【德國生活誌.博評】Paternoster——德國人誓保唔使等嘅怪獸𨋢

撰文:
最後更新日期:

唔使等𨋢真係冇得彈!實不相瞞嘅係小菲第一眼見到呢個畫面,真係要消化兩秒先知呢部係𨋢。

落地後的清晨小菲出發去政府部門做登記,因為冇得網上預約,德國小妞 M 已經同我講好早啲去有著數,遲去等都唔要緊,當日限額做完要再去就麻煩。小妞 M 同小菲講佢地六點就開門,起身就好過去喇。What?六點?開門未㗎,政府機構喎,唔搭正大門都未開啦。點知六點幾去到大樓下面,自動玻璃門已經打開咗,上到去推門,裏面已經有幾十人,好似輪街症咁。小菲就係喺未瞓醒嘅情況下見到呢個畫面,當下由於冇人用緊,以為係運送貨物專用,好似餐廳上下幾層嘅傳菜專用𨋢咁。後來因為要「輪街症」,捽下對眼睇清楚個世界,先知道原來真係畀人用㗎!

呢部怪獸𨋢叫做 paternoster,呢種唔駛等嘅𨋢真係好鬼方便,跳入去即上即落,慳返好多時間。(Wikipedia)

以為係新科技咩?舊到人有呀!

可能係 sci-fi 睇得太多,小菲當時真係以為係新設計。後來要 wikipedia 一下,先知道原來呢部怪獸𨋢叫做 paternoster,早係 1868 年就已經有紀錄,20 世紀開初開始流行,因為呢種唔駛等嘅𨋢真係好鬼方便,跳入去即上即落,慳返好多時間。Wiki 話 paternoster 喺歐洲出現率多過原產地英國添呀!不過由於安全問題,好多地方已經唔再使用。上上落落夾親手手腳腳都好常見,2012 年嘅時候就有個 81 歲嘅老翁喺荷蘭海牙被 paternoster 殺死咗。

2017 年年頭的時候統計數字裏面可以睇到德國係最多仍然運作的 paternoster 的地方,一共有 231 部,捷克排第二有 58 部,匈牙利 18。而荷蘭有 8 部,英國都有 9 部。原本萊斯特大學(University of Leicester )裏面最高果棟 18 層高嘅社會科學學院阿登波羅大樓(Attenborough Tower)裏面本來都有部 paternoster 㗎,不過就啱啱喺上年(2017年)十二月尾停用。

就係因係德國人咁強烈嘅反對,paternoster 得以繼續生存。德國人覺得呢個係工業上的歷史見證。(Wikipedia)

你話有危險就停用?我話佢係歷史嘅見證呀!

德國市面上重有 200 幾部 paternoster,不過 200 幾部嚟講,都唔係部部都係開放畀大眾使用,好多 paternoster 都係只係職員專用唔對外開放。而喺公開開放的 paternoster 裏面,小菲眼前呢部就真係德國最高(好似),直通上下十二層,22 cabins;可以經佢安全咁上上落落真係有今生冇來世。

小妞 M 同我講完來都有好幾次想大規模禁止使用的提案,不過人民都係傾向反對;所以市面上仍然有好多見到 paternoster 的機會。德國人深信,冇人能夠預防危險同意外嘅發生,如果係咁不如你禁埋私家車啦。咁大口氣?就係因係德國人咁強烈嘅反對,paternoster 得以繼續生存。Efficiency 當然係條件之一,而且 nostalgia 都係德國的其中一個最大話題;而且機械感同技術性都咁強的德國人又點會放過佢地對自己工程上的信任呢?一嚐歷險的快感,又可以減少浪費寶貴嘅時間,一舉都唔知幾多得。而且最重要嘅係,德國人覺得呢個係工業上的歷史見證;歷史呀,點可以話禁就禁,一下話抹就抹走?全世界加加埋埋都唔夠400部,單單德國就有230幾部!人民的力量竟然可以咁大支嘢撐起 paternoster,見證過民主嘅力量,叫我仲點返香港?

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。