BOYZ重拍《跟蹤你》MV 關智斌張致恆15年後變咗幾多?

撰文:
最後更新日期:

所謂往事不堪回首,今時今日要大家睇返5年前嘅舊照,見到想當年嘅衣著打扮已經相當無眼睇。BOYZ相隔多年Re-U,演唱會門票話咁快秒殺售罄,入場前溫書聽返舊歌已經係指定動作,BOYZ相當有心,重新拍攝經典歌曲《跟蹤你》MV,網友驚覺事隔15年關智斌完全無變老,好似仲靚仔咗添呀﹗

BOYZ重組後,第一件事就係重拍經典歌《跟蹤你》MV。(影片截圖)

其實原裝MV講嘅係一個暗戀女仔嘅故事,BOYZ跟蹤佢哋暗戀嘅女仔,暗地裹對佢呵護備至,成個MV又sweet又冧豬。當年女主角係梁洛施,隔咗15年後新版女主角就搵咗佢地同門師妹許靖韻(Angela)演出,點知睇睇吓就發現變咗「痴漢版」。

MV女主角當年係梁洛施,嚟到2018年版本就變咗小背心許靖韻。

Angela反跟蹤BOYZ,又戴假髮又盛,扮鬼扮馬跟蹤佢哋兩個,無論喺CD舖、小巴、戲院,無時無刻都喺佢哋身邊出現,搞到Kenny同Steven勁驚,最後BOYZ忍唔住當面走去問Angela做乜跟蹤佢哋幾日,原來Angela係BOYZ嘅die hard fans,「你哋首首歌我都識背,嗰首《死性不改》調轉頭我都識背呀!同埋咁耐冇見咪諗住見吓囉。」原來係為咗見佢哋一面,真係嚇鬼死人。

事隔15年,Kenny點解可以完全無變架﹗(影片截圖)

Steven就好似佬味濃咗少少……(影片截圖)

Re-u番十五年前嘅MV,除咗髮型唔同咗之外,Kenny疑似著返當年同一套歌衫,完全無老過仲好似靚仔咗﹗真係非常神奇。至於Steven就由當年嘅花美男,留住一臉鬍鬚增添男人味,側身望落身型仲好似闊咗唔少。佢地不約而同都話,呢次拍攝令回憶返晒嚟,Kenny話:「都真係幾開心,因為同佢(Steven)一齊兩個人冇乜壓力,好似返返去十幾年前,一齊做嘢得來又好似一齊去玩嗰個感覺,好有呢個情懷。」佢哋仲話好多謝Angela幫手拍呢個MV,「佢雖然冇原版嘅女主角咁溫柔,但係佢嗰種傻勁係帶出咗另一種詭異嘅感覺,哈哈。第一次同小師妹合作,希望再有多啲機會同佢一齊做嘢,我哋真係好鍾意佢,佢真係好得意。」

Kenny同Steven大讚Angela相當用心,專業又準時,揣摩咗呢個角色,特登拎個假髮出嚟拍攝。

一齊睇下有幾咁神還原吖

+5
+4
+3


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。