就是青春專訪︱「炎明熹勁敵」洪韻騏月付五位數學唱歌:想贏冠軍

撰文:陳栢宇
出版:更新:

洪韻騏(Wincy),HOY TV選秀真人騷《就是青春》大熱參賽者,外界認定穩入終極決賽,未正式出道便已經為劇集《黑金風暴》錄製宣傳曲《透光》,更擁有聽落霸氣非常的稱號——「炎明熹勁敵」,但真正的她卻仍然是一名年僅19歲的「細路女」,對娛樂圈、樂壇充滿希冀和夢想。提到「炎明熹勁敵」這個「朵」,以及未出道先有歌帶給她壓力,洪韻騏日前接受《香港01》專訪便說:「壓力真係有,因為見到大家嘅期望,所以我都好想做好,但而家就唔重要啦,最重要都係專注做好自己嘅表演。(點睇炎明熹勁敵呢個名?)雖然我同佢都係跟同一個老師,但其實我同佢完全唔同,佢係比較講故仔,把聲比較柔和,我把聲就比較強硬、爆發型啲。」她又指自己曾經見過炎明熹,但太怕醜不敢找對方傾偈。

「我從來唔覺得自己贏硬,因為其他參賽者都好好,咁我梗係想自己係冠軍啦,但有進步先係最重要。」(陳順禎攝)

為什麼是參加《就是青春》?洪韻騏坦言一切是機緣巧合,她當時是參加歌唱學校的活動,碰巧《就是青春》團隊派人揀蟀:「所以咁啱就揀咗我,其實我冇諗過咁快參賽選秀節目,但又覺得呢個係一個好好嘅機會,唔想嘥咗,學校裏面得兩三個人揀咗出嚟,揀到我真係好開心。(冇報過《全民造星》同《聲夢傳奇》?)《聲夢2》有,有交到表,但係之後就冇消息。(咁唱得都唔揀?)嗰時初初學唱歌,冇咩自己風格同冇咁穩定。」眾所周知參加選秀節目荷包一定受重傷,原來Wincy也不例外:「瘦面啦,學唱歌,計埋晒所有嘢,應該用咗十萬以內啦。(屋企人畀?)梗係屋企人啦,我得19歲咋,屋企人好支持我,都知我呢個年紀要為自己鍾意做嘅嘢奮鬥下,雖然佢哋冇叫我回報,但我都想第日回報佢哋,喺呢行賺到錢。」

洪韻騏坦言樂壇不容許做歌手,她亦會繼續做音樂事業,例如做歌唱老師。(陳順禎攝)

提到節目初期,有不少網民直指洪韻騏「唱得難聽」,洪韻騏坦言曾為此感到傷心:「經過嗰次之後就冇咁情緒化,正評會聽,負評都會聽,慢慢嘗試掌握觀眾鍾意嘅類型同風格。(有啲評語真係好難聽!)其實我本身就冇咩感覺嘅,我點解喊係因為我唱歌老師喺我隔籬,然後我就忍唔住喇,因為覺得好對唔住佢哋!老師教得咁有心機,屋企人又畀咗咁多錢我去學。」上年才開始報班學唱歌的她又指自己雖然中學時有參加合唱團,亦有代表學校出外比賽,但仍然需要時間、練習去繼續精進自己的演繹:「之前真係唱得唔夠好,覺得樣樣嘢都可以做得更好,每次人哋覺得好,我都會覺得有好多瑕疵。(每月畀幾多錢學唱歌?)都要五位數字,因為要跟老師先可以喺短時間改善唔好嘅嘢,靠自己去改係冇咩可能。

洪韻騏曾因網民批評而忍不住爆喊。(電視畫面)
洪韻騏表現愈來愈穩定。(Instagram/@hwankeii)

談到夢想,現在香港知專設計學院攻讀音樂學作歌的洪韻騏便顯得非常雀躍:「我想自己作歌自己出歌,儲到好多歌之後就喺紅館開演唱會!」不少青春少艾都會把談戀愛視為夢想,可是她暫時決定把感情事放在一邊,談到過往感情經歷,她說:「Puppy love算唔算?(梗係算啦!幾時發生?)中三囉,唔知呀……有個男仔話鍾意我,跟住又覺得佢幾好,所以就一齊咗三、四個月。(做乜會分手?)我都唔知呀!好似係因為一啲好小學雞嘅嘢鬧交,跟住『算啦,唔好再一齊喇』,之後就冇咗喇。(之後就乜都冇發過?)一直單身!(搵個參賽者做男朋友?)大家都好專注個比較,唔諗呢啲嘢!哈哈!」

洪韻騏中學讀男女校,所以異性緣從來不弱:「但個個男仔都係當我妹妹囉,唉,好慘呀!」(陳順禎攝)
+1