【香港樂壇頒獎禮．博評】唔buy主流媒體　何來培養到樂壇巨星？

一連串嘅香港樂壇頒獎禮，已經喺1月4日完結咗。今年最高話題性、最矚目嘅係商台叱咤樂壇頒獎禮謝霆鋒、陳奕迅一頭一尾嘅表演。仲有喺港台第40屆十大中文金曲——我和你音樂會當中，郭富城連跳連唱8分鐘同加上陳奕迅串燒金曲表演。係回憶呀，好正，我都睇到好開心又興奮。但今年出力做緊音樂嘅台前幕後音樂人又如何呢？我見到好多觀眾睇完頒獎禮都話「香港已經冇咗樂壇」、「以前呢啲先係星嘛，依家樂壇已經冇能力造星」、「冇人攞輪，到呢啲二打六攞獎」，我覺好難聽。

「巨星」靠主流媒體營造

「香港已經冇咗樂壇」唔係好似家駒當年所講嘅「香港冇樂壇，只有娛樂圈」話樂壇唔着重音樂只着重娛樂同搵錢。今次觀眾聽眾係覺得香港已經冇歌星、冇人唱好歌，所以得出「香港冇樂壇」呢個結論。而「香港樂壇已經再冇造星能力」就非常直白冇需再解釋。觀眾聽眾有以上兩種感覺，我覺得有一個共通原因，就係冇人再buy大台。

呢度所講嘅大台，唔係淨係話無綫，而係話主流媒體。近年話語權因為網絡而落到觀眾聽眾手上，主流媒體捧咩人，你可以同以往一樣唔buy，依家仲得到話語權而反擊。我本人覺得呢個現象係好事，我都係受惠者，先可以喺度同你講嘢。令到觀眾聽眾嘅意見得以展示，對任何行業嘅質素改善同發展都有好處。呢個轉變，令到各主流媒體嘅影響力大不如前。佢哋捧啲咩人，反對嘅聲音都可以喺觀眾聽眾之間透過網絡廣泛傳播，形成勢力。意見愈辯未必愈明，人云亦云者眾。唔少歌手因為有大公司撐而惹人反感，唔理佢喺音樂上幾咁落力都好，就係睇佢唔順眼。

弱者變強後被推倒

呢啲「仇權」嘅現象，漸漸發展成為主流媒體打壓邊個，大家就支持邊個。最佳例子有吳業坤。喺無綫台慶扮棋之後，坤哥機會接踵而來，大家捧到佢成為叱咤我最喜愛男歌手。主流媒體甚至係佢自己嘅「娘家」無綫都順住民意，畀多咗工作機會佢，地位提升。坤哥其實冇變，變嘅係主流媒體對佢嘅關注度，然後某部份觀眾嘅「仇權」心態又湧出嚟，人人支持嘅坤哥開始變咗做「偽毒坤」。佢冧莊拎2016年度叱咤樂壇我最喜愛男歌手時，都應該確切感受到呢個轉變，所以先會話「多謝大家送佢一程」（坤哥從來都係最識得玩真亦假時假亦真）。

惡性循環人氣難持續

「被打壓嘅弱勢者得到大眾認同」>「大眾認同後主流媒體開始認同」>「大眾唔認同主流媒體」>「大眾開始離棄之前被打壓嘅弱者」係個無間惡毒循環，令到部分歌手嘅受觀迎程度好似跳樓機咁，由谷底直升喺高峰停一停，然後好快又返到谷底。歌手受歡迎程度唔夠持久，唔能夠有效咁儲到一班支持者，畀你紅歌都紅唔到人，又何來培養到全城認同、可以呼風喚雨叱咤樂壇嘅巨星？

唔buy大台 要自己觀察了解

或者你會話，有實力就一定得到人欣賞。呢個童話寓言只係叫你要努力，但得唔得到人欣賞係要靠天時地利人和。十幾年前，畀個歌手得到一首好歌，唱片公司全力配合，又得到主流媒體認同力推，佢仲可以有機會成為天皇巨聲。十幾年後，因為「反大台」嘅心態，歌手有幸集齊埋以上三個條件，都難以撼動一班已經拒絕喺主流媒體接收訊息嘅人。我想強調一樣嘢，主流媒體影響力日漸衰落，個人話語權日增，唔可以用二元分法話係好事定壞事。但對於一班因為大台公信力下降等等原因而唔buy大台，但又唔自己去關注樂壇，每年只係睇吓啲頒獎禮就跳出嚟話香港樂壇已死嘅人，佢哋係極度不負責任。

香港樂壇未死，只係化整為零，新一代歌手影響力無以往咁勁係不爭嘅事實，但係有好多音樂人繼續努力緊都係事實嚟。有唔少DJ、樂壇前輩、音樂人都講過：

香港樂壇如果死，都係畀啲人講死。

希望你同我都唔係呢啲人。

（本文純屬作者意見，不代表香港01立場。）