以今日嘅標準嚟講 邊個唔係「廢青」?

撰文:張秀賢
出版:更新:

「廢青」呢個詞語,其實真係唔知點樣嚟。
我試過 Google,「廢青」應該由 2010 年開始有人講。
去到 2014 年左右就大行其道,用嚟廣泛地形容而家香港嘅一班後生仔。

(網絡截圖)

特徵一籮籮 逢「青」都係「廢」

根據《香港網絡大典》嘅定義,「廢青」係指頹廢、不務正業、一事無成嘅年輕人。之前有位網上插畫家 MR LLH 就畫咗張圖,列出左「廢青十大特質」:

一.窮
二.諗起第二日要返工返學就想死
三.只想去旅行(80% 想去泡菜國)
四.手機不離手,Whatsapp秒回
五.經常 hea 父母「得啦得啦」
六.淘寶多過行街
七.煲劇(TVB 膠劇都話好睇)
八.成日呻眼瞓
九.間房亂到爆(同啲衫一齊瞓)
十.放假冇嘢做都要 hea 到凌晨兩三點先瞓

如果按邵家臻喺《時代廢青》一書嘅定義,「廢青」原本指人人得而誅之、自甘墮落嘅失敗者,後來俾高登仔借用成自嘲嘅詞語,甚至攻擊他人嘅用詞。後來更引伸出「廢中」、「廢老」等詞彙,沒有誰比更高尚,總之大家都係廢。

(紅出版(圓桌文化)網站)

當然,「廢青」通常都係貶低同指摘香港班後生仔居多。

如果要講「廢青」,每個時代嘅青年,喺上一代眼中都會有啲廢,先會有「一代不如一代」呢個講法。每個年代嘅上一輩,總係會覺得下一輩懶啲、冇咁醒目、冇料、冇耐性、話極唔聽、成日搞事、冇主見(下刪五千字)……所以逢「青」都係「廢」,逢「廢」都係「青」。

其實根據當下對「廢青」嘅定義,全世界由古到今,應該都有上百億人躺着也中槍。

以下 3 位 係廢青嘅極品

睇書睇報紙嗰時呢,我見到 3 個「廢青」人辦,可以同大家分享下,佢地按今日「廢青」嘅標準嚟講,應該係「廢青」之中嘅 XO。

事例一:
頭半世人都跟住屋企漂泊,搵到落腳點之後,不務正業,專心耕田,其他老闆想搵佢返工都唔肯,結果有個傻老闆喺佢 27 歲嘅時候拜訪佢 3 次,先肯返工。

事例二:
10 歲玩音樂,細個唔係好讀書。18 歲就 quit U,又吸毒又周圍玩,大個搞生意發達之後衰左舖,就俾人踢出局。

事例三:
細個好聰明,但成日搞事,群埋啲官二代,又拜入去高官啲屋企入面,做官唔識睇人眉頭眼額,又得罪啲高官,搞到仕途唔多順暢。

以今日「廢青」嘅標準嚟講,事例一嘅人會畀人覺得不思進取、大牌、好食懶飛;事例二就會覺得佢有不良嗜好、不務正業、唔努力讀書;事例三係典型嘅搞事分子,唔識撈、懶醒。

其實,上面三個人分別係諸葛亮、Steve Jobs 同曹操。

曹操與諸葛亮,煮酒論「廢青」。(Wikimedia)

每個時代嘅後生仔,都會畀人覺得好唔掂,但呢種唔掂嘅感覺,又有幾多係親身體驗返嚟?又有幾多係直覺或者道聽途說呢?「廢青」呢個詞彙嘅出現同追捧,其實係因為上一代人懶,鍾意一竹篙打一船人所致。唔通我地呢代人,又會話唔識用 smartphone、冇 Facebook嘅上一代,係「廢中」、「廢老」?

「廢青」呢個詞語背後,其實反映有人唔識將心比己,只係用一己偏見評論他人所致。呢種世代矛盾幾時完?冇人知,除非全社會都學識少啲標籤,多啲將心比己啦。

(本文純屬作者意見,不代表香港01立場。)