習俗你個頭　聖誕我梗係食中餐

平安夜聖誕點解唔食西餐？ 因為唔抵。咪又係嗰啲嘢，分分鐘比平時仲差。但斬你一頸血，仲要逼你食佢指定嘅餐 ，仲有時限時間，仲要同隔離枱個男仔坐到極近，連佢之後去邊度「闢室談心」都知。實在影響胃口（同埋少不免會望下個女仔）。

眾所周知，2月13日係「小三節」，原因你懂的。留意下朋友同事另一半當天行程，或者搵垃圾桶睇下信用卡嗰日有乜簽帳，買過乜貴嘢， 應該可以踢爆唔少姦情，目賭不少殘酷真相，同埋釀成唔少血案。

情人節買花貴幾倍仲要提早買，餐廳又貴又難食份量又少仲要趕住交枱，酒店又貴又爆連時鐘都要排長龍，全部都係常識。我一路想做個研究，統計下2月13日嘅情況又點，係咪高級餐廳都會難訂過平日，酒店又貴啲，甚至機票都難買啲。

點解諗起呢啲？寫呢篇文時正係12月23 日，我懷疑好快會成為另一個小三節。頭先講嘅，都係浪漫西餐，酒店「闢室談心」， 同埋送禮物，去旅行。情人節呢個pattern放落平安夜聖誕，一樣得。 對，香港地，聖誕節，同情人節最相似。農曆年就冇人食完盤菜然後聽住「熱烈地彈琴熱彈地唱」或「恭喜恭喜恭喜你丫」去「闢室談心」的。

聖誕節純屬消費主義的勝利

西餐，酒店，送禮物，去旅行，就係香港節日四部曲。好合理，亦唔好太虛偽。你睇下香港人點過情人節點過聖誕，就知講咩香港悲慘世界慘過非洲，或者話香港人普遍嚴重underpaid嘅，真係人唔笑狗都吠。當然有人好窮，但唔係你個網友。

香港絕大多數人過聖誕同宗教無關。香港有聖誕假放，當然同英殖背景有關。但反正中國台灣日本韓國星馬泰都係咁過聖誕，只係人哋冇假放咁解。由此可見，聖誕節同殖唔殖民都未必好大關係，開心聖誕節無遠弗屆係因為鬼佬文化強勢，再加埋過去幾十年嘅全球化。30年前我聖誕比人夾上大陸（呢啲就真係悲慘世界啦），在廣洲都唔係好覺有乜聖誕氣氛，同而家兩個世界。

同樣地，當今聖誕節文化明顯係消費主義嘅勝利。舊年我在韓國過聖誕，一樣好有氣氛，而韓國從未被鬼佬殖民。相反幾年前我在古巴過聖誕，就真係完全唔覺有乜氣氛，但古巴人明明仲要講西班牙文。一句到尾，錢先係重點，文化企埋一邊。 當年在古巴酒店都冇間，要談心落樓下公園啦。

香港就直頭青出於藍， 我曾經在英國同鬼佬家庭過十分傳統嘅英式聖誕，平安夜朝早就坐火車去，佢哋全家就同埋我去百貨公司買啲十鎊冷衫呀咁。點解？因為聖誕正日絕大多數舖頭都唔開門，犯法的，仲要火車都冇得你坐。平安夜返到佢間3,000呎大屋（列斯Leeds附近，唔會貴），你估聖誕大餐食乜？係外賣印度咖喱，我係客人，獲得最貴嘅咖喱羊飯一份。而香港就大把人就食過千銀嘅自助餐，有咖喱都冇人食。「衰仔！食咖喱回唔到本呀！跟阿哥去夾龍蝦啦！」

當然，我既然會飛去韓國古巴過聖誕，斷估我都唔係左膠，斷估我都唔會周兆祥上身，批評咩消費主義呀碳排放呀之類。用住部iPhone7去批評消費主義，我真係做唔出。

今年英國脫歐同特朗普當選，無數人都講過係全球化走到盡頭，鐘擺要去返另一邊，我都同意。但好奇怪嘅係，「反全球化」嘅，固然排外，反移民反自由貿易，甚至狂鬧政客銀行家之類。佢哋聲稱呢啲大愛左膠禍國殃民（希拉里呀華爾街銀行家都「左膠」？真係笑咗），但冇幾多個係走去「反消費主義」。即係我反企業霸權但我照用iPhone，我反迪士尼但我照入場睇《星球大戰》睇《奇異博士》，到底係左定右呢？真係龍門任你搬。

其實我在小事上好執着，但大事上就選擇if you cannot beat them，join them。左膠右膠死晒，消費主義都未死。消費主義是個好東西，讓我們消費至死。左中右都鍾意， 藍絲黃絲本土派都like。在我城最重要唔止係過得好，仲係要過得比別人好。而家有埋Facebook Instagram就更好，唔只要消費，最緊要係畀人睇到。消費就如法治， 「Not only must 消費 be done; it must also be seen to be done.」

逆向思維　聖誕梗係食中餐

「普世歡騰」聽落好大愛，但在香港，聖誕節的確係比較配得起呢個詞嘅節日。特別係多得左膠當道，唔少人（包括我以前打工嘅馬來西亞公司）連Christmas都唔用，只用Happy Holiday。連宗教都唔分，聖誕節真係人人可以快樂。有拖拍嘅固然可以做齊我講嘅浪漫西餐「闢室談心」送禮物去旅行四部曲，小朋友大可以陪爸爸媽媽，反之亦然。單身嘅一樣可以成班朋友一齊——我試過成班朋友去食齋添。

相對地， 情人節你成班姐妹去食飯講咩單身很好要自強唔使男人，總係畀人覺得此地無銀愈描愈黑。農曆年？小朋友就話貪利市錢，有家室嘅其實好憎派利市破財，青年人更加怕年年比人問搵到工未拍拖未結婚未死得未。相比之下，聖誕節真係最冇壓力啦。

頭先講話聖誕節食齋。我唔係素食者，甚至連Green Monday都冇，但聖誕節食齋係一個幾好嘅選擇。唔係咩反思社會之類，而係，幾時我都講逆向思維contrarian。 鬼節梗係去開刀，買六合彩當然買大冧把，而聖誕節，千萬唔好食西餐——除非你自己煮。不過記得12點好去買嘢食。等放工先去？我有年平安夜大餐煮到聖誕先有得食，女友食到發火，堅拒洗碗。

【李聲揚：台灣農曆七月避開刀？其實鬼節做手術存活率仲高】

平安夜聖誕點解唔食西餐？ 因為唔抵。咪又係嗰啲嘢，分分鐘比平時仲差。但斬你一頸血，仲要逼你食佢指定嘅餐 ，仲有時限時間，仲要同隔離枱個男仔坐到極近，連佢之後去邊度「闢室談心」都知。實在影響胃口（同埋少不免會望下個女仔）。

況且，歷史就由你改寫，所謂嘅「習俗」，比你想像中更加脆弱。日本人聖誕節食KFC炸雞呢個習俗夠晒匪夷所思，唔好話鬼佬，連香港人都好難理解。台灣人中秋節走去烤肉亦都夠晒神奇。唔係去沙灘去郊野公園去燒烤樂園喎，係就咁在舖頭門口烤喎！今年中秋我在台北，就見好多地方一站式服務，連炭連爐連嘢食一次賣比你。習俗嘅嘢，好多時都係商家順手推出嚟啫，未必有咩文化背景嘅。況且，呢度係香港，一街都寫 X'mas而唔係Xmas，習乜鬼嘢俗吖。

祝大家精明消費，聖誕快樂。

（文章純屬作者意見，不代表香港01立場。）