從《我至叻》看港豬是怎樣煉成的

《中英聯合聲明》1984年簽訂。當時已有大量流行曲反映香港人嘅不安同懷疑，對自我身分嘅困惑……但去到之後幾年，香港人心又變咗。移民嘅移民，走唔到嘅留低，就開始接受現實，苦中作樂，甚至自欺欺人，扮睇唔到，明日愁來明日當。呢個年代，先係我最想講嘅年代。

篇幅關係，今次唔寫小故事，下次繼續。

直入正題，講時代曲，先講時代再講曲。固然我可以寫阿媽蒸魚之類嘅個人經歷，但今次選擇唔寫對自己特別嘅歌，而係寫大家都有共鳴嘅歌，講到濫嘅，嗯，「集體回憶」。

每個人都覺得自己嘅年代最獨特，我都唔例外。但客觀事實係，三張尾嘅我，見證咗香港流行音樂登上頂峰，然後開到荼蘼盛極轉衰。而在呢個譚詠麟惡鬥張國榮，夾Band成風，以及四大天王嘅時代，最重要嘅事，冇得講，一定係香港前途問題，中英談判，八九六四，以及九七回歸。

寫呢篇文，希望借流行曲，話畀新一代聽，呢個大時代，香港嘅精神面貌（Zeitgeist是也），係咩回事。

反映港人不安與困惑的那些歌

 《中英聯合聲明》1984年簽訂。當時已有大量流行曲反映香港人嘅不安同懷疑，對自我身分嘅困惑，以及擔心香港氣數已盡，就咁玩完。例如達明一派1987年嘅《今夜星光燦爛》：

燈光裏飛馳　失意的孩子</br> 請看一眼這個光輝都市</br> 再奔馳　心裏猜疑</br> 恐怕這個璀璨都市　光輝到此

達明一派翌年仲有一首《今天應該很高興》講移民潮：

偉業獨自在美洲　很多新打算</br> 瑪莉現活在澳洲　天天溫暖

呢首而家仲有不少人講，舊年港產片《哪一天我們會飛》都有提到。

然後1989年，大家都知了，六四。相關嘅歌更多，1989年夏韶聲嘅《媽媽我沒有做錯》：

媽媽我沒有過錯</br> 一起繼續我與你</br> 不死的勇氣

達明一派嘅《天問》：

縱怨天　天不容問</br> 歎眾生　生不容問

滄海遺珠係同年聖誕黃霑主唱嘅《慈祥鵬過聖誕》：

慈祥鵬過聖誕</br> 問我要啲乜嘢玩</br> 我說畀個Passport我

最流行嘅係1992年Beyond嘅《長城》：

圍着老去的國度</br> 圍着事實的真相</br> 圍着浩瀚的歲月</br> 圍着慾望與理想

多得支聯會年年搞維園晚會，好多年輕人都識呢堆歌。

但更有趣嘅係之後嘅事，唔想濫用「斯德哥爾摩症候群」，但去到之後幾年，香港人心又變咗。移民嘅移民，走唔到嘅留低，就開始接受現實，苦中作樂，甚至自欺欺人，扮睇唔到，明日愁來明日當。呢個年代，先係我最想講嘅年代。

移民不成　只能接受現實的一代

1991年，羅大佑嘅《皇后大道東》唱到街知巷聞，亦見證香港人已經接受現實，以戲謔嘅態度去應對：

到了那日同慶　個個要鼓掌</br> 硬幣上那尊容　變烈士銅像

唔似上面提嘅歌咁多隱喻，林夕填嘅詞全不避忌，但已經係用嬉笑嘅心情，夜行人吹口哨壯膽，話畀自己聽，冇事嘅，唔使驚，換支旗啫。

於是，帶到去今日我最想講嘅嗰首歌，我心中嘅時代曲。係陳百祥阿叻嘅《我至叻》。Yeah～～我至叻～～大家跟住唱。絕對唔好低估呢首歌，我寫文時做實驗，問公司兩位90後助手，以上嗰堆歌，佢哋全部都唔識，頂多係「好似有啲印象」。但我一講《我至叻》，大家就識唱，跟住做埋手勢。Like it or not，呢啲就係集體回憶，文化遺產。

由我懂性以嚟，就冇掩飾過我對阿叻嘅厭惡，老豆帶我睇譚詠麟演唱會，到阿叻出場，我就話要去廁所。由中學作文講到而家寫博評，由ICQ鬧到WhatsApp。早幾年有認識阿叻嘅Private Banker出於好意，話我知其實阿叻真人點點點。不，呢個完全不重要，亦唔係我，或者大家要關心嘅嘢。

我最關心嘅，係阿叻，以及《我至叻》，背後代表嘅價值觀。而家成日有人懷緬當年good old days嘅香港精神，搵一個人代表，必定係阿叻，《我至叻》就係時代金曲。

