【專訪】古巨基紅館三面台玩3D裸視 開騷竟然要多謝五月天?

撰文:
最後更新日期:
在香港樂壇中,擁有一首唱K必點神曲並不是容易的事,即使強如歌神張學友,也不一定每個人唱K也點一首《藍雨》來唱。不過有一位男歌手的作品,是每位唱K的朋友也會點唱他的作品,而且一定要放到最後壓軸出場。撫心自問,對一次唱K時,你又有沒有將《勁歌金曲》、《情歌王》、《狂串樂基兒》特地留待最後才與朋友大合唱?不知不覺間,古巨基原來植根在每一個K迷的心中。多年遊走於香港與內地市場之間,基仔已有7年沒開紅館演唱會,回歸香港樂壇,憑《初心》一曲旋即登上四台冠軍歌位置,並宣布將於5月舉行《古巨基我們世界巡迴演唱會》香港站,由於反應熱烈,開賣不久更加開一場。
攝影:陳順禎
Make-up:Natalie Soo @ND&Co.
Hair:Mark Ip @HAIR
Wardrobe:IT
場地提供:英皇駿景酒店
7年沒開紅館的古巨基,將於5月舉行《古巨基我們世界巡迴演唱會》香港站。 (陳順禎攝)
+8
+7
+6
關於《我們世界巡迴演唱會》,其實早已開始入紙紅館,可惜檔期一直對不上,結果一直到今年農曆新年終於有轉機,基仔表示:「其實都要多謝五月天,因為佢哋每年嘅五月之約今年改變咗地點,所以紅館就擠到一個檔期出嚟,於是各大歌手一齊爭奪啦。公司喺過年前問我,紅館有個咁嘅檔期,會唔會想襯機用呢個檔期去開Tour呀?因為如果唔要呢個檔期,可能再同紅館排期要排到2019年都未必開到,所以大家都同意去馬。我諗對我同對樂迷都係一個驚喜。」
基仔笑言,今次開得成紅館,唔多唔少都要多謝五月天。 (陳順禎攝)
古巨基的作品,總離不開回憶童年的氛圍,由當年的《友共情》、大碟《遊戲基》、《大雄》、再到近年的《致少年時代》、《初心》,基仔也帶領著樂迷回到最歡樂無憂的時光。而今次演唱會的主題「我們」亦是同出一徹,基仔道:「今次演唱會嘅主軸係我會用一部時光機,帶領大家返去以前重溫人生嘅成長經歷。見到我今次演唱會嘅Poster坐住嗰部,就係今次嘅時光機。」
今次演唱會的概念,就是騎著海報中的時光機,帶領觀眾重返不同年代。 (資料圖片)
對於《勁歌金曲》、《情歌王》等串燒歌系列,深信樂迷也相當期待在演唱會當中再聽到基仔在台上再次演繹。不過基仔反問:「我聽講過大家唱K係好鐘意點唱呢啲系列嘅,而之前開演唱會都試過唱,不過我又想知,大家睇演唱會真係會想聽到呢類咁長嘅歌?因為演唱會嘅長度有限。」對筆者來說,其實《勁歌金曲》這類串燒歌,可以像唱K般放在歌單的最後,簡直就是綿上添花,心理上又好像「抵睇」一點。基仔好奇寶寶上身:「咁大家其實又鐘意《勁歌金曲》定《情歌王》多啲呢?唔會覺得好似係唱晒人哋啲歌咁咩?」但在不少人心目中,其實《勁歌金曲》經過重編,雖然是翻唱不少經典作品,但也早已成為了古巨基的代表作之一,在這些歌詞身上已沾有基仔的氣息,有時唱著唱著,更會唱不回原版,而是唱出了《勁歌金曲》的medley。但到底基仔最後會否在演唱會中演繹,看來便要靠樂迷在網上集氣了。
基仔表示沒有想像過《勁歌金曲》、《情歌王》、《狂串樂基兒》等串燒歌,原來在樂迷心目中佔有這樣重要的地位,會考慮加入演唱會的歌單當中。 (陳順禎攝)
以往在古巨基的大碟及演唱會當中,也分別富有各樣的主題色彩。例如《遊戲基》全碟也是跟遊戲有關;《大雄》則全碟也是以漫畫作題材;2005年《勁歌金曲世界巡迴演唱會》,基仔將所有關於動漫遊戲的元素放到舞台上。早前在網上開Live直播,基仔再次將高達手等舞台裝置放到Studio中亮相,是否亦意味著今次演唱會能再次看到這些元素,基仔否定:「我做嘢一向都唔會畀觀眾估到,加上呢啲元素之前做過,我都唔會重覆拎出嚟做,不過我向大家保證,入場你會發現今次嘅concept仍然會充滿住我陣『徐』。」
說著說著,基仔也禁不著透露了一個有關今次演唱會的大賣點:「我保證好好睇,因為今次係一個3D裸視效果嘅舞台,大家唔洗帶3D眼鏡都會睇到。所以大家發現點解我今次唔係開四面台,而係三面台呢?個原因就係我哋做咗一個弧形LED舞台,大家可以想像一下,到時我就企喺裡面配合影像播放,就好似置身於影像中嘅場地咁。」
早前做直播都特意將高達手、時光機等元素放進現場。連開Live都咁認真,基仔開紅館個舞台一定會更加精彩! (影片擷圖)
近日推出新歌《子華說》,以黃子華金句為題材,更特地找來子華神為此曲Feature,錦上添花。基仔對今次子華神出手幫忙大感驚喜:「其實今次做緊嗰張廣東碟嘅題材係關於香港故事,子華嘅金句就正正係道出咗好多人嘅心聲同故事,所以開始做呢張大碟嘅時候,我就定下咗第一首歌要做關於子華嘅題目。亦好順理成章地,用得《子華說》呢個名,我就梗係要搵埋子華幫忙啦。」在娛樂圈中,能叫得動子華神出手幫忙的人並不多,基仔道:「我跟子華解釋了整張大碟的想法,我和林夕想怎樣做這首歌曲,最後子華非常爽快的答應了我,實在相當感激。」但問到子華會否成為基仔的演唱會嘉賓,基仔則笑笑口答道:「要賣個關子先,到時入場大家就會知道。」
基仔透露新碟主題時,一再感激子華神的幫忙。唔知演唱會可唔可以見到佢哋合唱呢? (陳順禎攝)
後記:
提起時光機,古巨基對筆者來說還有另一層的意義,每次聽到他的歌曲,也會將思潮回溯到少年時代。皆因筆者一向把基仔稱為基師兄,作為中學的同校師弟,還記得中二時,基師兄帶著他當時的新專輯《大雄》回校探訪一眾師弟妹,更相當親民的與在校每一位合照,幫奧比斯作慈善籌款,當時的合照一直被筆者保存至今。訪問當天再次拿出舊合照,基仔又再次由受訪者身份變成師兄,聊著在校的往事,給予我這位後輩點點的鼓勵。塵封了十四年的合照,終於再添上一個2018年版的新簽名。
將橫跨十四年的合照拿在手中,感覺像是乘坐時光機回到那個屬於「我們」的少年時代。 (陳順禎攝)


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。