E-kids進軍東京下北澤 全靠Tommy靚老婆係紅爆原宿系KOL

撰文:
最後更新日期:

E-kids去年在旺角麥花臣開復出演唱會大收旺場,這隊MK-Pop始祖食住個勢,今年在樂壇不停有搞作。先前一口氣推出兩首新作《一二三四》及《咪諗》,可說是不怕大家笑,最怕大家唔睇。不過E-Kids剛剛在社交平台發怖消息,表示下年頭再於麥花臣開騷,而演唱會Poster亦走向日系暴走族風格,咦?乜唔玩韓風啦咩?

E-kids在網上發怖演唱會Poster,大玩日系風格。

早前日本人氣組合w-inds來港開騷,同是三人組合的E-kids也有到場支持,更成功與w-inds集郵。咦?呢個橋段同早幾年Tommy同GD合照有啲似曾相識喎!不過跟車就唔好太貼,今次嘅合照唔係盲中中行埋去呃Like,就如Tommy也忍不著自白:「正當大家都追捧韓風嘅時候,其實我哋心入面嘅底蘊都仲係好鐘意日本嘅音樂文化,而w-inds亦係我哋好欣賞嘅男子組合。正如當年E-Kids出道,我哋造型、曲風、跳舞都比人話同日本嘅組合好相似,當然評價有好有壞,有人話我哋抄日本,亦有人聽聽吓,覺得都幾新鮮呀。所以之前我哋推出兩隻比較韓風嘅歌之後,嚟緊都會推出一首比較日系嘅歌曲,似返E-kids以前初出道嘅作品。而今次所有音樂其實都喺日本嗰邊做,包括編曲、混音、監製,《咪諗》嘅MV都係喺日本拍。」

最近E-kids也有到場支持w-inds的香港演唱會。唔好以為佢哋行埋去影相呃Like,其實Tommy喺日本都識唔少圈中人。

除咗喺香港發展,E-kids更加會進軍日本,將自己嘅音樂帶到當地演出。

Tommy更向《香港01》獨家透露:「E-kids除咗喺下年2月開麥花臣演唱會之外,其實嚟緊12月12號都會喺東京下北澤嘅一間Live House做表演,因為今次幫我哋做音樂嘅日本監製,旗下有一隊男子藍調樂隊,所以佢就邀請我哋去做埋今次發佈會嘅嘉賓,到時會用藍調去改編我哋嘅歌曲做一個Crossover。而我哋下年都有機會將E-kids嘅演唱會喺日本發行出碟,亦可能會喺當地有更大嘅舞台演出,希望可以令我哋嘅歌曲帶去唔同地方。」

E-kids可以打到去日本,原來幕後全靠Tommy嘅太太Eva幫忙。

E-kids能成功打入日本市場,原來背後全靠Tommy嘅賢內助Eva,呢位靚靚老婆不單止係一位DJ,更加係一位喺日本相當受歡迎嘅KOL,經常飛去大阪、東京等地演出。同日本攝影大師米原康正合作過之餘,亦經常有唔同嘅品牌合作,單計instagram嘅followers已經有30萬人。

連Tommy也要大讚太太:「其實真係要好多謝Eva嘅幫忙。過去五年以嚟,E-kids仲未復出之前,其實我一直都喺日本有好多幕後工作,例如同一啲網絡上好受歡迎嘅KOL合作,Eva亦係其中一位。佢喺日本的確好受歡迎,亦有好多包括時裝、酒店、音樂上嘅客戶搵佢幫手,亦都係因為咁,所以我認識咗好多日本唔同界別嘅人。而我一直喺度諗,有冇嘢可以令E-kids都繼續出歌。直至上一年,我同Eva出席一個音樂節,認識咗日本發行公司嘅老闆,佢問我『Tommy,你入行做management之前係做咩呢?』因為我一直都好低調,無提過自己係前藝人,所以佢知道之後都話可以合作吓。所以上年E-kids決定復出之後,我就比咗好多Demo呢位老闆聽,聽完佢又好鐘意,所以佢就幫我哋喺日本做歌。而呢啲機會,亦好直接係Eva帶比我哋。」

Tommy嘅太太Eva原來喺日本好多Fans,不但經常飛去當地打碟演出。更加有唔同嘅品牌合作,連BAPE創辦人Nigo、攝影大師米原康正都認識。
+7
+6
+5

提到香港樂壇,既然E-kids在日本找到一扇門,而香港仍有很多樂迷抗拒他們的音樂作品,為何又要留戀這地?Tommy坦言:「其實香港人會否聽廣東歌這個文化,大家有目共睹。但自從有了網絡之後,基本上也是世界大同。即使在香港發佈歌曲,全球有興趣的也會看到。但我坦白說,香港的文化是,除非你是天王巨星、或是很大的金錢投資,否則像我們這種艱難的歌手,音樂人不會用心幫你做歌,媒體也不會用心作報導。其實唔應該淨係去保護好紅嘅藝人,就算唔講E-kids,香港都有好多值得幫的歌手,如果大家願意去保護一下,留意一下,深信歌手都唔需要向外闖。入返正題,我哋E-kids亦都想證明,現今年代,我哋可以唔靠傳統媒體幫忙,一樣搵到自己嘅天空。尤其近幾年,香港有好多獨立歌手都可以做得好好,點解會出現咁多獨立歌手,其實就係得唔到好大嘅支持。例如我哋最近出嘅新歌,其實喺傳統媒體上係從來冇播過,一次都冇。反而網上嘅平台會製造一個空間比我哋,個問題就係,傳統媒體係咪仲需要停留喺E-kids你哋形象唔好嘅位置呢?當市場仲停留咗喺2003年,我哋需要做嘅嘢唔係走去另一個市場,而係要正視呢個問題。等於杜汶澤都會問個DJ『電台啲人咁懷舊嘅?問嚟問去都係嗰個年代嘅嘢,好悶呀。』我哋其實一樣面對緊呢個問題,最後索性大家唔好靠大家啦,變咗一個惡性循環,所以呢樣嘢真係香港樂壇需要面對。」

Tommy亦補充:「網絡世界主導一切,就像太太Eva可以在世界各地工作,全靠網絡上找到認同她風格的受眾。只要做出好的作品,一定會有人欣賞,不需依賴傳統媒體,這是我近五年最深信的想法。所以E-kids也一直抱著這心態為自己打開不同市場。」

Tommy坦言,現今做歌手或藝人唔需要再依賴媒體。網絡嘅力量可以令佢哋打出一片天,所以亦唔會逃避香港市場。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。