年宵侵權產品何其多，咩「香港人好尊重文化創意」，算吧啦！
正所謂「逃避雖可恥但有用」，逃避現實係好大嘅市場，有人選擇睇韓劇，有人選擇入戲院睇超級英雄片。
我近年就愛上去行年宵市場，年宵市場實在係一個現實扭曲力場，入面嘅物品同邏輯，令我覺得自己去咗北面嗰個國家。唔使有回鄉證都番到大陸，爽。
今年我去維園年宵市場，打卡寫「一年一度香港知識產權展覽」，相當多人like。年宵市場就係一個倒影，一年一度咁為我哋示範，香港人幾咁有創意幾咁尊重知識產權——不過多數係反面教材。
年宵市場最多人幫襯嘅，就係小食，同埋所謂「創意貨品」。先講小食，多得韓風興起，只要求其在韓國搵啲乜鬼「隱世小店」抄橋，將人哋已經out哂嘅劣食拎嚟當潮物咁賣，再加上紫薯芝士兩大春藥，賣貴幾倍，本小利大，「其實唔難」。創意就冇乜啦，但至少應該唔係侵權。紫薯芝士拉絲都有專利？
最精彩嘅，梗係眾多年青人檔口，中學生大學生都有。我見得最多嘅，就係一大堆淘寶貨山寨貨。直接淘寶嘅有，自己拎上去搵廠做嘅又有，改少少當自己創作都有。視乎嗰期興乜，今年見得最多就係梳乎蛋，同埋Pokemon嘅卡比獸。如何分辦假貨我唔係專家，唔敢一口咬定。但有常識嘅都知，你在年宵市場見到啲出名嘅公仔，十居其九都係老翻。
小巴字體之類，有冇人有版權專利或係「原創者」，可能仲有得拗。印句歌詞都侵權，好多人都覺得有啲苛刻。但你見啲攬攬熊勞蘇呀，ZOOKEEPER呀，Qoo公仔呀，百分之百係有問題。咁都仲有得拗？
係咪「犯法」，我都唔敢一口咬定。既然佢哋可以日日賣，有啲仲要食髓知味，上年賺過一大筆，咁明顯係有灰色地帶，或者執法唔易。迪士尼咁大間公司嚟掃你場拉人封艇咩，陣間又話關公災難以大欺小，見你賣幾日咪算，當益乞兒。但搞清楚，唔係冇犯法或冇人執法就冇問題嘅。
年青人嘅抗辯理由，千奇百趣，可惜都冇乜創意，同大陸山寨廠嘅答案差不多。
典型嘅包括有：
「係二次創作」（閣下創作咗乜？雪碧變咗雲碧就二次創作？）懷住尊敬嘅心去宣傳（問下原創者感唔感受到你嘅尊敬？）「冇用Zookeeper名義，官方原版只係2D公仔的構思，依家呢個公仔要自己畫圖、度size、上大陸整」（不過人地講明你係侵權。）「因為成條街大家都係咁樣」（我至愛呢個）
我幾肯定，同一班人，平時會同你講咩尊重原創。亦係同一班人平時會恥笑大陸嘅「奧利奧」（Oreo）變做「粵利粵」，不屑山寨，鄙視Wechat，周六福都比人笑係周大福同六福結婚生嘅雜種。但到自己做，把尺梗係唔同。
在年宵市場呢個現實扭曲力場，貨係山寨嘅，連邏輯都係山寨嘅。HK is not China？你入去行一次就明白咩係中港融合。都唔好講啲貨係大陸廠做，仲要入到去你見大把簡體字產品。但平時口說抵制嘅一樣照買照賣。
賣老翻嘅年青人，當然係為錢啦，唔通為夢想？千萬唔好信咩新一代唔追求物質。賣完老翻除低塊卡比獸獸皮，又可以番屋企做鍵盤戰士講保衞香港文化。不過好肯定嘅係，現實扭曲力場，就唔止係年宵市場一年一次，亦唔係年青人專利。
