點解 Stephy 方力申分手咁大件事？
Stephy 就係咁嘅一回事……佢唔係周秀娜文凱玲嗰種性感女神，你買佢本書唔會俾訓導老師示眾，佢亦唔係性格巨星音樂才女。一個冇乜點攻擊性嘅女仔，紅得起，有個好男朋友，大家其實都想套戲好好睇睇完場。
我就係 10 日內入場睇左兩次《紀念日》嘅人
都係由 2016 年 3 月 17 日講起。
3 月 17 日中午，微雨。我在路上，約咗信報的何華真教授食飯（name dropping 是也，而佢亦可以作證）。忽然間，電話收到明報 app 彈出的「突發新聞」：
方力申鄧麗欣驚爆分手
然後，我就在 Facebook 寫咗句「香港最黑暗一天」，換咗個黑色頭像。印象中第一次。
上次鍾嘉欣嫁人，我都只係貼咗句「Je suis伍允龍」。是的，任你點鬧都好，我還是覺得，呢件事比安卡拉炸低幾十個人更加切身。你可以不滿我的價值觀，但我認為寫文最緊要誠實。
何華真餐飯，我有點心不在焉。然後，我就決定寫呢篇文。儘管有人好心提點，我亦一早知，呢幾日大把人寫 Stephy。任何再嘩眾取寵或獨特角度嘅潮文都會有，經濟角度文化角度愛情角度港女角度音樂人角度乜都有。錢鍾書話齋，文人最愛有人死，網友就最鍾意有人分手。佢好似係咁講的。
但，我還是要寫。不為什麼，就只因為我覺得，feel obliged to write something。
葉念琛系列與恆生指數的十年
AlphaGo 能算出這結局嗎？
十年感情，是未回本的投資還是 sunk cost？
原文照錄，呢堆都係網友提議我可以寫的東西，但我全部唔寫。在可能範圍內（這是頭盔），我希望寫真誠的東西。唔要虛情假意，唔要潮文，唔要抽水文，唔要懶係文化角度，唔要寫 Stephy 都要扯番去財經。
無數咁多人已經寫過呢單新聞。男方浪費女人青春，吊兒郎當；女嘅好惡頂，拍拖耐咗會點點點。我們的回憶。外加 N 咁多首歌詞。但正如向西村上春樹（唔幫佢賣廣告了）篇文話齋，其實，關你鬼事？
我寫 Stephy 有何獨特角度？因為，我覺得真係關我事。朋友甚至同我講「點會黑暗一天？機會嚟啦飛雲」。我都冇乜心機聽落去。真係奇，我諗，我係fans。
對，我就係10日內入場睇咗兩次《紀念日》嘅人。元祖的《獨家試愛》我當然有睇。甚至連舊年年底「MK 活地亞倫」葉念琛回顧展重映《獨家試愛》，我都有去睇。仲同咗葉大導合照。你睇右邊的作者簡介，寫葉念琛，同方太做節目一樣，係整定的。唔係因為呢篇文先加上去。
咁，應該比較夠資格啦？
點解係得佢哋分手咁多人講？
對，向西村上春樹可以恥笑，做乜咁多人關心？家陣你俾人飛咩？況且，大家其實都唔係 Stephy 或方力申的朋友。我都唔係。得罪講句，大家都係睇八卦新聞，憑空亂估。而咁多年嘅經驗話我知，男女拍拖兩個人嘅嘢，任何外人都唔會明。
你見女神同個肥仔一齊，而個肥仔又唔似「有上進心」（即係冇錢），總係有原因。男神同件豬扒一齊，應該都係豬扒有佢過人之處，只係你唔知。唔明點解一齊都仲一齊，當事人總有原因。正如唔明點解分開都分開，當事人亦有佢原因。
好玄好廢？你可以唔同意好多人 Facebook 變哂紅白藍頭像 Pray for 法蘭西。但，佢地總有個原因。Stephy 一樣，cynic 當然可以唔認同大家咁關心。但問題係，點解真係有咁多人關心？
集體回憶？
而家呢個詞語濫過陳冠希。所以三四十歲嘅，同條女（或觀音兵同娘娘）唱 K 合唱《好心好報》，應該真係算集體回憶。不過，只係集體回憶，解釋唔到的。你見黎明樂基兒離婚，阿 Sa 鄭中基驚爆結婚又離婚，鄭秀文同許志安離離合合，都未有咁多人講。斷估以上幾位都紅過 Stephy 方力申。
咁多人關心佢兩位嘅原因，因為 Stephy 同方力申，真係「金童玉女」。唔好鬧住，下面會再解。
同時間，佢地亦都係少數螢幕上同螢幕下都做情侶嘅藝人。仲維持到十年。呢樣就係獨特性。以上講嘅 case，全部都冇。
正因如此，Stephy 同方力申，俾好多人覺得係「童話」。仲要係好有代入感嘅童話，追連續劇追足 10 年喎。亦因為咁，我舊年睇完《紀念日》已經講，佢兩個千萬唔好分開，否則我真係不再相信世界仲有童話。結果一語成讖。唉。
同「高質港女」講 Stephy 係多餘
金童呢 part，唔會太多人異議。方力申雖則唔係四大天王或吳彥祖古天樂梁朝偉。但就唔講歌藝演技都好，方力申都係不少香港女仔心中的好東西。Seeing is believing。當年佢老哥在港大上親堂都十分哄動。我見過，真係見過。名校出身，奧運代表，住 St John’s，歌影視三棲明星。就算未係男神，點都係人生勝利組。
