【專訪】湯寶如慨嘆樂壇後繼無人:只有陳奕迅容祖兒你話死唔死

撰文:
最後更新日期:

香港樂壇其實有不少媽媽級歌手,雖然已為人母並相夫教子,但並未有把歌手事業放下。但貴為「寶麗金四小花」的湯寶如(湯記),自2007年與男友陳德民誕下兒子後便少有在樂壇出現,湯記表示:「其實我咁多年都無停過,多咗出外登台。我用呢段時間修讀犯罪心理學課程,我又學整蛋糕,仲有畫畫。我當年中學畢業後,就邊讀師範邊教書,之後就已經成為歌手。我已經將自己二十幾歲最黃金嘅時間放喺歌唱事業上面。我其實想讀大學,想學得更多。我想多啲時間陪住仔仔成長。」

「寶麗金四小花」湯寶如在隱退香港樂壇後修讀犯罪心理學課程。(張浩維攝)

對於香港唱片業市道愈來愈差,湯記為唱片業成為時代巨輪下的犧牲品感到惋惜:「近年會出碟嘅歌手愈來愈少。佢哋多以單曲為先,當然唔計Eason(陳奕迅),周杰倫呢個級數歌手啦。我覺得依家香港會真金白銀買碟嘅人多數係我呢個年紀嘅人,點解《流行經典50年》會成為大家討論嘅話題,係因為睇呢個節目唔一定係上咗年紀嘅人,佢照顧到老中青嘅需要。可況80,90年代係香港唱片業最鼎盛嘅年代,當年卡拉OK大行其道,當時邊個歌手一出唱片啲人都爭住買。除咗歌手,連當時做唱片宣傳的工作人員年尾都會出18個月糧。」

湯記坦言香港樂壇暫時後繼無人,來來去去只有陳奕迅及容祖兒攞獎。(張浩維攝)

掀起懷念潮令她受惠

自《流行經典50年》播出後,不少人常把以前的歌比現在的好掛在嘴邊。談到現時樂壇景況,湯記坦言後繼無人,未有一位得到大家認同的巨星級歌手接棒:「香港樂壇長期處於真空期。樂壇來來去去只有陳奕迅及容祖兒,頒獎禮只有佢哋攞獎。你話死唔死?但以前真係唔同,就算只係一間唱片公司內都會有好大嘅競爭。」

香港近年隨着掀起一股「懷念潮」、「回憶潮」,湯記認為這股熱潮令她受惠:「以前雖然唱片賣得,但當年我哋呢啲中間位置嘅歌手想開演唱會真係諗都無得諗,排隊都未到我哋,只可以做佢哋(一線歌手)嘅嘉賓。反而依家老咗多咗好多機會。其實係好開心嘅,始終都會有一班人好支持舊歌。」

湯記將於今年11月15日於九展舉行《獨愛音樂25周年演唱會》。(張浩維攝)

今年入行25周年

今年對於湯記來說是一個值得紀念的年份,因為2017年是她入行25周年。有見及此她將於今年11月15日於九展舉行《獨愛音樂25周年演唱會》。湯寶如近年因主持電視台節目《流行經典50年》已頻頻曝光,其實舉行25周年演唱會,並非在她今年的計劃之內:「其實我自己好似都好多年無喺香港(樂壇)出現過,所以今年係想出EP。但年頭嘅時候TVB就搵咗我做4集《流行經典50強》,點知做完4集反應好好,一直加集數到依家都仲做緊。當其時我都唔醒起自己已經25周年,到後來公司提醒我,覺得我25周年如果唔開騷會嘥咗,所以先開始搵場地。不過搵場地嘅時候我一路都係排waiting list,當時心態順其自然,如果25周年做唔到咪等2018年。結果呢件事到5月才落實。」

湯寶如參加第九屆新秀歌唱大賽而簽約寶麗金唱片。問到她會否請來昔日寶麗金天王天后當演唱會嘉賓,她表示:「細V(黎瑞恩)一定會預佢啦,仲有會請嚟靚仔東東(陳曉東)。我同細V一向都好老友,至於東東我曾經喺寶麗金演唱會同佢合唱過《相思風雨中》,不過今次未必唱呢首,會同佢玩新嘢。」

自湯寶如復出香港樂壇後,曾於今年推出新歌《獨愛》,對於快要開演唱會的湯記來說,只有一首新歌是一件可惜的事情:「我原本係今年年尾出碟,但我又要登台,又要拍攝電視台節目,我真係無時間錄歌。而我嘅音樂製作班底又唔係只係做我一個嘅歌,監製舒文嘅期都好爆,所以我真係無辦法。今年我真係出唔到碟,我諗最快都要農曆年後。

+6
+5
+4


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。