型男廚神黎諾懿自嘲未夠班做李家鼎接班人：佢啲懷舊菜色實在太勁
撰文：吳子生
出版：更新：
型男廚神黎諾懿今日（29/9）現身中環為《麥當勞叔叔之家》籌善款，親自下廚烹調出色香味俱全美菜式，成功俘虜在場善長人翁的味蕾。黎諾懿笑言：「其實本身我係一個藝人嚟，但好多人都以為我係一位廚師。不過上天俾咗一個技能我係有佢嘅原因，就好似係疫情呢啲期間，而我大部份嘅慈善活動都與煮嘢食有關，就好似今日咁，如果我唔識煮嘢食，我係幫唔到手。咁所以我係好希望能夠將呢份天賦才能，繼續再去幫多啲人。」
型男廚神黎諾懿自嘲未夠班做李家鼎接班人。（葉志明攝）
被問到做李家鼎接班人？黎諾懿笑言：「其實我真係冇諗過，因為阿鼎爺佢啲懷舊菜式實在太勁，我都係煮番啲新派菜式，尤其煮啲鼎爺佢唔識嘅菜式，費事到時大家對撼就唔好啦。」
黎諾懿今日為《麥當勞叔叔之家》慈善籌款。（葉志明攝）
黎諾懿今日為《麥當勞叔叔之家》慈善籌款兼大展廚藝。（葉志明攝）