【香港藝術節．來稿】做個專業嘅觀眾吖，唔該！
香港成日自詡國際大都會，又極力發展藝術，但觀眾質素實在有待改善。究竟有無人諗過劇場有劇場嘅規矩，香港觀眾有冇被教育過睇表演嘅禮儀？
文：日青
本地年度文化盛事，香港藝術節已經靜靜雞喺 2 月中開始咗。藝術節嚟到第 45 屆，受歡迎或者出名嘅節目，飛一早就畀一眾文化愛好者搶購一空。眼見香港文化發展日漸蓬勃，的確係幾欣喜，不過，作為喺表演場地工作嘅職員，見到香港觀眾喺音樂廳／劇場嘅行為真係不敢恭維，有時真係好想問：可唔可以注意下睇表演時嘅禮儀，做個專業而且有質素嘅觀眾呢？
唔講大陸觀眾，以為本地觀眾一定高質啲？Sorry 唔係囉。香港觀眾最常見嘅失禮行為多如恆河沙數，可以話由開場前柒到完場。自問好有文化修養無失禮人？睇吓有冇做過以下行為先講啦！
遲開場係人情，準時開場係道理
大部分觀眾都會早半個鐘甚至一個鐘等入場，但早到唔代表可以早入場，幾時可以畀人入場，前線場地工作人只可以聽後台指示。表演者未準備好、工作人員仲做緊技術調整等，都會影響放觀眾入場嘅時間。話晒都係現場表演，你估㩒個制就可以 on show 咩！其實絕大部分入場時間都係表演開始前嘅 15 分鐘，理得你早幾多嚟，總之未準備好就點都唔會放人入去坐，呢個時候追問職員幾時入得都無用，不如拎定張飛，睇吓一陣入場轉左定右好過啦。
企定定等當然好，但有好多香港人真係無咩時間觀念，幾個月前買飛時已經知道邊日幾點開場都可以遲到。遲到唔係問題，miss 咗啲咩內容係閣下嘅事，但遲到就要付出遲到嘅代價——要喺適當時間先落到位。有啲主辦機構容許觀眾喺場內等候，但唔代表全部都有同樣安排。所謂各處鄉村各處例，有啲嚴謹啲嘅主辦團體講到明遲到場都唔畀入，要到中場休息先入得去，投訴都無用。唔想入唔到場，唔該準時。其實好多藝團都知香港人睇 show 成日遲到，所以都唔會 exactly 嗰個時間開場，有幾分鐘時間走盞，咁都仲要遲過遲開場時間先到，好明顯係閣下嘅責任啦，咁大個人做錯嘅仲大大聲問做咩唔畀入場，醜唔醜呀？
好忙咩？閂電話啦！
拎住張飛成功入場睇表演，實在唔明白點解有啲觀眾使咗幾百蚊買張現場表演嘅飛，點解唔好好哋專心欣賞表演者嘅演出，硬係要拎個電話出嚟㩒？話劇表演都仲好啲，因為要追劇情所以少啲人玩電話，但某啲音樂會、戲曲節目嗰啲，總有幾個觀眾會喺節目進行期間拎部電話出嚟 check message。有時快睇一下都算，但有啲觀眾會不斷上 Facebook，甚至玩手機遊戲！話就話已經較咗靜音模式，但個 mon 咁光，喺咁黑嘅環境真係好礙眼，勁騷擾！影響到其他觀眾睇表演嘅投入程度不在話下，甚至會影響到台上表演者嘅演出情緒。諗吓無啦啦見到有條友塊面勁光好似撞鬼咁，你都咪話唔驚，而且實在太唔尊重人喇。況且我哋見到你用電話，一定會衝落去阻止，然後又騷擾到坐路口位嘅觀眾。
其實每個節目開始前都會有廣播要求觀眾「關掉手提電話」，我哋亦一定會口講多一次「唔該閂電話」，點解仲要明知故犯，拎部電話出嚟？如果有急事要處理，唔該離場，唔趕嘅話就唔好睇住啦！買得飛都係想睇 show，拎得免費飛入場都係想入場支持朋友，放低個電話專心睇節目啦施主。
場內攝錄其實係犯法
另一個不知所謂嘅行為就係影相！大佬你唔係睇緊演唱會，係睇緊音樂會呀，可唔可以唔好係又影唔係又影，又或者明知唔畀都要偷偷哋影呢？你以為睇音樂會好有文化好有修養？偷影相呢個行為已經出賣咗你，同埋，係刑事罪行。唔好以為唔舉高就以為我哋見唔到有人影相，大部分表演場地都係向下斜，工作人員企喺高位，觀眾做咩都睇得清清楚楚，莫講話演出期間唔准影相，即使係開場前同謝幕其實都唔畀影！簡單嚟講就係入場後就要收埋電話或相機。其實大部分主辦都要嚴打攝影，如果你見到身旁有觀眾偷影，溫馨提示吓佢啦，千祈唔好同流合烏！如果主辦畀影相，你覺得我哋仲會咁得閒行嚟行去捉影相咩！
Again，每個節目開始前都會有廣播話畀觀眾聽「嚴禁攝影、錄音或錄影」。而根據《防止盜用版權條例》，所有表演場地門外都一定會有個牌，白紙黑字寫明：
任何人未得管理人的明示同意，不得在電影院、劇院或音樂廳攜有或藏有攝錄器材。
最高刑罰︰
初犯——港幣 $5,000
再犯——港幣 $50,000及監禁 3 個月
而當中「任何攝錄器材」係包括具備攝錄功能嘅手提電話。有時真係好想問究竟你哋係咪聾，或者文盲？（唔識字都識睇圖呀！）
呢度唔係戲院，係劇院
記得曾經見過有觀眾誇張到喺音樂廳邊睇節目邊食花生，仲大大聲話：
「戲院都食得嘢啦！」
好，你啱，戲院的確食得嘢，但呢度係音樂廳／劇院呀！音樂廳／劇院係唔畀食嘢㗎，理得你係睇現場表演定睇電影吖（唔好問點解唔食得，問得呢句不如問點解唔可以周街屙屎）。
之後又會有人話：
「好肚餓呀唔畀食嘢想餓死我呀？」
好想強調，唔係唔畀你食，係唔畀你喺場內飲食！既然會餓死咁大件事，仲睇咩 show 吖，不如快快趣去醫肚啦。
其實除咗膠樽裝水外，場內真係嚴－禁－飲－食－！唔好再偷食喇，其實摷袋聲比你想像中大，基本上 staff 一定聽到。仲有，實在唔明點解要邊睇邊討論表演內容，喺戲院都唔應該咁做啦係唔係呀？要討論，可以留返中場或散場。同樣，要唱歌可以留返啖氣散場慢慢唱，唔好隨睇隨唱啦，好影響其他觀眾囉。
香港成日自詡國際大都會，又極力發展藝術，但觀眾質素實在有待改善。究竟有無人諗過劇場有劇場嘅規矩，香港觀眾有冇被教育過睇表演嘅禮儀？其實一個專業嘅觀眾真係好易做，演出進行時靜靜哋、唔好用電話或任何發光裝置、千祈唔好影相（主辦批准除外）。尊重台上表演者、尊重後台嘅工作人員、尊重吓其他觀眾、尊重吓自己。如果咁都做唔到，我強烈建議你不如慳返唔好睇，話晒啲飛最平都要幾嚿水。
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）