同理繼續傾|吳雨贊同TVB外闖搵新星 憶親自發掘郭藹明參選港姐

撰文:洪曉璇
出版:更新:

TVB大股東黎瑞剛早前接受訪問,批評直指TVB全面老化迷失咗十年。喺娛槳圈打滾逾40年嘅吳雨,呢日接受馬浚偉港台清談節目《同理.繼續傾》訪問時,認同TVB應該要衝出市場,憶述當年自己做港姐時就係衝出香港:「就搵到郭藹明,我都引以為傲呀。」

吳雨呢日接受馬浚偉港台清談節目《同理.繼續傾》訪問。(港台官網)

71歲嘅吳雨,縱橫歌影視各界多年,係唔少紅星幕後推手,對於近年外畀覺得無晒明星,佢就話:「依家娛樂圈好慘,斷層好利害,80年代第一梯隊走,第二梯隊即刻可以上,依家唔好話23456,第一都唔係一線。當然呢啲有因有果,市場轉變,要培訓新血。以前啲星真係星,喺我年代即係邵氏時,嗰時嘅明星係蕭芳芳、林黛、樂蒂……佢哋冇整容喎,但個個眼大大,臉尖尖,係真明星嚟。依家真係去韓國都唔知點揀,個個一樣,只能講以前好難見到明星,依家時代唔同咗,拉近左好多。」

71歲嘅吳雨,縱橫歌影視各界多年,係唔少紅星幕後推手。(資料圖片)

馬浚偉問及吳雨,點睇依家香港電視業發展,佢就話:「SHOW MUST GO ON,黎瑞剛講得啱,無綫係要衝出去,但衝出去唔係話文化衝出去,而係巿場發展衝出去。今日嘅大灣區都係講廣東話,廣東省成6千幾萬人口,點解冇一個似樣嘅藝人同歌手走出嚟?好啲嗰個張敬軒都嚟咗香港,點解我哋唔可以去幫佢哋發掘明星出嚟?」

吳雨認為廣東省6千多萬人口,除咗張敬軒,應該可以發掘更多人才。(大會照片)

佢又提起當年搞港姐,亦因為衝出去先發掘到新星:「港姐都係,女仔大唔切呀,中五畢業甚至大學生啲英文都唔得,點解當年我搞港姐要去海外搵呢,我自己飛去溫哥華LA揀添,我覺得咁多留學生,去搵啲都好呀,第一屆就搵到郭藹明,我都引以為傲呀,唔衝出去點會做到嘢呢。」郭藹明當年成為1991年三料港姐被喻為「才貌雙全的冠軍級港姐」,自此港姐亦有到外地海選嘅傳統。

+15