【編輯推介】新蒲崗米芝蓮雲吞麵小店 零味精鮮湯全靠大地魚!

撰文:
最後更新日期:

自從做了飲食記者,每次跟朋友食飯,他們總會說:「咁你諗食乜啦,你食咁多好嘢,等你帶我哋食好西呀!」其實有時都會有壓力,但久而久之發覺冇得避,索性加了個“Bucket List” ,通常將想吃或吃過覺得好味的餐廳記在電話的「備忘錄」裡,現在就將我最私心推介的餐廳跟大家分享。本身是記者,也是讀者,當然知道大家最憎見到打手、賣廣告,敢發毒誓打後幾期的這欄目都是發自內心推薦給大家的餐廳!

攝影:鄧穎琪

這個欄目將會不定期出現,就如黎明所講:「拍拖同見鬼一樣,都係要講緣分。」其實食到好餐廳,又何嘗不是可遇不可求?曾經做過年幾兩年專欄作家,坦白講,要隔個星期供稿,有時確實為填塞稿量而寫,所以現在這個模式會較易讓大家睇到最真實一面,第一期先推介一間雲吞麵店——英記美點小食。

兩年前,有段時間常在新蒲崗出沒,礙於下班已經11點,想搵宵夜食也非易事。新蒲崗有些串燒店,但在朋友介紹下第一次去英記,隨便點了碗雲吞麵外賣。我不算太熱衷於雲吞麵,是「好日都唔食一碗」那種,純粹抱住宵夜求其食的心態,誰知竟給我很大驚喜,最後連那碗湯都喝得一滴不剩,簡直是從未試過。

有時候就算不想食麵,也會點一客淨雲吞,一客有6粒,如果是雲吞麵則一碗4粒。

食雲吞麵最忌重鹼水味,而這個湯不但沒有鹼水味、味精,清澈得來卻帶一陣鮮香,第一印象已經良好,就這樣光顧了一次又一次。自從離開新蒲崗後,到訪的次數的確減少了,不過有時很想很想吃雲吞麵時,還是不介意下班後從荃灣搭45分鐘車跨區去食碗麵,上個月又去了一趟。

「阿妹!仲喺觀塘返工呀?」「冇喇,冇做喇,依家返荃灣。」大半年冇見,老闆娘Sindy親切依然,其實我從沒想過她原來認得我,既然如此,自以為熟客的我也不妨有話直說……事緣當日覺得湯的味道有點不同,我本著為她好的心態,鼓起勇起說:「我覺得今日個湯……淡咗啲。」老闆娘隨手拿了隻匙羹,呷一口湯再回答:「哎呀,真係淡咗少少,係呀,因為噚日個客話唔想咁鹹,今日試下輕手啲,其實我都覺得濃味啲先吊得起個味㗎!」老闆娘的態度讓我頗欣賞,會認真聆聽客人的意見,也會反思如何做得更好。

招牌巷仔雲吞麵$30|看盧覓雪主持的《劣食觀世音》,她曾說過雲吞不是大就等於好,大小適中,一啖一隻才最為理想;最好的狀態就是「散尾雲吞」,即是雲吞餡不必塞得太滿,剩下的雲吞皮部分散開,如像金魚尾巴一樣。

直至幾日前,我又再幫襯,等麵時四圍探頭看看,老闆娘以為我等得不耐煩,大嚷:「阿妹,下一碗到你喇!」味道終回復平日水準,向她請教,沒想到Sindy竟非常詳細地分享起來,雲吞與湯底的鮮味,原來源自大地魚!她會取出大地魚腩位,拆肉炸,用鎚仔揼碎並且磨成粉末,篩粉後再加手切豬肉與鮮蝦一同包雲吞,剩下的大地魚則用來煲湯,難怪啦!