喜歡與否　阿叻就是那個時代的代表

阿叻在媒體上，電影中，以及MV入面（係，記得睇埋《我至叻》個MV）表現嘅，都係咁上下嘅嘢：惡俗，浮誇，符碌，口不擇言，不可一世，反智，拜金，識少少扮代表。正面少少嘅係自信，相信命運在我手，敢作敢為，有成就（但主要都係錢）。個MV如果係大陸土豪？你一早掟爆電視。

阿叻就係賭片兩大主角互拋浪頭，側邊冷手執個熱煎堆拎Pair 8贏到最後嗰個。阿叻就係扮李嘉誠第3個仔李澤叻去泡林熙蕾嗰個。佢唔代表你？可能係。個個都咁講啦，邊有人認自己鍾意。但，佢代表嗰個時代。

請循其本，1995年，佢只憑呢隻歌，已經在紅館開7場演唱會，係史上最少歌嘅紀錄。而我提提你，嗰個年代，紅館開演唱會嘅唔係坤哥，係梅艷芳黎明陳慧嫻張學友。咩人入場睇？斷估唔係屋邨阿伯或新移民大媽。我好相信，當年堆觀眾，而家好多係企業入面嘅高層，或者係拎住10個8個單位，一億幾千萬身家，full pay一層樓畀個仔做中學畢業禮物嘅嗰班人，所謂的英殖港產精英。

睇下《我至叻》嘅歌詞，反映係乜？係「靈活易適應　勤力手快又眼明　識睇時勢兼淡定　買屋買車仲有錢剩」嘅香港smartass精神；係「閒閒地識講中英　起樓起橋快夾精　鬼佬睇到都眼擎擎」嘅自信／自大；係「你話香港地最好　打工的好似做大佬　股票金融確係寶　連街邊的阿嬸都膽粗粗」嘅投機貪財紙醉金迷；係「將有會有乜　有乜唔做得　如果怕九七　實搲到頭髮都甩　上面咁多金掘　怕你手軟唔去執」嘅樂觀。

公平講句，《我至叻》年代嘅阿叻，仲未係睇唔起後生仔，佢一樣講「後生仔多新意零食有Taste　衣着配搭夠Sense」，不過我估正常人唔會忍到兩分鐘聽到呢段。而《我至叻》仲係一首廣東話歌詞填得好好嘅「本土」之作，對，填詞作曲嘅係區瑞強。民歌王子，笠住頂帽抱結他同你講陌上歸人嘅區瑞強，你嘅童年被毀未？

阿叻冇變過　變嘅只係香港人

唔服？個別例子？咁我講多首歌。早少少，但一樣值得討論，就係歌神，許冠傑嘅《話知你97》，1990年嘅歌。許冠傑嘅地位形象，遠比阿叻為好，但《話知你97》表達嘅心態，同《我至叻》其實相當相似。

許冠傑呢位香港之子，講嘅係「我話知你97　其實使乜驚到求神又拜佛」嘅盲目安心；係「已經預冇法走得甩（又冇Short Cut）　移民外國　亦係聽糟質」嘅無奈；係「咪匿响屋企　速速Call機　Call班知己　睇返齣無厘頭攪笑戲　卡拉OK　隊樽拔蘭地　High High地　高聲亂唱　再去旺角打機」嘅消費主義；係「明日懶鬼理　最緊要依家Happy　話知佢死」嘅今朝有酒今朝醉；係「斷估或者到咗97（實刮多筆）　人人暴發　My friend good luck」嘅金錢至上。 你睇呢一切一切，其實同《我至叻》，唔係好大分別，頂多係少咗浮誇惡俗。前途？政治？下一代？歌神冇提過啵。嗱，至少「我至叻」都仲講「示威投訴任你噏　唔係犯法點都得　基本法去昅一昅　肯定唔會俾人屈」。

返到而家呢刻，將來係點我唔知，講真我亦懶理，唔想理。但歷史唔容我哋否認。香港人當然可以覺醒，但唔好忘記你嘅歷史，甚至係你嘅共業。唔好以為回歸之前香港啲中產點咁高風亮節關心政治。嗰個年代講「放認關爭」、「認中關社」嘅，係死左仔，國粹派，係入唔到洋行做大班的。我港大同系師兄梁錦松就由國粹派變做美資Banker，然後做官娶埋國寶，又一英殖smartass（絕無不敬）的典範。

知道過去，就明白現在。今日個個講「港豬」，港豬點嚟嘅，睇完呢篇文聽完呢堆歌你應該知。當年嘅香港人，全無遠見，搵錢至上，大大咁高估咗自己嘅影響力（大陸要跟我哋學嘢），亦遠遠低估咗中國經濟政治軍事外交嘅崛起，以為最後係人哋跟你嗰套。

阿叻冇變過，變嘅只係香港人。而當年捧佢上神枱嘅，一樣係香港人，嗰班畀人話係英殖年代有品味嘅香港人。

（文章純屬作者意見，不代表香港01立場。）