鄧炳強向舊同袍發告別錄音：使命來得突然　當警員是一生最大成就

國務院今日（25日）公布，根據行政長官林鄭月娥提名和建議，國務院6月23日決定任命李家超為政務司司長。而警務處處長鄧炳強會任保安局局長、副處長蕭澤頤為警務處處長。
鄧炳強今日以保安局局長身份，向警隊同胞發道別錄音，指自己懷着萬般不捨離開工作34年的警隊，最大遺憾無法與同胞正式道別，但強調加入警隊是他一生中最大成就，「所有快樂、哀傷同埋榮譽，都係同警隊同在。」雖然他換了新使命，但仍會守護香港，一齊為明天更安全的香港奮鬥，相信新任處長會令香港繼續成為最安全城市之一。

鄧炳強的錄音長近3分鐘，他指「估唔到新嘅使命嚟得咁突然，要離開工作咗超過34年嘅地方工」，回望當日入學堂、加入O記、在槍林彈雨下工作、話別同期「無味神探」陳思褀先生，到有幸擔任處長，「所有快樂、哀傷同埋榮譽，都係同警隊同在。」

鄧指警隊工作可能會經歷生死，無人可預知下一秒，所以要把握時間實踐理想，無畏無懼守護城市和市民，「各位同事，我好自豪，因為我同你哋一樣選擇咗加入警隊，接受同一個挑戰，擁有同一個身份，享有同一樣嘅榮譽。」

鄧續稱：「我哋一齊着過防暴裝打暴動，一齊坐過巡邏車接call，一齊做過雜差去查案，一幕幕嘅畫面都成為昨日美好回憶，今日我換咗一個新使命，但仍然喺同一藍天下，一齊守護香港，一齊為明天更安全嘅香港奮鬥。」

最後，鄧指相信新任「一哥」蕭澤頤會帶領警隊再創高峯，令到香港繼續成為全世界上最安全城市之一。

鄧炳強向警隊同胞發錄音全文：

各位警隊同事，我係保安局局長鄧炳強，估唔到新嘅使命嚟得咁突然，要離開工作咗超過34年嘅地方，我懷住萬般嘅不捨，而最大嘅遺憾係唔能夠為大家作正式嘅道別，能夠加入警隊，同大家並肩作戰，係我呢一生最大嘅成就。

34年原來真係過得咁快，我仲記得第一日入學堂，同啲同期企喺閘集合，望住蔚藍嘅天空，對開展警務生涯充滿期盼。到後來如願以償加入O記，最後槍林彈雨嘅現場，到含淚話別我嘅同期「無味神探」陳思褀先生，再有幸擔任你哋嘅處長，一齊踏浪前行，我哋所有快樂、哀傷同埋榮譽，都係同警隊同在。

每一個警察的天職，都是要處理突發情況，而每一個更份所發生嘅嘢，都唔會完全相同，甚至會經歷生死，但我真係好享受做警察。我知道，無人可以預知到下一秒發生咩事，所以我哋更加要把握每一分每一秒去實踐自己嘅使命同理想。我哋唔知危險幾時出現，但係我知道一旦危險出現，我哋就會無畏無懼咁守護我哋嘅城市同埋市民，呢個係我哋3萬人嘅共同選擇，各位同事，我好自豪，因為我同你哋一樣選擇咗加入警隊，接受同一個挑戰，擁有同一個身份，享有同一樣嘅榮譽。

我哋一齊着過防暴裝打暴動，一齊坐過巡邏車接call，一齊做過雜差去查案，一幕幕嘅畫面都成為昨日美好回憶，今日我換咗一個新使命，但仍然喺同一藍天下，一齊守護香港，一齊為明天更安全嘅香港奮鬥。

我相信，警隊喺新任處長蕭sir嘅帶領之下，一定會再創高峯，令到香港繼續成為全世界上最安全城市之一，我喺度多謝大家過去對我嘅支持同埋包容，我祝大家身體健康，工作順利，多謝大家。