《吃貨神探》李敏豪專訪Regen讚佢跳舞叻　因ＯＯ同Apink娜恩熟？

韓國演員李敏豪今次嚟香港就為電影《吃貨神探之獵獸行動首部曲》做宣傳，當時其實發生咗啲小插曲，但就完全冇影響到李敏豪做訪問，完全顯露佢嘅專業！承接住李敏豪同《香港01》韓迷頻道嘅訪問，講到佢喺《吃貨神探之獵獸行動首部曲》嘅感受、當中更講到有關HotCha前成員Regen張惠雅以及韓國女團Apink成員娜恩添㗎！

攝影：龔嘉盛　場地提供：the sky cinema

話說李敏豪今次特登為咗《小吃貨神探之獵獸行動首部曲》片尾曲拍咗個MV，除咗要唱歌同rap之餘，仲要跳埋舞。韓劇迷同粉絲都應該知道，李敏豪本身唔係歌手出身，加上唔夠時間練習，因而覺得幾辛苦，仲明白到做Kpop歌手真係好勁，相比起來演戲仲易少少啊！

其實李敏豪除咗喺MV內要跳舞，原來喺《小吃貨神探之獵獸行動首部曲》戲入面都一樣要跳舞，仲要同HotCha前成員Regen張惠雅有合作，訪問期間李敏豪就話喺戲入面同Regen一齊跳舞嘅部份，都係Regen親自教佢，而喺電影開拍前就搵時間去studio學跳舞。Regen接受《香港01》訪問時就講到：「李敏豪喺跳舞個陣非常之快上手一教就識，反而係我自己嚇親！因為佢本身應該係唔識跳舞，但就好有跳舞嘅細胞。同埋我哋喺溝通上就冇咩問題，都係跟吓動作，因為佢都識識哋普通話，覺得佢好犀利！另外，都知道佢係童星，我都有即刻search睇吓自己有冇睇過佢拍嘅劇，原來我細細個真係有睇過佢有份拍嘅劇《屋塔房王世子》（又譯：閣樓王世子），就覺得好surprise可以見返睇過嘅劇入面嘅韓星！」

另外，李敏豪今年其實仲有一套電影《女哭聲》會上映，呢套戲係一套翻拍自1986年嘅同名電影，由Apink成員孫娜恩和接替高賢廷一角出演電視劇《Return》嘅朴真熙擔任主演。而李敏豪喺《女哭聲》入面就會同Apink孫娜恩有對手戲，講到今次拍電影終於同返韓國人合作，李敏豪就表示：「當然同返韓國人合作可以進行多啲對話，會更容易溝通，但反而令我覺得就算言語、民族唔同，其實大家都會有同感，都可以溝通。今次同香港、中國嘅演員合作，透過心、眼神同埋身體去溝通都係一件令我好感動嘅事！」

李敏豪接受訪問時表示剛剛先完成《女哭聲》嘅拍攝，而娜恩都係一邊拍攝，一邊準備Apink演唱會因而非常辛苦，所以當時都有去Apink演唱會支持娜恩，平時亦有保持聯絡同互相支持。希望睇完《小吃貨神探之獵獸行動首部曲》之後，都可以快啲睇到李敏豪同Apink娜恩喺《女哭聲》嘅演出啦！

李敏豪 吃貨神探 EATER & DETECTIVE MV 電影片尾曲

《吃貨神探之獵獸行動》李敏豪貼地愛香港檸茶　同河智苑似親姊弟

下載《香港01》App，更多韓星靚相、影片率先睇！

iOS：http://bit.ly/hk01app-iOS-download

Android：http://bit.ly/hk01app-Android-download

我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/