呀，仲有最重要的，「上進心」。方力申應未算富家子弟，但屋企都有個錢。仲要係經營畫廊，絶對冇嗰種土豪廠佬味。難得方力申仲要唔係太多負面新聞。至少唔會俾你見到喪劈，然後拖住兩條女上房嗰種。
玉女呢 part，就比較多人反對。我以前女友係個文青。對。會講 Susan Sontag 的文青。去挪威旅行佢會講 Ibsen（易卜生），Munch（孟克），Grieg（葛利格）甚至 Bjørnson（當年我都唔知乜水）之類的文青。
唔記得邊一日，佢發現我原來鍾意 Stephy 之後，佢就斷言我係一個電車男。原本我想反駁「你幾時見咁有上進心的電車男」，後來諗下，同女人，特別係女文青，爭拗 Stephy，絶對係多餘的。
是的，不少高質港女（呢度「港女」一詞係中性）相當不屑 Stephy。但本人亦教過下書，肯定在普普通通的屋邨妹圈子中，Stephy 係幾受歡迎嘅。而反正，香港的「高質港女」只屬少數。
屋邨出身 平庸之美
Stephy 有何吸引「電車男」，或部分「冇咁高質港女」的特質？正係「高質港女」最鄙視佢嘅特質：唱歌唔好聽，演技冇乜（只有葉念琛令佢演返港女先有睇頭），才華又冇乜。當年出書俾人笑中文差（雖則笑嘅好多中文都係拎個 E 甚至唔合格）。
甚至佢封分手聲明都只係得省略號，完全唔識用句號逗號，貫徹始終。Stephy 十分平庸，Fans 都係咁話。
最重要係，佢其實唔算靚（以藝人的標準。唔好用你公司同事或學校的同學比）。同埋，出身草根。屯門屋邨妹之嘛。呢樣嘢，令好多女仔好有代入感。
我的文青舊女友係個例外（文青港女根本就係例外）。就我理解，一般女仔，並不太抗拒 Stephy。我甚至遇過不少女仔叫 Stephy。而我話你知，100 個叫 Stephy 嘅女仔（包括大陸，如有），100 個都係 named after 鄧麗欣。冇錯，在鄧麗欣之前，香港係冇人叫 Stephy 的。正如在 Keira Knightley 成名之前，基本上冇乜人叫做 Keira。
有冇睇杜琪峰套《單身男女》？當年未算太出名的高圓圓，戲中引嚟兩大男神吳彥祖同古天樂一齊爭，仲玩到好大，沒有最神經只有更神經。絶對係比《Interstellar》更科幻的科幻片，「跨越不可能」。套戲都引黎不少女仔企圖去「投入」，但畢竟高圓圓係北方佳麗，難啲。好似《春嬌與志明》咁，土炮楊千嬅 KO 大陸妹楊冪，就真係太快人心啦。
愛到曲終人散 難免還是遺憾
Stephy 就係咁嘅一回事。一個屯門屋邨妹，讀書唔叻，唔算靚，冇乜身材，演戲唔好，唱歌唔係好得。但居然紅做紅得起。居然同咗方力申一齊十年。而當中不見得 Stephy 用過咩好多手段（你懂的）。
Stephy 平庸，固然引嚟部分人不屑。但整體男仔多數唔會太反感，女仔亦唔會好抗拒。即係，佢唔係周秀娜文凱玲嗰種性感女神，你買佢本書唔會俾訓導老師示眾，佢亦唔係性格巨星音樂才女。一個冇乜點攻擊性嘅女仔，紅得起，有個好男朋友，大家其實都想套戲好好睇睇完場。可惜，世界上大團圓結局就真係唔多。
By the way，十分邪門。《紀念日》就係葉念琛咁多套戲之中最唔「葉念琛」的一套。冇小三。冇出軌。算係「大團圓結局」。可惜就係同現實唔同。
當初仲有人覺得係炒作博宣傳。而家大局已定。太陽照常升起。我個黑色頭像用咗兩日咁大把（然後轉咗做 Stephy 在《紀念日》的對白：十年後你一樣呃我唔到）。香港未係最黑暗，只有更黑暗。
世界上或者仲有童話，李斯特城都英超冠軍啦。但一個唔靚唱歌唔好演戲唔得才華冇乜嘅屋邨妹，可以紅得起，可以配上男神，可以俾人講足咁多日，應該好難再發生。而家個個十幾歲已經要整容夾胸外加無數潛規則，10 個小妹妹 7 個都話自己係「model」，甚至有話屋企冇錢唔好諗住入行做藝人。可見嗰 10 年前後，世界真係唔同咗。
正因如此，我仍然要寫呢篇文。亦好感激大家睇完呢篇文。因為好快，你就想鬧都冇得鬧。根本唔會有第二次。
後記
十年前《獨家試愛》都收 800 萬。《紀念日》好似過 1,000 萬票房。我有理由相信，不少人係好似我咁，兩套戲都有睇。對，你估到了。不妨睇下自己身邊，當年陪你睇《獨家試愛》嗰位，十年後仲係咪同你睇埋《紀念日》？
既然你側邊嗰位都唔同咗，銀幕上嗰兩位 keep 到十年，其實已經好難得。借題發揮寫文呃 like 請便，但扮愛情專家肚中迴蟲，就大可不必。
（我？十年前後我都係自己睇嘅。「最愛你的人永遠是你自己」。呢句就唔係葉念琛了。）
（本文純屬作者意見，不代表香港01立場。）