【有樓有高潮.博評】香港地,邊個唔係樓市專家?

撰文:李聲揚
出版:更新:
香港地,邊個唔係樓市專家?講起股票我會聽到好多人話「股票嘅嘢我唔係好識……」 (之後再講唔停就後話),但我冇乜聽過有人話「樓市嘅嘢我唔識」,睇好睇淡都好,個個都好有睇法,揸磚頭最穩陣,買樓正傻仔。每個香港人血液入面,都有樓市專家嘅DNA。
李聲揚
聽到「高潮女」偉論後,第一反應係:有2000呎嘅男人,使 X care你有冇高潮咩。(資料圖片)

股評人曹仁超作古差不多一年,最多人回帶就係「唔好畀500呎綁住青春」。無數咁多年青人都拎呢句嘢勉勵自己,人生唔係追求財富,唔應該買物業做樓奴云云。

呢個年代果然個個標題黨,居然冇人走去睇返原本段訪問。唔緊要,咩年代了,有片有真相,請睇片(冇耐性的,直接skip去 3:20):

睇清楚,曹仁超唔係叫你唔好買樓,而係「當匪要當最大的」,志願要大少少,「成條街同我掃晒佢」。夠反高潮未?

節目成功在於捉到港人之痛

就講下高潮,曹先生果然有先見之明。500呎?少年你太年輕,家陣聽講冇2000呎都冇高潮,得500呎?高潮有冇得四分一個?燒臘鋪例牌燒鵝咩。聽到「高潮女」偉論後,第一反應係:有2000呎嘅男人,使 X care你有冇高潮咩。你冇,第二條女有。條條女都冇?男屋主都唔使 care,自己有咪得。

岑應啲嘢,再講再鬧真係多餘,佢就驚死你唔鬧。好似睇 AV 嘅 Fake taxi、Fake Casting 之類,話就話冇劇本,你唔係信下話?一堆度過嘅金句,加埋一班想成名嘅人,加埋香港人又要鬧又要睇嘅心理。真係 Fool me twice shame on me,唔該,唔好再share,唔好寫文討論,Don't make stupid people famous。(對,我都講緊,但唔係本文重點)。

點鬧都好,岑應嘅節目係成功嘅。佢最叻係捉到港人之痛。例如今次講樓, 真係九成以上香港人嘅心中之痛。 香港人對磚頭嘅迷戀,絶對係我城核心價值。 講起沙士,除咗向醫護致敬外,好多人諗起嘅係 「幾時嚟多次沙士? 我一定訓身買淘大呀」。董建華任內畀人鬧得最勁嘅, 始終係八萬五同埋沙士,即係樓同埋樓。報紙講兇案,特別係自殺,一家N口一鑊熟嗰啲,最尾梗會話你知單位業主幾錢買入,持貨幾耐,升值幾多。租嘅?網友會話「業主先慘過死呀」。

買份報紙或雜誌打開睇下。浮誇嘅本地樓盤廣告多?未算重點。重點係,你仲見到大量英國、美國、加拿大、日本、泰國、馬來西亞嘅樓盤廣告。香港地悲慘世界?對,好多人好水深火熱,但唔係你班網友。而正係因為香港貧富懸殊稱霸全球,咁可以想像到,唔水深火熱嗰班人幾咁有錢。 呢啲廣告就係針對佢地。 至於話「新一代唔追求物質唔做樓奴?」。Come on James,係不為定不能先?有幾球嘢做首期但唔買樓嘅,就有資格講啦。

小弟參加過好多投資講座,聽眾同講者都做過。我發現無論任何場合都好, 一講樓,大家先投入,六七十歲嘅阿嬸都有高潮,好過任何春藥。邊位股神講乜都好,總有人問返佢樓市點睇。而只要有施永青、湯文亮等等樓市專家在場,佢哋嘅掌聲一定最多,聽眾亦最留心。

岑應主理節目幾乎每次都引起網民批評。(東星娛樂)

點解香港人咁迷戀買樓?​

但其實聽眾唔使咁謙。教你做個實驗,今晚食飯同朋友同事屋企人講下樓市。香港地,邊個唔係樓市專家?講起股票我會聽到好多人話「股票嘅嘢我唔係好識……」 (之後再講唔停就後話),但我冇乜聽過有人話「樓市嘅嘢我唔識」,睇好睇淡都好,個個都好有睇法,揸磚頭最穩陣,買樓正傻仔。每個香港人血液入面,都有樓市專家嘅DNA。

