台灣遊客眼中的香港美食:點解同我哋心水差咁遠?

撰文:李聲揚
出版:更新:
遊客其實係咩一回事?其實就係冇嗰樣整嗰樣,隔離飯香。你覺得台灣人嚟香港食許留山匪夷所思,台灣人一樣好難理解你排隊去食阿宗麵線然後幾十蚊港紙飲杯春水堂,日本人一樣好難理解你去到日本都仲要食一蘭仲要打卡影相。
李聲揚
早前有台灣旅遊網站公布台灣遊客喜歡的香港美食Top20。(視覺中國)

作為一個偽文青,我屋企有二三十本Lonely Planet,朋友上嚟都會見到。但新朋友最留意到嘅,唔係古巴或瓦努阿圖,而係我有本Hong Kong and Macau嘅Lonely Planet。唔係自用,亦唔係送禮——而係我想知在遊客心中香港係點,佢哋鍾意乜,覺得香港有乜好睇,結果往往係有驚喜。

就好似早排有台灣旅遊網站,選香港最正食店TOP 20,出嚟嘅結果真係震驚幾百萬人:

第20位 澳門茶餐廳 第10位 北角雞蛋仔
第19位 檀島咖啡 第9位 澳洲牛奶公司 
第18位 再興燒臘 第8位 興記煲仔飯
第17位 金華冰室 第7位 翠華茶餐廳
第16位 義順牛奶公司 第6位 泰昌餅家
第15位 何洪記粥麵專家 第5位 許留山
第14位 蓮香樓 第4位 滿記甜品
第13位 避風塘炒蟹 第3位 蘭芳園
第12位 九記牛腩 第2位 鏞記燒鵝
第11位 生記粥品牛腩 第1位 添好運

 

講明先:

1. 我唔係食家,以下只係我相當主觀嘅意見。
2. 但作為「無飯家庭」嘅成員,我長期出街食飯,呢20間餐廳我全部食過。
3. 而我因工作因私事,呢幾年成日去台灣,一年十幾廿次,甚至而家幫台灣公司打工,接觸不少台灣人。

以上就係我要申報嘅。申報完話你知,我都O晒嘴。但我絶對唔會質疑呢個選舉嘅結果,因為我嘅台灣朋友嚟香港旅行一樣必去澳牛再興。由社交網絡上嘅討論睇嚟,唔止係我O晒嘴,大把香港人覺得十分奇怪。唔敢講出口嘅一句就係:台灣人唔係食慣好嘢嘅咩?

品味各有不同,我在港島返工多年。由朝朝去檀島食早餐,變到而家貼錢我都唔會食(講真的)。有人唔同意我,話外賣蛋撻或咖啡之類都仲OK,咁可能係我問題。但有幾間,例如澳門茶餐廳許留山或者翠華,可能都仲會食,我都會(我情人節先食完翠華)。但叫香港人選TOP20,應該好難入榜下話?(澳牛再興就會有人揀嘅)

愈惡愈有人鍾意 全因隔離飯香

更有趣嘅係,好唔好食都仲可以幾主觀,但服務招呼相對地冇咁多爭議。我見到嘅係,呢20間餐廳,有幾間嘅服務都真係惡名昭彰。開名都唔怕喎,嗰幾間餐廳好自豪的。你去睇下九記潘生嘅訪問,就知點解早排有客食到同佢打交,絶不意外。

本來即係一個願打一個願捱,又唔關我呢啲花生友事。反正本人已經唔再去九記,倒唔係因為態度惡劣,而係太多人排隊。香港人自細食澳牛食再興就習以為常。但,我最奇怪嘅係,台灣人平時接觸開咁好禮貌嘅同胞,反而走嚟香港鍾意畀人「另類招呼」?果然香港餐廳係marketing of de-marketing,愈惡愈有人鍾意。唔怪得《格雷》可以拍咁多集,乖乖女學生都要沉迷SM畀人打。

