【職場警訊】你係咪職場觀音兵？

能夠愛上自己的工作，是很幸福的。日日對住自己喜愛嘅事，仲有糧出，的確係夫復何求，但無論幾深愛，都記得時刻保持理性，否則好易變成「錯愛」，甚至被人利用你對工作／公司的這份情誼來將你打造成最佳奴隸，又名職場觀音兵。

  話升又唔升

阿強係一個好簡單、偏愛穩定嘅人，佢讀書時就好清楚自己鐘意設計，畢業亦好好彩入到行內知名嘅設計公司，入職時得$10,000人工，佢家人、朋友甚至佢自己都覺得難得搵到自己熱愛嘅工作同公司，就唔好計較咁多，努力做儲經驗，人工嘅嘢，過多兩年再算。

兩年後，阿強人工加到$11,550，因為第一年老闆話阿強好乖好肯學，加佢10%，算係大幅。老闆仲同阿強講，其他同事平均只係加5%，公司睇好佢先加咁多，叫佢好好做；而第二年，阿強就同其他同事一樣被加5%人工。每日朝九晚九，佢望見自己份糧連萬二蚊都無，開始動搖於「理想」同「搵食」之間。係呀，好多人鼓勵佢話，第時出咗名可以搵10萬一個月，所以佢繼續好熱愛公司。

第三年，阿強見到啲做銀行、售貨員嘅同學都開始搵緊$20,000一個月，仲開始升做senior，佢自問勤力又成日得到上司、客戶讚賞，但就係……窮。窮到連女仔都唔敢追。個心理掙扎唔多講喇，總之有日佢終於鼓起勇氣辭職，老闆留佢，讚到佢天上有地下無，絕對係最佳員工！又話公司正計劃開新team，打算升佢去管條新team，但升職都要人事部批，同埋都要諗吓點同其他同事交代，所以要啲時間，應承加佢雞碎咁多人工，叫佢留低，公司真係唔想失去一個咁不可多得嘅人才。

  實際無權無下屬

升係升，到咗第四年，公司終於升阿強做senior啦！說好的新team呢？就只有阿強，同一個下屬，因為「經濟唔好啦、阿強咁勁已經可以一打七啦、同埋公司體諒阿強，驚太多下屬反而會阻礙佢工作同進步，希望一步步咁行，後生仔唔好急功近利嘛……」老闆係咁同阿強講嘅。

有邊個唔鐘意比人讚？老闆十幾頂高帽戴落阿強度，而且阿強都係一個踏實嘅人，認同無人可以一步登天，成功需苦幹，所以佢升完職更進一步變成朝九晚十一，奉獻所有時間、生命、熱情比公司，以回報老闆知遇之恩。

  第五年，阿強真的辭職了

愛情嚟講，如果唔keep，係好易隨時日流逝，濃情轉淡，員工對公司嘅信任同熱情都一樣，你呃完佢一次又一次，真係當人傻㗎咩。好畀心機咁做咗五年，阿強終於有兩萬蚊人工，但佢決定唔再留低，真的死心了，因為後生仔都已經變得唔再後生，總要面對成家立室或者其他現實生活問題，而且長期付出感情而回報過低，覺得不受尊重、心淡了。呢五年，公司每次有高級少少嘅人離職，例如經理走，都唔係喺公司升人上去，而係喺出面請人返嚟頂，阿強看在眼內都越來越不安。用返愛情做比喻，你估做兵好過癮咩？仆心仆命為娘娘，娘娘只係得閒send張自拍相比你，仲同你講唔好心急，慢慢了解吓先，兵仔總有一日會知咩事吧？

正所謂官字兩個口，老闆就三個口，如果有人見工嗰陣話：

「我想喺呢間公司學嘢。」

老闆會同佢講：

「呢度唔係學校，公司出糧畀你係做嘢唔係學嘢。」

但請咗你之後呢？老闆又會同你講：

「後生仔，唔好計較咁多，做多啲當學嘢。」

到你辭職，老闆就話：

「你咁快走好可惜，不如咁，你有咩想試、想學？我地慢慢傾。」

其實，學咩吖，你份糧出大啲就OK。返工，講金定講心？雙向的。

如果有任何職場奇聞/疑問，歡迎去我Facebook Page，大家一齊交流傾下。

（文章純屬作者意見，不代表香港01立場。）