個個講就叻,香港地,有邊個真係炒/投資股票致富呢?你數下?數到邊個?可能有人炒到第一桶金,但之後都多數係買樓。香港地一方面曾經行行出狀元,但最後亦殊途同歸,買樓買樓再買樓。藝人名成利就必然係買樓,你睇八卦雜誌都會列晒佢地嘅物業,十層八層樓收租,最新嘅係見到阿Bob林盛斌10層樓,然後話自己只係收租唔係炒家。Beyond黃家強衣食無憂都多得買樓買寫字樓收租。

其他行業呢? 香港「創業先鋒」,眾籌界名人「咖啡兄弟」嘅哥哥一樣去買層二千幾萬嘅天賦海灣。正派啲嘅又如何?添好運點心師傅強哥(培哥個拍檔),買完牛池灣峻弦再買三個將軍澳天晉單位。你睇傳媒嘅名人理財心得,由Ben Sir到莊太量都話畀你知,「其實唔難」,都係買樓買樓再買樓,嫌貴就買埋外國樓。馬榮成都唔係靠畫漫畫變上等人啦,係靠買山頂豪宅。

點解香港人咁迷戀買樓? 因為經驗,因為個個都係咁。識哲學或睇咗《三人行》嘅你會同我講羅素雞,九十九鋪開大下鋪可以開細,隻雞食咗九十九日嘢第一百日畀人拎咗去食。但大把人識睇淡,但幾多個賺到錢?唔好以為睇完《沽注一擲》(The Big Short)就做先知,人哋一樣幾千萬本先開到頭。

買樓致富實在太簡單,有啲包拗頸嘅人就唔信呢套,例如本文作者。 結果樓市大熱之時,每年團年我都畀我老母在眾多親友面前恥笑一次:「一早叫你買樓啦,你啲分析員識條鐵」。對,佢仿似就係「專家?食屎啦!」嗰位天水圍霸氣師奶。(對,我老母都係住嘉湖山莊的。)

(蘋果動新聞截圖)

點解香港得贏在射精前冇得射火箭?

買樓收租搏升值咁成功,咁會點?最大問題都唔係年青人冇屋住——畢竟年青人唔係瞓緊街嘛對不?係買唔到樓,但唔緊要,老豆百年歸老層樓咪你咯,你老豆又唔會好似鬼佬咁捐身家做慈善。冇地方扑嘢?高潮女都話要2000呎之嘛,冇話你老豆唔可以在隔離房喎。黃子華話齋,「叫細佬出廳瞓,咁上格床咪剩係得番你同我囉。」

依家一街個個講夢想,但搞唔掂就鬧地產霸權貴租。我倒覺得,貴租搞死你產業都唔係主因,地產搵錢太易先係問題。何洪記雲吞麵銅鑼灣個鋪,1億賣咗畀人,自己計下要賣幾多年麵先賺到。你係老闆或佢屋企人,寧願收1億定繼續淥麵畀你班「食家」指手劃腳?

世界係咪一定要搵到第一桶金去買樓買鋪?香港可能係,其他地方唔係。台灣導演魏德聖,依家個個讚佢叻,但佢當初一樣借錢開戲,按埋層樓,同大住肚嘅老婆鬧大交,去拍《海角七號》。咁就算癲?未算。最癲係,《海角七號》叫好叫座,佢名成利就。然後點?係咪在信義區買十個單位? 唔係,佢係將賺到嘅錢再借大十倍,去拍《賽德克巴萊》。呢條友堅係癲的,但豪傑也許本瘋子嘛,香港人個個smart ass,唔會咁做咯。

依家街邊阿叔都識講 Tesla 電動車,但 Iron Man 真人版嘅 Elon Musk 點發跡?佢其實係 PayPal 大股東,2002年 eBay 買起 PayPal, 佢賺咗10億港紙。佢係咪走去掃返十間八間豪宅收租過世?結果,佢將得到嘅錢,搞多三間公司,就係 Tesla、射火箭嘅Space X,同埋太陽能發電嘅 Solar City。

所以點解香港得贏在射精前冇得射火箭?點解好似樣樣都唔似樣?因為,人人都迷戀地產,過去地產搵錢咁易,使乜諗其他嘢呢?

最諷刺係乜?咁好諗頭嘅岑應,果然係自己冇樓嘅(當佢冇講大話先)。如果佢一開始有2000呎樓,有冇高潮我唔知,但照計應該冇咁好創意了。

(本文純屬作者意見,不代表香港01立場。)
你可能感興趣