【獨自音樂】敖嘉年做過最後悔的事 往外闖入樂壇:有機會我都唱

撰文:
最後更新日期:

「01音樂」全新節目《獨自音樂》,第一集的嘉賓是多棲藝人敖嘉年。雖然敖嘉年給人的感覺總會有一陣TVB味道。其實他已經完約電視台,雖然得到高層挽留,但他決定轉為部頭合約的合作方式。而且向電影,甚至音樂發展。談到音樂,其實嘉年一向都是唱得之人,曾唱出TVB劇《情逆三世緣》 的片尾曲《意想不到》。今次他在第一集的《獨自音樂》中唱出《意想不到》及翻唱《傾城》。

攝影:謝浩然

髮型:Sidney @HAiR

化妝:Touchup

服裝:Search Clothing

 

相信不少觀眾都是從電視劇中認識敖嘉年,甚至誤以為他是因TVB的藝員訓練班而入行。其實他成為演員前,曾做過不少大家未必會知道的工作,「其實由細到大我都做過好多唔同嘅工作,試過暑期工跟爸爸去燒味店『裝飯』,又去過髮型屋幫人洗頭好多唔同嘅工作。有好多人以為我讀藝人訓練班而入行。其實喺我入行之前呢,我去咗一間好大型嘅唱片公司,即係賣CD嘅公司打碟做DJ。之後有朋友話,香港電台考DJ,咁嗰時廿幾歲其實我覺得其實咩都應該試下嘅。咁就膽粗粗入咗去考。我好記得去考當日有過千人去面試。我坐巴士去嘅時候一落車,見到好多名貴房車。我當時諗娛樂圈真係個個都賺得好多,而我自己又無咩人脈,都唔知考唔考到。」

嘉年續說:「考完之後就諗住得唔得都唔緊要啦,後生仔嗰陣時得廿幾歲。點知有二次嘅面試,第二次面試呢就得番60幾人,我(當時)諗緊盡力做啦。慢慢又入去衝呀,跑呀,咁樣就入咗去香港電台做DJ。 之後喺電台認識洪朝豐呢位恩人。有日佢就問我,有無興趣入唔入TVB試下鏡。就係咁,我進入咗TVB呢個大家庭。」

敖嘉年曾入電台做DJ你又知唔知?(謝浩然攝)

拍劇多年的敖嘉年演過不少角色,談到最喜愛的角色,嘉年表示:「其實入行咁耐好多個角色我都好鍾意,但係最特別嘅角色一定係《魚躍在花見》嘅『魚仔』(角色名:魚至寶)。魚仔係一個好有挑戰性嘅角色。佢係一位智障小朋友。我為呢個角色做咗好多資料搜集,同佢哋生活咗一段時間學習佢哋嘅肢體語言,說話嘅方式。連導演佢哋都喺呢個角色造型上花了好多心思。結果拍攝出嚟嘅效果非常之好,當時連啲記者朋友都唔知嗰個係敖嘉年,所以我到今時今日都非常鍾意呢個角色。」

TVB劇《情逆三世緣》 的片尾曲《意想不到》是由敖嘉年原唱。(謝浩然攝)

談到嘉年現在是自由身,是不是與電視台不歡而散?嘉年表示雖然自己曾經歷低處,但大家依然是「母子」關係:「其實喺TVB嘅時候我成日都想放棄,但每當我去到最低點嘅時候又會有好嘅事發生。依家嘅我雖然無再簽TVB經理人合約,但我仍然會幫公司拍劇。因為我真係喺TVB長大,係TVB養大敖嘉年。所以我諗只要叫我幫手,我都會繼續一路做落去。只不過依家個形式係我多咗好多其他機會出去外面闖下。我依然會拍劇,公司一樣會好似以前咁照顧我。雖然坊間成日話唔係『親生仔』待遇會唔同,但對我係無分別。」

敖嘉年認為一名專業的演員,控制情緒是非常重要。(謝浩然攝)

入了電視圈差不多20年的敖嘉年,雖然學到很多,但也做過後悔的事。其中他曾對前輩不尊重成為了一樣他引以為戒的事情。「入行咁多年發生過一件幾令我後悔嘅事。當時我拍緊TVB一部古裝片,有一位前輩成日有咩事就鬧鬧鬧,突然間我忍唔住爆咗佢。爆唔係指講粗口,而係抝撬。我雖然只係頂咗佢一下,但係我擺咗喺心度好多年。其實我唔係一個咁嘅人,只係當時唔知點解控制唔到自己情緒。拍攝嘅時候演員嘅EQ真係好重要,無論有咩事都唔可以影響演員或者拍攝現場嘅氣氛。當時我就係咁爆一爆令到全場靜晒。依家我每次諗起都耿耿於懷。」嘉年說。

+6
+5
+4
《傾城》原唱:許美靜/作詞:黃偉文/作曲:陳佳明/編曲:吳慶隆

已是自由身的敖嘉年,除了將到內地拍攝電影外,他明言將進軍樂壇。而且還會跟今集《獨自音樂》的另一嘉賓葉肇中有音樂上的合作。今次唱出的《意想不到》正正就是由音樂監製葉肇中作曲。「我嚟緊會拍一套電影,除咗搞電影幕前同埋幕後嘅嘢之外,我仲會搞音樂上嘅發展。咁呢啲都係自己一路以來想做嘅嘢。我想喺我有氣有力嘅時間完成呢啲嘢。唱歌對於我嚟講,就算無論係點樣嘅形式都好,總之有機會畀我去唱,畀我去抒發呢種情懷嘅時候,我諗我唱到60、70歲仲唱得,我都會繼續唱。」嘉年說。

敖嘉年表示將會與監製葉肇中合作做音樂。(謝浩然攝)

音樂製作人葉肇中,他曾是TVB Music正視音樂有限公司一員,為電視劇集創作多首主題曲,到4年前離開TVB。現在主要以音樂創作為主。談到與敖嘉年合作,他表示因為歌曲《意想不到》而認識:「嘉年佢其實真係好鍾意音樂,佢唱歌嘅時候把聲線真係好真誠。佢係一個可以用聲線表達到歌曲故事出嚟嘅人。唔知係唔係同佢演戲有關,佢嘅聲線係好憂傷,好感性。所以我覺得佢係音樂上發揮好多可能性。」

不過阿中認為在香港做音樂空間愈來愈少:「喺香港做音樂主要係serve客,客要求改咩就改咩,好似做一台機器。所以要喺香港做音樂首先要懂得接受人哋意見。其實做音樂係需要空間同靈感,但係香港始終無呢個空間,同埋要做好多其他唔關事嘅嘢嚟換取工作機會。坦白講如果你想做自己喜歡嘅音樂係搵唔到食,反而你要懂得去為人而做,為人而創作,你先可以用音樂搵食。當然有啲人真係可以做自己嘢都搵到食,不過呢啲真係好彩而且係少數囉。」

+5
+4
+3


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。