衛蘭開紅館騷多謝Fans支持　前老闆黎明畀足面拍片送驚喜

衛蘭Janice今日在灣仔舉行《Oh My Janice World Tour 2018》記者會，更現場唱出新歌《一晃眼》。Janice明年1月將第4次再踏紅館舞台開騷，她表示心情非常興奮，又講到腦內已經有構思要如何演繹，不過笑言某些事一定不會做：「我唔會跳到好似郭富城咁！哈哈！」她又笑言今年工一浪接一浪有點不適應。

記者會一眾天王天后都有拍片向Janice打氣，包括：鄭秀文、容祖兒、李榮浩等等，就連前老闆黎明都拍片送上驚喜，令Janice大叫：「Oh My God！好感動呀！」而華納唱片的高層亦有送上一張大機票，好讓Janice完騷後可以出國放假。

Janice唱《一晃眼》時表示自己入行以來經歷過高低起跌，很感恩可以繼續做音樂。然後邀請了監製及演唱會顧問舒文上台，舒文笑言：「你都知香港人做嘢個個都好似火燭咁，但係同衛蘭做嘢就要慢10秒，其實都好嘅，一來我可以唞下，二來又可思考得細緻啲。」他又笑言Janice做事很Chill，所以今次夥拍一個「最Chill」的團隊合作。

接受訪問時，被問到既然前老闆黎明畀面拍片支持，會否邀請他作嘉賓？衛蘭表示：「真係好感動！(會否請Leon做嘉賓？)唔知呀，因為嘉賓部份已經定咗，不過都好想佢嚟睇，因為我都有得唱歌都係因為佢俾咗好多好歌我唱，所以好想多謝佢同Mark Lui。」至於邀請了哪位嘉賓，就要保持神秘。至於不少樂迷都表示希望聽到衛蘭的Side Track作品，Janice表示今次演唱會都會唱：「我好願意去唱，而且多樂迷都好想我唱，例如《寒命》、《自首》都會有；不過比較Hit啲嘅都會有，嘗試搵一個平衡。」

有網民認為衛蘭、JW、AGA、Gin Lee是繼容祖兒之後的樂壇天后接班人，Janice感謝網民與樂迷的支持：「好感恩，同一班好出色嘅歌手提名我覺得係一個好大嘅鼓勵！因為佢哋每一個歌手都有獨特嘅聲線，如果大家繼續鍾意聽我唱歌，我會繼續唱落去！」另外，DJ李志剛都點名讚衛蘭有做天后的潛質，Janice感激前輩的支持：「嘩！(會否覺得有前輩打氣信心大增？)都會呀，因為我個人本身冇乜信心，唔係講笑，哈哈！就連經理人同唱片同事都叫俾我多啲信心，不過有大家嘅支持係一個好大嘅祝福！」

衛蘭即場唱新歌，而且預告會唱多啲side track作品，樂迷記得要溫好書先入場。(黃國立攝)