【有片】樂壇多年零肯定 E-Kids惱到爆粗:X!好似冇料到咁!

撰文:
最後更新日期:

「我從來冇走出來,要人記得我,我只係用5000蚊拍了《踩唔死我》MV,結果俾人話我出黎搲撈,什麼樂壇小強,會考又捉我哋出來講,唔係我要走出黎呀,係你哋搵我出黎笑咋!」

「入行最介意人哋一直唔講我哋音樂,X,好似冇料到咁,X,我哋明明幾有心機做,我介意你哋話我冇料到!」

透過一系列「助語詞」,或者才能表達E-Kids多年的感受。

攝影:梁碧玲 許栢倫

E-Kids由02年出道,短短幾年的活躍時期,已經令唔少樂迷回味至今,上年終於宣佈重組,令三子再次走在一起,年初開騷爆滿後,年尾又會再開騷,唱紅的作品如《開始戀愛》﹑《初哥》﹑《青春火花》或《下學期》等等多首Hit歌,原來,他們樂壇成績幾乎是「零」。Tommy坦言:「X!你下下拿我同陳冠希比,緊係冇得比,『X唔惦嘅你3個!』喂,每首歌自己寫自己排,你話我哋冇用心?好惱囉!」

當年E-Kids不乏支持者,因為大力宣傳的關係,他們的作品你總會聽過。「02年我哋好介意,果時賣碟賣得好架!粉絲多﹑賣碟多,連大陸都拿我哋啲碟做國語版,真係幾好,偏偏我地啲歌派台就唔播,MV又唔會上榜啦!隻隻都有派歌,搵埋佢哋DJ幫我哋填詞,都當我哋冇到,最惱係新人獎,唔畀我地候選,不過算啦,依家個台都冇乜人聽,DJ都變晒做粉絲喇!」

「我哋3個煙都唔食,點解感覺係MK? 硬係要咁...」
Alan@E-Kids

睇返資料,當年E-Kids在四大頒獎禮成績欠佳,幾乎只得過《新城勁爆頒獎禮》的新人獎。最令人谷氣的就是某一個自稱「專業」的電台,連新人候選的資格都沒有,其實新人係一個客觀事實,選唔選得中反而係其次,連新人都唔當,又係咩玩法?Tommy回憶道:「好多電台都上唔到榜,有個台連新人獎都冇角逐過!到今時今日都冇角逐過!當你冇到!我哋好惱,不過唔緊要啦,個台依家都冇人聽啦!佢地覺得我哋唔夠有型,簡單啲講『你哋X呀』!所以唔畀我地玩!」

「傳統媒體完全係冇成績,試過《魅力移動》拿半個獎囉,最叻就係《魅力移動》,我係台到都已經發脾氣,我忍唔到,大家知個制度,原來係傾的,兩隊要犧牲一隊,果面同電台又熟啲,咁囉!一落台就喊,啲老闆就話唔好意思,都冇下次喇!新人得一年架啫!果個年代有咩歌呢?《初哥》﹑《開始戀愛》﹑《下學期》﹑《魅力移動》,岩岩就係沙士,我地都開都千幾人既音樂會,但連機會都唔畀我!」Tommy又話:「播都唔播!我都唔明完全唔播。坦白講,你點Judge?又要同你friend,唔Friend就抹殺晒所有機會,只要你唔播,派完一次我就冇機會,好多歌手都面對呢個問題好多年,只要電台唔鍾意你唔播。但依家唔同,有咁多app同平台,形式已經轉左!」

+6
+5
+4

談起E-Kids在音樂上的「最大成就」,原來就係來自唔少歌手都唔願唱的兒歌類別,E-Kids當年憑《倉鼠俱樂部》奪得「最受爹哋媽咪歡迎兒歌大獎」。「即係兒歌界的金曲金獎,贏咗家燕姐﹑梁詠琪,當時以為導演講錯,點知爆大冷!《倉鼠俱樂部》,我地真係呆左,全部人企係後面聽你唱歌喎,最威係呢次!」他們又補充:「好記得完左頒獎禮去k房,連譚玉英姐姐都過黎同我地枚! 真係最威!」

會考每年都被鞭屍,幾精彩架!永遠有話題性,都幾好丫,冇人記得你就玩完啦,阿Q精神啲囉
Tommy@E-Kids

E-Kids在樂壇沒有得到肯定外,經營數年卻突然被逼解散,Alan回憶說:「當年最好的時候,唔識儲錢,真係冇諗過會解散,公司會執笠。當時買衫都唔少錢,我們有要求每次唔穿舊衫,所以出親騷都幾千幾千,唔識理財。解散後仲有少少本,就去開酒吧,做咗3﹑4年,日夜癲倒,飲酒飲到腫晒,EO2叫我放低自己少少,去教跳舞,結果認識了現在的老闆,都係Tommy比我慘,被人話呃錢。」Alan又謂:「我覺得佢好勁,如果我係咁,我會好惱,tommy話冇所謂,都係娛樂大家。如果唔係tommy有負面野,就唔會帶返E-Kids出黎,佢唔撐住,E-Kids會被遺忘!」

講到依家算苦盡甘來,捱過最低潮,Tommy回應:「捱過左? 我諗係掛…點都唔會衰過當時,當然自己都有做錯嘢!例如處理錢銀的問題,我自己真係做過生意失敗過,輸到冇晒辦法。消息有真有假,但果幾年將我呢啲位放大。」

舊事已成過去,今年初的重組演唱會,幾乎一致好評,當然要把握機會,將自己的音樂元素展示出來。Tommy指:「今年有4-5首新歌,7月會出街,甚至出國做mv」細問之下,除了創作一首edm的廣東跳舞歌外,更會推出久違了的《開始戀愛》續集,究竟當年的學生偶像,仲可唔可以成為90後﹑甚至00後的追捧對象呢?

「你咪笑囉,你畀我5分鐘上台表演,你就知我係點!」
Tommy@E-Kids

E-Kids的音樂從來不被人重視,都幾慘。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。