專頁Kpop 01已經開咗喇!想知道更多韓國娛樂、飲食、玩樂、時尚資訊,快啲去畀like啦:https://www.facebook.com/hk01.kpop/