獨家丨69歲李楓親談近況 入住老人院唔覺晚景淒涼:感恩三餐溫飽

撰文:程嵐風
出版:更新:

日前有連登仔開post「尋人」,以一張簡單的手繪圖尋找TVB一位甘草女演員,當時樓主形容:「把聲成隻鴨,有粒大粒墨喺嘴角,做開啲野蠻角色。」短短4分鐘,已有網民估中是69歲李楓,更有網民透露她的近況:「同我老竇同一間老人院,仲好精神,行得走得,一入門口就見到佢。」

有指李楓晚景淒涼,約10年前不幸發現腦部生水瘤要做手術,但因為付不起私家醫院費用就只能去公立醫院排期,等做手術的時候更一度痛到要爬地求醫。雖然手術成功,但卻留下健忘等後遺症。

《香港01》昨日(24日)聯絡上李楓,她頭腦清晰,聲線響亮,大方承認已入住老人院近一年,她說:「係,我喺一間之前嚟做過義工嘅老人院,呢度環境算唔錯,有分幾間房,有啲住床位,我算幾好彩,能夠分配到間房畀我,獨立一間自己嘅房,有私人空間,算好難得……講電話都唔怕畀人偷聽。」

對於被指晚年生活悲慘,李楓表示最壞日子已經過去,現在能有三餐溫飽,多次感謝上天眷顧。她說:「我唔覺境況淒涼,我覺得係感恩,有個地方你住仲想點?我識一啲朋友,臨終唔係咁開心,我都戚戚然,我希望自己唔係嗰隻。我嚟呢度住咗約一年,好感恩嘞,有個私人房、有三餐溫飽,真係好感恩!姑勿論佛祖耶穌,我都多謝個天,我唔敢怨天尤人,唔可以話甚麼豐衣足食,但起碼兩餐溫飽,好感恩。」

李楓大方承認已在老人院住了一年,感恩三餐溫飽。(網上圖片)
李楓曾接受陳圖安訪問,講述一生大起大落,兩度破產。(網上圖片)

李楓一生大起大落,年輕嫁給從事製衣生意的丈夫,育有一子一女;本做少奶,可惜丈夫生意失敗,她要賣掉嫁妝、珠寶為夫還債。其後丈夫又沉迷炒股輸錢,由居於九肚山豪宅淪落至住村屋,家裡更曾歷兩次破產。李楓曾在訪問中直認疏忽照顧子女,致關係疏離;直到兒子在婚禮上表達很愛媽媽,著李楓不要再自責,母子解開心結。

現在的李楓,選擇入住老人院,她慶幸年紀大有政府資助,兒子亦有分擔部份費用,她說:「最重要唔好煩到人,我係好介意煩人哋。」

談到健康情況,她表示「OK」。身為「御用惡奶奶」的李楓亦希望有機會復出拍劇,她說:「依家叫托賴,嗰啲艱難時刻,身體嘅疾病,我都盡自己嘅能力克服咗,之前好慘,腰傷咗,腳又跛咗,幾坎坷,又冇錢(苦笑),但都叫做艱難時刻都pass away,過咗去!唔係話咒自己,我唔係希望好長命,但生命無常,無得由自己講,隨天鍾意幾時攞咪幾時攞囉,十年前都唔畀我走,我咪繼續活下去。感恩仲有生命,仲有呼吸,如果可以嘅話我都希望可以做到少少嘢。」

李楓曾經因為腦水瘤要做手術,現已康復亦希望有機會復出拍劇。(網上圖片)

不過,老人院對院友出入有限制,離開院舍要事先申請,李楓解釋:「呢樣係最大嘅限制,自由度唔大,因老人院有佢哋規範,又唔可以怪佢哋話嚴,如果個個自由出入、自由落街,咁佢點管理?好多院友都會自己偷雞走落街,我好少做呢個動作,我住得呢度就要遵守佢哋規則。如需要出席一啲飲宴,或藝進同學會每年有function,或做慈善探訪,我都會事先申請獲批准。」

李楓不想被網民胡亂瘋傳一些負面新聞,揚言做人對得住天地良心,「姑勿論真與假、是與非,最重要自己所作所為對得住自己、天地良心就OK。我唔係話太介意,但如有惡意中傷就會好嬲。只求『問心無愧』四個字,咁就安樂活下去。」

+12

李楓近況如何?

《香港01》在24日聯絡上李楓,她頭腦清晰,聲線響亮,大方承認已入住老人院,更多訪問詳情請看

李楓的家庭是?

李楓一生大起大落,年輕嫁給從事製衣生意的丈夫,本做少奶,可惜...詳情請看