鍾柔美首主持向周奕瑋偷師 向海嵐對拍劇隨緣:最重要角色有發揮
由向海嵐(Anne)、周奕瑋(Jarvis)、黃嘉雯(Carmanney)、鍾柔美(Yumi)主持的首個寵物選秀真狗騷《超級毛特兒大賽》於今日(27日)舉辦行「12強見面會」,四位主持神秘嘉賓評判黃心美(Scarlett)等都帶著狗狗一起亮相活動,吸引大批粉絲到場等候,場面熱鬧。
節目自22日(星期一)播出後受到不少關注,Anne更表示自己每晚都有追看,不過Yumi就因自修未必日日可以看:「我會睇Replay,我好多好多嘢錯過了,因為我拍的時候有時要返學,我就未必可以來到睇佢哋或者去幫佢哋忙,所以都想睇返。」今次是Yumi首次擔任主持,而同場的Jarvis經驗老道,她亦學到不少:「我覺得做主持真係好犀利,因為我之前好怕講嘢,好細膽,我係唔敢講嘢,又成日都講錯嘢,轉數不夠快,通過今次的比賽,我向哥哥姐姐們都學了好多嘢,好欣賞佢哋,有啲kick住咗的位,佢哋都可以幫我哋接返,我會好努力向佢哋學習。」
作為愛狗一族,難得一次過與這麼多不同種類的狗狗接觸,Anne同Yumi都非常開心,但回到家中自己的狗狗卻呷醋:「其實每一次接觸完啲狗狗返去,牠就好似一隻緝毒犬咁樣搜身,如果佢識講嘢我相信佢會講『你做咩出去偷食?』但都開心,其實牠一路聞的時候一路擺尾,我諗其實佢都會覺得你出去搵咁多朋友仔點解唔帶埋我出去。」而Yumi雖然有七隻狗仔,但回到家中依然會被「搜身」:「返到屋企都係同佢(Anne)一樣,啲狗會搜身,同埋有一隻佢聞到會惡意咁『你去咗邊』咁。」
Anne的狗狗已經屬於「高齡」,多年來有不少難忘的事,但近年的一次經歷令她記憶深刻:「幾年前牠有一次被朋友狗仔咬親,啱啱牠受傷之後的兩日,我就要回內地工作,仲要疫情時候,自己又要在酒店隔離,日日不停喊,因為覺得點解自己冇保護好牠,受傷我又不在身邊,媽咪又send啲片畀我,牠真係喊,聽到啲聲好肉赤,後尾仲話要做手術,我直頭在酒店10日爆喊,一路就喺度自責。」這件事更搞到Anne有些心理陰影,擔心狗狗同其他狗仔玩時再發生相同的事。
最近Anne參與拍攝了多個TVB節目,談及拍劇問題,她坦言:「呢個隨緣,而家睇到有的劇集都會覺得質素好好,同埋題材都幾新鮮,如果有角色啱、故事啱,時間又配合到,我覺得都可以考慮,最重要角色有得發揮,就算可能是一個兩集出鏡的客串形式,但嗰個角色可以被人記得,呢啲我都會有興趣。」