MIRROR演唱會|鏡粉年齡層闊 媽咪級姜糖不透露使費:驚老公睇到

撰文:葉詩
出版:更新:

人氣男團MIRROR周四(6日)起假九展Star Hall舉行一連6場演唱會,開騷前數小時九展各層已聚集數百粉絲,氣氛熱烈之餘場面亦十分墟冚。MIRROR粉絲年齡層十分廣,有媽媽帶着小朋友到場,也有不少穿着校服裙的妹妹,其中有一對分別13和10歲的小姐妹,姐姐Chloe喜歡Edan(呂爵安)的「搞笑及真性情,最緊要係靚仔」,妹妹Hailey則欣賞Ian(陳卓賢)「有才華、識唱歌、又識作詞好叻仔」,雖然未能買到演唱會飛,仍在爸爸陪同下到場領取應援物:「搶飛嘅時候好激烈都入唔到個網站,網上有好多黃牛但我哋都冇買,始終危險,今日嚟感受氣氛已經開心!」

一對小姐妹13歲的Chloe和10歲的Hailey分別喜歡Edan(呂爵安)和Ian(陳卓賢)。(葉志明攝)

現場亦有不少媽媽粉絲與子女一起到場,還有喜歡Anson Kong(江𤒹生)的媽媽帶着喜歡AL的囡囡Eunice到場,Eunice亦大讚AL靚仔兼跳舞好叻,喜歡MIRROR並非受媽媽影響,而是自己也很喜歡《男排女將》。而喜歡姜濤和Anson Lo(盧瀚霆/AL)的阿珊帶着喜歡Ian的囝囝Issac到場,囝囝更大讚Ian靚仔;阿珊則透露在《全民造星》時期已喜歡二子,更曾參與當時的拉票活動,今次演唱會在朋友幫助下昨天才艱難地撲到飛,至於使費她就指不方便透露:「我驚老公睇到!錢嗰啲唔可以畀佢知要秘密!佢會話我咁大個仲走嚟追星,不過呢排老公見到MIRROR咁有成績都冇講咁多。」Issac童言無忌指媽媽常常會帶他一起追星:「唔係唔想見Ian哥哥,不過我想喺屋企抖。」

有媽媽粉絲同囝囝囡囡一齊追星。(葉志明攝)
MIRROR開騷前數小時九展各層已聚集數百粉絲。(葉志明攝)
+9