【蒙面唱將猜猜猜2】香港舞王駕到 乜佢有飾演過齊天大聖？
大家想聽返見返好耐無見嘅歌手藝人，除咗睇TVB嘅《流行經典50年 唱爆周末》，內地綜藝節目都好鍾意用呢個方法，食住集體回憶呢點吸引觀眾。內地節目《蒙面唱將猜猜猜》都好似幾鍾情香港歌手，第一季已經先後找來許志安、陳曉東、側田演出，早前第二季更請出黎明以「煎蛋俠」身份又唱又跳。最新一集又有香港歌手蹤影，戴住「火猩哥」面具舞姿俐落，堪稱香港舞王﹗
每次節目都會俾少少貼士大家，節目組呢次話「火猩哥」曾經演過齊天大聖，令評審們估計會係張衛健或郭富城，不過新一季《蒙面2》設下多個陷阱，包括煽動評審致電俾范瑋琪，以及故意搵嚟聲線與林俊傑極為相似嘅素人參賽，所以評審都未敢太早下定論。1號晚播出嘅一集，「火猩哥」戴住美猴王面具又唱又跳，更表現拗腰唱到跪低，炒熱全場氣氛！
陶子更突擊考驗「火猩哥」的舞技，Alex 即場邀請巫啟賢上台伴舞，還示範了已故巨星 Michael Jackson 的 Moon Walk 舞蹈，技驚四座！睇完表演聽埋把聲，大家都應該估到「火猩哥」就係舞王杜德偉啦﹗巫啟賢大讚：「你的唱腔、舞姿、風采是掩蓋不住的，超級巨星的特色也是掩蓋不住的。」而陶子逗趣反問「火猩哥」可不可以安歌一曲《脫掉》，結果「火猩哥」在一片歡呼聲下揭開神秘面紗！脫掉面具的 Alex 有感而發，眼泛淚光表示：「我選猴子來代表自己，因為猴子很單純快樂，跟我很像，也代表了我做音樂的心。這個節目令我找回做『猴子』的快樂，還有很感謝大家，你們一猜就猜到是我，代表你們的心裡有我的聲音。」
事後接受訪問時，Alex 自爆在節目綵排時也需要戴上面具保持神秘，不過當他一開口唱歌，已被工作人員認出廬山真面目：「導演組希望我可以唔好咁快畀人估到，叫我改唱腔，咁我咪試吓扮劉德華把聲唱囉，但可能我扮得唔似啦，所以最後佢哋都係想我用返自己把聲唱，仲叫我跳舞，咁有乜可能唔俾人認到啊。」
對於第一集就被估中身份，Alex 笑言這是意料中事：「其實我唱頭幾句嘅時候，有望過猜評團有咩反應，我見到陶子同Ella對望，個口型我望到已經噏左『杜德偉』。巫啟賢就更加唔使講啦，我未入行前已經識佢，講真又點會估唔到，意料中事。本身諗住都捱到半首歌，點知一句就已經認到！」他又指在節目錄影的過程中險鬧出笑話，由於錄影現場十分嚴格，歌手所有隨行的親友及工作人員也要戴上面具，所以差點連老婆也認錯。
Alex去年榮陞爸爸後，一直忙於飛來飛去工作搵奶粉錢，佢已經唔係第一次參與內地綜藝節目，包括今年6月嘅《超強音浪》，仲有9月份嗰陣，佢著上價值4萬2千元的西裝造型潛水衣，擔任四川電視台《圍爐音樂會》嘉賓，進行衝浪拍攝，未落水已經完勝。