【美食博覽．博評】香港核心價值？「執輸行頭慘過敗家」只係其一
港人愛旅遊，而家啲小朋友可能未滿月已經去過幾次日本，傳統嘅走馬看花歐洲十天十四國豪華團已經滿足唔到香港人。其實呢個係普世現象，而家好多外國遊客亦唔滿足於去巴黎鐵塔影張相到此一遊，所以呢幾年興玩「體驗」。去法國跟乜乜大師整甜品，去泰國學幾下泰拳（然後食西米糕）咁，最好仲可以去「體驗」下當地人點生活云云。
好事喎，嚟香港，都冇理由只係去山頂去大佛去廟街。想體驗真香港？除咗去澳牛去九記坐的士享受港式殷勤服務外，我建議貿發局介紹外國遊客去佢哋嘅香港盛事——美食博覽。
過去一個星期，好多令人唔開心嘅新聞。但唔緊要，其實仲存在另一個香港，好多人係十分快樂的。好似郝景芳嘅《北京折叠》咁，呢個城市好似有幾班人，活在平行時空，隱約知道對方存在，又好似各不相干咁。
個個講核心價值，香港人嘅核心價值係乜？「執輸行頭慘過敗家」當然係其中之一。最能令香港人企出嚟嘅，當然係有著數，特別係吃喝玩樂。舊年年尾天寒地凍，有幾十個勇士通宵在黃竹坑排隊。爭普選？喔，原來係28蚊晚酒店。舊年4月Ruby Tuesday畀忠實客戶狂轟，所為何事？種族歧視定接待北韓領導人？原來係提供17蚊漢堡畀新客，搞到排長龍，「唔公平」。
但美食博覽就更高層次。黃竹坑，都係12月排一晚隊，而其實香港地都唔係好凍啫。Ruby Tuesday更加冇所謂，做鍵盤戰士狂轟之嘛，最後有幾多真係杯葛？「畀咗錢做會員喎」。
美食博覽就唔同，勇士真係豁出去的。首先，傳媒樂於報導勇士「食相」多年，梁振英都下埋台但會展「龍蝦姐」仲好多人認得。去行船爭解纜嘅，必定預咗會見報同成為網上紅人。但又如何？完全無阻會眾嘅熱情，正係「有誰會知我心內 有極強信念」。難為好多記者都要做現場報導，更有人排足10個鐘同會眾共同進退，辛苦晒。
唔講見報，只講耐性，都唔係人人做到。有位IT男，請咗兩日假，通頂排頭位，亦大方接受訪問，冇好似以前小妹妹上勁歌金曲做現場觀眾咁閃縮。又話炒人都炒IT先嘅？此人定必係實力過人，無懼壓力（咁其實，攞正牌請咗假嘛，怕乜）。
另外，仲有廿四孝老公，嚟足十幾年，相信好多人去六四晚會都冇咁神心。當然唔係自己好鍾意，而係陪老婆。真係偉大，我就想像唔到我可以咁做。
有時間有耐力一早排又點？去到開幕，同黃竹坑嗰次一樣，人人照樣爭先恐後。打尖攝位鬆踭之類，更係家常便飯。呢個時侯就畀你見到咩係世代之爭，拳怕少壯，（棍怕老狼？邊得嚟有棍，得龍蝦夾咋），新一代充滿希望。
每逢見到啲令人側目嘅新聞，好多人嘅反應就係：唔係「我哋」。冇禮貌冇公德嘅，當然係大陸遊客，或新移民。但目測啲會眾，好似個個都純正廣東話。「咁就當然係廢老」。其實都好合理，老人家退休人士時間冇咁值錢，先會走嚟排。你同我日日要為口奔馳，冇幾多人好似IT男咁請兩日假。
不過世事無絶對，只有真情趣。今年登上頭條嘅，係中四嘅張同學。新一代都繼承到呢種優良傳統，廢老如我應該老懷安慰，可以含笑九泉。張同學步大力雄，帶出一眾師奶幾個身位，當然就成功搶得頭位。叢林法則，弱肉強食，係冇關愛座嘅。張同學仲要六點鐘已經排隊，我決定將呢個故事同公司啲話返八點好辛苦嘅未來金融才俊講，話畀佢哋知early bird gets the mooncake。
搶到頭位嘅獎品係乜？原來係一世免費食榴槤月餅。我其實有啲奇怪，張同學真係咁鍾意食榴槤月餅？而其實免費食一世，即係值幾錢？大家都知道，呢類東西古惑嘢甚多。原來一世免費，只係每年換一盒。仲要諗下公司會唔會執笠，或者改條款唔認數，或者下年「因應環保改為每盒一個」「支持健康飲食改為迷你版」。吉野家都曾經答應《筋肉人》作者一世任食牛丼，結果作者一碗都食唔到。
講咗咁多奇人奇事，但年年都仲會有人去。貿發局向來好識為節目做勢，書展年年咁多人排係有原因嘅。但自從逼爆玻璃後，即使有人搶買周秀娜寫真集，似乎都冇美食博覽咁震憾。固然參展商鋪想引起話題（而家人人都知有榴槤月餅），而利用會眾嘅「醜態」做廉價宣傳。但畢竟一個願打一個願捱，都要你肯去搶先得嘅。而我哋在呢度做鍵盤戰士冇用的，實踐是檢驗真理的唯一標準，事實話你知，你唔去我唔去，大把人會去。
認真的，香港地臥虎藏龍，運動又點會係精英運動員嘅專利。之前Beer Run 引起咁多爭議，不如搞Durian Run（新加坡真係有的！），或者Abalone Run。喂飲啤酒跑步就話危險啫，食鮑魚跑步唔危險啦啩？
最後，不妨講下，點解美食博覽長玩長有。首先，好多人忽略咗，雖然科技先進，大把嘢可以網購，但仲未完全取代人要社交，要面對面溝通嘅需要。陪老婆嚟足十幾年，係最好嘅愛的證明。所以一百蚊買CD冇人制但一千幾百蚊睇演唱會（suppose唱得差過CD）又大把人去，網上大把盜版但依然有唔少人入戲院。我冇數據在手，但目測商場越黎越多食肆 – 亦因為食肆先畀得起租。你可以網購個名牌袋，但科技暫時未先進到你可以3D打印餐米芝蓮大餐在屋企食。就算可以，同朋友同愛人食飯，去三星米芝蓮餐廳搵Chef乜乜合照，同你在屋企食，都真係唔係同一回事。
而且，現代人照計越嚟越冇耐性，點解仲肯請兩日假排隊？答案係：智能手機。以前嘅人排隊就真係辛苦。而家只要有尿袋，一機在手，天下我有，一兩日，其實唔係好難捱。你唔去，大把人去。
（文章純屬作者意見，不代表香港01立場。）