職場新人要面對的事

撰文:詩寧
出版:更新:

一月了,新年新開始,返緊新工嘅你習慣未?有無比人恰?其實轉工真係需要好大勇氣,除咗重新學過啲嘢,仲要重新埋堆先最攰。無論你岩岩畢業/剛轉新工/準備轉工,只要你曾經做過新人,對以下情節應該唔會陌生。

轉新工,新開始,但適應期間,總有啲無可避免嘅小麻煩。(istock)

  小小死貓,放開懷抱吞咗佢

有新人入職,舊人會多咗嘢做/遲咗放工,因為要撥時間出嚟教新人,通常頭兩日都會好畀心機教,但耐性到咗第三日就會減少,因為佢老闆都開始問佢點解啲嘢仲未交到。的確,又要教人又要做本身做緊嘅嘢,時間有限,真係除非佢有八隻手。

為放工,只好縮短「補習」時間,情急之下就會「教啲唔教啲」,例如同事A叫你放工出封email畀所有高層,報返當日公司營業額。

你:「邊啲先算係高層?」

(唔好以為條問題好低能,真係間間公司唔同,有啲大公司好多高層,高到唔會露面,你返得幾日工,唔識唔出奇)

同事A:「你可以睇呢張tel list,隔離有個E 字果啲就係。」(佢隨手就隊咗張list畀你) 

你好細心咁搵齊人名,然後send!三秒之後你聽到同事B大叫:

「嘩!Peter話過唔好再send畀佢㗎,邊個出呢封email?」

你舉手,全部人望住你。

同事B:「邊個教你㗎?無人同你講唔好send畀Peter咩?佢上次發晒脾氣話唔夠數果日唔好再send營業額畀佢呀…哎呀大獲喇….」
同事A:「吓!你send埋畀Peter呀?哎呀…唔係咁架…等我幫你回收封email。」

(佢怕你篤佢出嚟,所以搶閘「幫」你)

大家繼續望住你,呢個位你都無得講啲咩,come on James,吞咗佢。

小小死貓,吞咗佢唔緊要,最緊要留力將來做大事。(李澤彤攝)

  同事們爭住畀你「學嘢」,學完個task從此歸你

有新人入職,是眾同事期待已久的事,離職同事剩低啲蘇洲屎,終於可以分返出嚟啦!所以你一入職,大家都會爭住教你嘢,因為你一學識咗,以後就可以叫你做,甚至將件事永久屬於你。

如果你fresh grad就無得好講,你反抗機率近乎零。如果已有幾年經驗,就要醒少少,唔好人講咩你就做咩,要識分幾時/邊個講嘢必須聽入耳,邊個講嘢要過濾甚至當係耳邊風。唔好做成「人人都可以點你」嘅局面,開壞咗個頭,啲task分咗比你,你唔識避,就以後都屬於你。

istock

  埋堆但不靠是非做人情

Lunch成班同事食飯,少不免會講吓「公事」,好快你會知道枱頭放滿植物個同事花名叫「花王」,成日掛住淋花唔做嘢;仲有「A字膊」、「發電廠」等等的人物。但佢地講得,唔等於你都講得,是非傳得好快,儘管你只係答咀:「係囉,我都覺。」你就會比人quote:「新同事返咗三日工咋,都話覺得發電廠成日痴埋Peter度呀。」

想埋堆,用其他途徑啦,例如留意吓同事枱頭擺設、觀察吓大家鐘意啲咩,用來打開健康的話題匣子。減肥、零食、卡通、電影、旅遊,最無死。

入職適應期好重要,同事覺得你做唔做得嘢、個人易唔易恰,都係睇呢段時間。加油!

如果你都有職場奇聞/疑問,歡迎去我facebook留言分享。

(文章純屬作者意見,不代表香港01立場。)
你可能感興趣