幾多人話香港產業單一，食金融地產老本，應該要學日本韓國搞文創講軟實力。但請循其本，香港人有幾多創意？又或者，有幾時尊重過人哋嘅創作？唔好只講年青人，香港人同未開化嘅土人差不多，由三歲小朋友到八十歲阿伯，都冇尊重過咩知識產權。
證據？大把。早排先有丸久小山園抹茶「香港店」，比人踼爆根本冇官方授權經營，業者當然大玩語言偽術。最可悲嘅係，仲要係比五十步笑百步嘅台灣人踼爆，我覺得好樣衰之餘，又不禁驚歎真係兩岸三地一擔擔，不用分那麼細。
比台灣人踼爆抄日本抹茶店都未夠cheap？沒有最樣衰，只有更樣衰。去過台北嘅，冇食過都應該聽過馬辣火鍋。舊年我仲以為開到嚟香港，在荃灣有分店。結果？又係完全唔關事嘅，店員一樣支吾以對。我認為港式邊爐獨步天下，但香港人要拎台灣嘅平價連鎖邊爐叨光，知唔知醜字點寫？
只係飲食業係咁？大錯特錯。「老夫子」作者王澤年初過身，本來人都死咗，但王澤抄襲朋弟嘅證據太明顯，又唔似而家啲年青人咁醒識整做立體，結果大家在佢過身後都少不免會講下呢件事。
本來，金無足赤人無完人，況且人都死咗，你可以點？在情在理冇理由拎王澤嚟鬧。但，可能真係我哋嘅「本地」飛機打得太大，收唔到科，接受唔到原來香港經典漫畫係抄大陸嘅。我見好多文化創作人，好多傳媒，走去幫王澤護航。當中嘅邏輯，同年宵市場班小朋友差不多。
有話王澤係有參考朋弟，但後來加入咗本土元素——大陸山寨品牌邊間唔係加入本土元素？山寨iPhone可以一機幾張SIM卡添。
亦有話王澤將老夫子發揚光大，唔係佢嘅抄襲，朋弟嘅老夫子邊可能得以傳世——呢個邏輯即係話抄得青出於藍受歡迎就冇所謂。正如好多人以為手機遊戲2048先係原創，走去鬧番Threes嘅開發者係老翻。果然有強權冇公理，只要上到位，黑都可以變白。你班文化人第時比大陸人抄你啲作品時，記住同自己咁講呀。唔係人哋抄你啲嘢會有十萬萬同胞睇到？快啲感恩。
仲有一個講法係「年代唔同」，「明朝嘅劍斬清朝嘅官咩」。對，王澤成長嘅年代，的確冇乜咩版權意識呢回事，「人人都係咁抄」。之但係，而家唔係清朝啦下話？但王澤由頭到尾都冇認過呢樣野，佢兒子甚至仲堅持係大家抹黑佢老豆。
去一次年宵市場，比你感受到，咩「香港人好尊重文化創意」，真係算吧啦。入到年宵市場就係文化租界，最鄙視大陸人嘅，買賣佢地最鄙視嘅貨，然後用佢地最鄙視嘅邏輯辯解。
公道自在人心，把口就硬，但我相信侵權嗰班人，一樣知自己做緊乜。可能係反正人人都係咁，反正唔會比人捉到，反正有錢賺。罪惡就係咁樣上身的。
對，創意創意，話咁易咩。「你咁叻你整丫」。問題係，真係冇人迫你去侵權的。冇料到嘅，過主啦，唔好講到自己冇賺人錢咁喎。唔好忘記仲係有一班年青人賣自己創作嘅嘢。就算水準唔高，年年重覆，只搞爛gag，冇乜街外人買都好——至少人地係做緊自己創作，面向群眾，成功失敗等市場去決定，唔係用「二次創作」嚟做遮醜布公然賣老翻搵快錢仲唔敢認。
（文章純屬作者意見，不代表香港01立場。）