【有片】傳周杰倫將5度登央視春晚 破紀錄獻唱兩首歌

撰文:
最後更新日期:

每年內地央視春晚(春節聯歡晚會)都係年度盛事,能夠登上呢個舞台一啲都唔簡單,對藝人來說簡直有如一登龍門升價十倍。網上近日已不斷流傳出2018狗年春晚節目名單,總共有32個項目,繼傳出王菲同那英相隔20年再同台合唱後,呢日又有新消息 --- 周杰倫將會第5次登上春晚演出﹗

2009年周杰倫同內地國寶級歌手宋祖英,一齊踏上央視春晚表演《本草綱木》。(視覺中國)

周杰倫2000年出道已經一炮而紅,2004年首次登上央視春晚,其後4次上台演出。最近一次已經係2011年,呢次傳出佢相隔7年再登春晚,將會獻唱《煙花易冷》及《告白氣球》兩首歌。消息來自春晚節目組工作人員微博,仲話連航班都已經確定,令網友相當興奮。

2011年周杰倫第四次上央視春晚,即席表演拉奏大提琴。(視覺中國)

睇返過往4次周杰倫上春晚嘅表演曲目,2004年唱《龍拳》、2008年唱《青花瓷》、2009年唱《本草綱木》、2011年唱《蘭亭序》,四次都係獻唱一首歌,而曲目都必定係中國風。如果周董再現春晚,傳聞中佢會唱中國風嘅《煙花易冷》,都屬正常推理,不過如果佢真係會唱埋17年勁Hit,至今官方MV點擊率達1.29億嘅《告白氣球》,咁就真係創新紀錄啦。

2011年周董喺央視春晚唱《蘭亭序》時,仲有林志玲喺旁邊跳絲帶舞。(視覺中國)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。