湯寶如開騷未能合體唱《美少女戰士》:Vivian話搵一個好timing

撰文:
最後更新日期:

入行已經25年的歌手湯寶如(湯記),近年應TVB邀請,與薛家燕(家燕姐)、黎小田及曹永廉合作主持節目《流行經典50年》,雖然有時會在節目獻聲,但似乎未能為她止「歌癮」。繼早前自資推出了新歌《獨愛》後,最近更宣佈將在11月15日於九展舉行《湯寶如獨愛音樂25週年演唱會香港站》。說到底觀眾隨了想回憶她的昔日經典外,更想知道當日會否可以在現場重溫湯記與王馨平仲有周慧敏的《美少女戰士》,但湯寶如回應:「學Vivian(周慧敏)話齋啦,『搵一個好嘅timing啦』!」

最近宣佈將在11月舉行演唱會的湯寶如,早前接受《香港01》電話訪問時表示,為了今次開騷而大感頭痛:「今次開演唱會邀請嘉賓上都唔會太頭痛,其實好多朋友都OK。身型問題方面,我最近有減食,不過依家都幾好,重量開始下跌,到時大家會見到我『排骨』咁樣出嚟嫁啦。相反我依家要練番好耐一啲啲擺低好耐嘅歌,所以我要好勤力去練歌。仲有跳舞方面都要練,雖然今次(演唱會)唔係話太多舞,但都想有啲嘢畀人睇到,雖然呢幾方面比較頭痛,但係我都好enjoy。」

湯記曾推出多首經典,包括:《相思風雨中》、《活著就是等待》、《絕對是個夢》、《緣份的天空》及《感冒》等,問到會否請歌神張學友到場與她合唱《相思風雨中》,她緊張謂:「學友緊係好想請啦,但係佢走緊tour真係未必可以應承我。不過如果講寶麗金年代嘅歌手,一定會有黎瑞恩,佢點都走甩。五年前嘅佢,為咗我重出江湖到依家,我覺得佢一個令我好深刻嘅人。至於你話其他嘅,大家就到時嚟睇下啦,如果講得太多就無神秘感,我想講今次請嚟嘅嘉賓反而唔會有咁多寶麗金年代嘅歌手,而且係大家估唔到嘅人。」

湯寶如對於與王馨平及周慧敏同場但未機會合唱《美少女戰士》,感到遺憾。(網絡圖片)

除了會否請到學友到場令大家關注外,會否與王馨平及周慧敏合唱《美少女戰士》,也是值得關注的地方,湯記也大感可惜:「『流行經典50年』曾經搵過我同Linda(王馨平)唱《美少女戰士》,當時欠缺周慧敏(Vivian)係一個遺憾,雖然之後我哋三個有再次合體但都無唱。我知道大家都好想睇我哋三個唱《美少女戰士》,但學Vivian話齋『搵一個好嘅timing啦』希望嚟緊喺其他地方可以睇到我哋合體唱《美少女戰士》,唔一定要喺我演唱會嘅。」

至於談到最近湯記在主持節目《流行經典50年》時,經常與另一主持人曹永廉搞笑鬥嘴,問到會唔會搵曾是歌手的阿廉一齊上台玩,湯記抵死回應:「曹永廉?!嘩!叫佢拍戲吧啦!哈哈哈!佢依家主力拍戲,又放低咗唱歌咁耐,唔知佢個心態係點。不過循例都會問一聲,得就得唔得就算啦!大家見到就見啦!」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。