遊客其實係咩一回事?其實就係冇嗰樣整嗰樣,隔離飯香。唔只係台灣遊客,係全世界都係咁。《大丈夫》入面詹瑞文飾演嘅網吧經理「巴治奧」講得好,「喺香港我哋貼日本妹,喺日本人哋就貼張柏芝」。呢啲就係隔離飯香,滿足遊客嘅異色(exotic)想像——雖然我冇見過有人在日本貼張柏芝。你覺得台灣人嚟香港食許留山匪夷所思,台灣人一樣好難理解你排隊去食阿宗麵線然後幾十蚊港紙飲杯春水堂,日本人一樣好難理解你去到日本都仲要食一蘭仲要打卡影相。

《大丈夫》電影擷圖。(作者提供)

的確,遊客就係咁嘅一回事。我哋覺得好平常,但鬼佬嚟香港鍾意睇廟街,因為佢哋冇咁嘅嘢。日本人勁迷九龍城寨,甚至迷到出咗隻叫做《九龍風水傳》嘅Game,但李小龍在《猛龍過江》就覺得羅馬鬥獸場冇乜好睇,「城寨都大把爛屋啦」。日本人亦都迷尖沙嘴銅鑼灣嘅「鳳樓」。點解?唔止因為鹹濕,而係因為日本好少有啲咁雜亂嘅地方。我哋香港人去到其他地方鍾意小鎮,鍾意鄉郊,鍾意陽光海灘。但我舊公司的東南亞同事完全不能理解,覺得佢哋屋企日日都對住呢啲啦,佢嚟到香港梗係去商場Shopping睇摩天大樓。

延伸讀去仲可以講好多,唔止係遊客,好多時外國人對香港嘅喜好我哋好難理解。成龍當年紅遍日韓大把女影迷甚至女明星獻身,大家略有所聞,但知唔知元彪在日本一樣紅到發紫?而家香港新一代都未必知邊個元彪。「古惑仔」演陳浩南嘅鄭伊健在香港都幾紅,但在台灣更加誇張——二十尾至到三十尾嘅台灣女仔,好似個個都好鍾意佢。女士一樣,好多鬼佬眼中嘅「東方美人」,我哋都好難認同。除咗隔離飯香,亦有因為真係品味不同。

被遊客「異化」的餐廳

不過餐廳同明星有樣嘢好唔同。明星未必會好大轉變,頂多可能恃寵生驕(但講真大家都未必會近距離接觸),或者好似宇宙GEM咁畀人話只去討好內地歌迷。但餐廳唔同,遊客的確可以「異化」一個地方嘅景點,商鋪,特別係餐廳。

唔止我,我諗好多人以前鍾意食檀島同九記。做乜而家唔食?唔多唔少係因為畀遊客異化咗。有啲人可能係因為意識形態,遊客店(特別係大陸遊客)去嘅我就唔去,我要發掘(雜誌登晒廣告嘅)「隱世小店」。亦未必係去到咁上綱上線,可能純粹因為有啲餐廳唔憂做就欺客,呼呼喝喝嘅有,食老本不思進取嘅有,討好遊客口味嘅有,不停加價嘅又有。甚至有時根本店主都有心做但真係太多客搞到拖低質素又有。

今次台灣人心中嘅TOP20,其實大家討論完都係一笑置之——因為都真係好多香港人唔會點再去,而反正香港冇嘢多就係餐廳多。不過不妨去諗下,點解香港人心中嘅TOP20,同遊客心中咁大分別?係咪每個地方都係咁?又有冇啲舖頭係香港人同遊客都唱好?

但我就是遊客呀。(視覺中國)

點解香港人去到台北一定要食阿宗麵線同鴨肉扁?點解春水堂咁多人排?真係咁好食?定係旅遊書推介?定係人去我又去?我估都係後者居多。我第一次去台北,叫朋友同我去春水堂,佢話「那是遊客才去的」。我答「但我就是遊客呀」。其實就係咁簡單。下次去任何地方任何人質疑你做啲嘢「做乜咁遊客」,記住,拎住本閃閃書不停打卡upload相嘅你就係遊客嘛,唔通係探險家征服者?

(文章純屬作者意見,不代表香港01立場。)
你可能感興趣