【德國生活誌】搵工第一步：投資上千元　影專業「求職照」

去市政大樓做登記嗰一日，德國藉的友好同事咁啱路過嚟睇吓我搞成點。

我話：「乜你哋出現唔講聲架？成棟樓咁大，你咁都搵到我。」

「登記得呢層，九成九都（傻仔咁）呆坐等候室㗎啦。」

係喎，小菲差啲唔記得德國人約人鍾意早成個星期約；如果當日諗起再即日約，對佢哋嚟講好似冇咩禮貌，所以佢哋似乎比較鍾意索性直接撞下見唔見到你。

「你有冇帶齊文件就真！」

小菲內心 OS：你知要帶啲乜咩，你都冇整過。不過小菲當然冇講出口，隨手翻一翻本 passport 打開 visa 嗰頁，順道呻下你哋啲德國證件相真係好難影。佢笑住話你呢啲相要出去影㗎咩，stop pulling my leg，喺街邊啲自動攝影機影咪得囉，求職相先難影啊！

What？唔通求職相都要影到你監犯兼放大塊 pizza 臉睇清楚你每寸細節？

咁麻煩架，明明德國周街都有自助攝影機影

先講返張德國簽證相，比起荷蘭、中國同英國要求要高好多。官方指出表情為中性、嘴唇閉合；頭髮同眼鏡唔遮眼當然就梗㗎啦，但下巴同髮線的大小亦要指定喺 32-36mm 之間。喂，張相都只不過係 35x45mm，咁亦即係話如果你塊臉好圓，唔好意思，出到嚟張相真係迫爆格仔。好多情況下小小唔合格都會彈返轉頭，所以頭髮最好全部梳起；最真實最樣衰你阿媽最認得你嗰個樣就啱喇。

柏林同慕尼黑周街都係 Fotoautomat，影張證件相可以去 Fotoautomat 自己搞掂？

唔好意思，平時喺景點裏面見到的 Fotoautomat 影出嚟都係高濃度的懷舊黑白照，for fun 就得。呢啲擺出嚟畀你玩的都曾經係真係用嚟影實用相的證件相機，只係隨年月被彩色新機取代。德國人無將佢地當係垃圾，仲畀個機會佢重見天日；放返佢出嚟畀你留住精采一刻。唔止遊客，真係有人德國人影架。

要影彩色實用款？你去返地鐵站吧啦。但既然地鐵站有得影，點解德國朋友會話難影呢又？

自信面具盛惠 HK$2,500？影張求職相平均要 HK$1,000 up？

德國友好同事騷一騷佢個 LinkedIn profile pic，明顯是特登上影樓，有專業態度有景深的認真製作。雖然有少少做作，但都不失帶出親切又誠懇的態度；小菲抬頭望吓真人，當然有落差，但唔係化妝前後嗰隻，係帶咗「自信面具」嗰隻。

香港人普遍未有咁認真對待「求職樣」。高薪厚職挖角又唔使靠你張相，初出茅廬嗰啲仲畀張學生相你就算。小菲之前喺香港，見過求職者的見工相都係證件相，木口木面居多；韓氣逼人亦有，上到嚟仲差啲唔認得。小菲好誠實咁話畀朋友知香港人求職相嘅質素，佢擺出一種驚訝到似六月飛霜的表情，耶穌都叫埋出黎咁話：

There is no second chance for a first impression.

求職相德文叫 Bewerbungsfoto。德國慣性求職都會放張靚仔靚女相，唔似得香港擺唔擺就隨心啦。德國人相當重視呢張相畀人的印象，愈重視，咪愈有市囉。有報導話 LinkedIn 調查過，最以求職相取人的是中國（38%），印度（33.7%）同香港（33%）；所以話香港人都真係要開始認真對待下自己個「求職樣」。

小菲後來非正式巡視過，唔同地方影的求職相都有些微上落，但都唔外乎 $1,000 港幣，買個安心。套餐通常都分三種，以價格同服務劃分，小菲將佢哋命名為「快餐」，「常餐」同「特餐」。以普通影樓為例：

  「快餐」都係基本嘢，入門要求，最平收費平均 70 歐元。整個過程規定你半個鐘頭搞掂，一共同你影 50 張。選擇困難？你唔使止意喇，30 分鐘包埋你揀相，揀唔到相就求其用一張啦。包埋執相，黑頭呀、暗瘡呀、暗啞肌膚通通執走。70 歐元你可以得到嘅係一張完美的求職照 jpg，返到屋企就可以換 Linkedin 喇。

  「常餐」收費平均 130 歐元。時間 double，玩足一小時，影夠 80 張。萬中無二比你揀中的兩張。除咗完美 jpg 仲加兩張 3R 實體照，一張顏色一張黑白，你可以好似小學雞畢業相咁買個相架鑲起佢。

  「特餐」就最豪華，收費 250 歐元。全程玩足 90 分鐘，影 90 張揀 4 張。

你的「求職樣」如何　你的求職也必如何

德國人通常都係畢業後開始搵工就準備影呢種 Bewerbungsfoto，會認真咁揀間合心水影樓。閒閒哋最平都港幣 700 蚊起標（已經係街邊價）；高級少少的影樓標價 250 歐元起跳。

揦脷？當然揦脷。但德國知道要回報自要付出，呢個係佢地搵工的投資；當個個都出去影時，你 attach 嗰張係傻仔無笑容的證件相；真係未見官先打三十大板。對比都係人之常情，話無都係呃你啦！Wise up！

影之前可以先同攝影師溝通下想要咩效果，唔係好似香港咁剩係溝通下要咩色底。限定時間入面你更可以換衫換佈景，到時搵咩工想用邊張咩景都有幾手準備。攝影師會比動作上建議你，亦都會喺你打扮的的衣飾上加下意見。

通常大多數最好睇最舒服的結果都係側身，3/4 臉、微點頭配微笑；想架勢啲可以撟埋雙手，呢啲全部都係德國基本標準。收費貴少少的會包埋化妝整頭，一張專業又有親和力助你升官發財的「自信面具」盛惠 HK$2,500？基本嘢濕濕碎啦！

（文章純屬作者意見，不代表香港01立場。）