此時另一中年女客人問:「大地魚點嘅樣㗎?」Sindy聽罷隨即端出一條魚,讓大家聞聞看,她笑言曾經跟老公鬧交,嬲到冇心情工作,在西環買現成大地魚粉回來,但一食落感覺完全不同,客人也立即吃得出分別。

我哋個年代食嘅味道,少一分堅持都做唔到,你稍有一個步驟甩咗都做唔到。你煨大地魚唔畀心機,求其煨,大大火塞條魚去煨,出嚟會有陣燶味。

高峰期日包2千粒雲吞 雙手勞損術後即開工

老闆娘數不出每日包幾多粒雲吞,但最高峰期忙得開「摩打手」,包足2,000粒雲吞。15年來日日做到冇停手,她的老公「肥叔叔」做到雙腿靜脈曲張,而Sindy也雙手勞損,「有日做做下嘢,拎碗麵畀個客,隻手麻咗,成碗麵跌咗落地,我初頭唔知,以為跣手,跟住睇咗好多個醫生都冇用,係有日真係痛到不得了,去慈雲山求其睇咗個婦科,佢一睇就知咩事,即刻寫紙我入醫院做手術,醫生話原來我啲筋同肉黐埋咗,兩隻手都係。」不過Sindy顧住舖頭,不放心一下子雙手同時做手術,只得輪住做,施完手術即日就包住手回來單手開工,因為始終對自己的舖頭太過上心。

這張相是年幾之前拍下,見老闆娘每日都自己包雲吞,她說做這行都有旺季淡季,周末、節日、暑假特別多人幫襯,有客人會買雲吞回家自己煲,所以最高峰時她包到冇停手,年前手腕更因勞損而做過手術!

屢遭街坊報警投訴 味道太香!

人稱「肥佬韜」及「食神韜」的梁文韜原來也曾是英記的座上客,有次他推介Sindy兩公婆去香港仔街市買大地魚粉,Sindy指老公立即禁不住駁嘴,「佢話:『肥韜,你講咩我都信,呢樣我真係唔會信你!』你今日同佢買,現場佢畀你,但之後你問佢攞貨,佢溝咗咩粉你都唔知啦,求其搵啲魚落去,個味都唔同。』所以我全部都自己做,一炸呢啲粉,喺隔籬九條街都聞到。」此言非虛,Sindy說自己屢次被街坊投訴,原因就是大地魚粉味道太香、太搶,即使警察從不受理,客人還是鍥而不捨投訴到底,「我打開門做生意,又唔係賣臭豆腐,差佬都話冇得投訴呀!個阿婆成日落嚟食雲吞,轉個頭又投訴我,畀佢煩死,佢仔新抱都鬧佢多鬼餘呀!」

雲吞大小適中,一啖一隻剛剛好,內餡有新鮮手切豬肉、彈牙鮮蝦,還有必不可少的大地魚粉,有提鮮作用。

請按下圖睇「英記美點小食」的其他食品和價錢。

六十年代撈麵$30|別以為是淨撈,其實是豬油撈麵,記者前陣子才第一次食,麵身多了一陣油香,卻不會食到滿口是油般讓人想吐。原來Sindy每日買豬油回來自己炸,難怪香噴噴!

+3
+2

Sindy指老公70年代學師,跟師父在元朗推車仔賣雲吞麵,大概2003至2004年就正式落戶新蒲崗,頭幾年只賣$10碗,但礙於不斷加租,加上16年曾入圍米芝蓮推介的街頭小店,「死亡之吻」順理成章就帶來加租,所以雲吞麵由當初的$10加到$30碗,她表示:「依家租金係嗰陣時嘅3倍半呀!」其實$30碗,算不算貴呢?我覺得不算,至少它食得飽肚又有質素,包雲吞畢竟也是一門花耐性、花手工的手藝,絕對值得。而老闆娘從不求出名,也不求賺大錢,只說了句:「呢頭多學生,最開心見到啲學生放假都帶埋阿爺阿嫲嚟食,所以,都係靠班街坊撐住啦!

英記美點小食
地址:新蒲崗康強街32-34號康強洋樓10號地舖
電話:2323 9519



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。