廢青度度都有：香港和希臘的廢青朋友

不單只香港，全世界都一樣，社會一旦富裕起來，我相信，100年後非洲贊比亞也會有廢青。

21世紀的廢青，可能不只是游手好閒，好食懶飛，無所事事，和十日唔沖涼，現代廢青的表情和心底深處，可能還多了一種「係政府同社會欠我」嘅理所當然。

阿媽陪見工　做一陣走人

朋友在香港開麵包工場，想請年輕學徒，萬一蚊個月，周休二日，包兩餐，仲有勤工獎，但長期請唔到人。做得最長嘅係一個27歲的年輕人，做咗超過半年。有一天到麵包工場探朋友，全場只有一個學徒返工。朋友以一副「好奇咩？」嘅眼神回應我。

原來現在的年輕人用 Hello Kitty 信紙寫 resume 唔係講笑唔係誇張，朋友面試麵包學徒的時候，唔少係阿媽嚟埋陪in，中學讀邊間，之前有冇做過野，全部阿媽代答。咁都敢請，不是朋友藝高人膽大，是真的很難請人，通常做兩個星期之後，就會消失一星期，然後阿媽打電話黎話：「唔做啦。」

我有時候會想，是不是自己離開香港久了，不曉得香港富裕到這樣的程度，後生仔唔做嘢都開到飯，個個屋企幾百萬未開頭。還是這些被社會標籤為廢青的年輕人，對人生和每天的生活本身，都沒有慾望沒有理想？

廢青度度都有，歐洲可能更嚴重。

我們在希臘工作的時候，如常聘請了好一些本地人，當翻譯或production assistant。希臘的青年失業率長年高踞百分之四十以上，但請人卻一點都不容易，最後找到一個說流利英語和希臘語的，我們都叫他Costi，在英國唸大學，失業已經5年。面試冇帶阿媽嚟，第一二天工作也有紋有路，第三天，出事。

當天早上是07通告，全世界ready，等佢。所有rundown同受訪者地址都在他手上。10點，Costi 掛着兩個黑眼圈出現，沒有說對不起，只說了一句：「唔掂，我真係好眼瞓，俾3歐元我買杯咖啡先吖。」Costi 替我們工作之前是零收入，上工第一天就要求先出糧，明明冇錢，但日日都要飲 4 杯咖啡，又要食高級煙草做既捲煙，一天就抽掉兩包。

飯都冇得開仲飲咩咖啡食咩煙，我心想，買個希臘三文治Gyro好過啦，1.5歐就已經好飽。Costi 的想法，是很典型的希臘人的想法，辛辛苦苦去打工，又搵唔到幾多錢，不如日日飲咖啡曬太陽好過啦，反正真係好唔掂，屋企阿媽日日都會煮飯，餓唔死。Project 完咗，Costi 半年之後 email 畀我，問我亞洲係咪真係好好景，想嚟做嘢，之後又係冇咗下文。

我唔想好似自己係死老嘢先覺得廢青廢，什麼教育制度出了問題，特首出了問題，土地問題，其實，都不是問題。不單只香港，全世界都一樣，社會一旦富裕起來，我相信，100年後非洲贊比亞也會有廢青。

他們身處一個餓唔死嘅年代，如果今日冇得痴阿媽住，唔食唔着，每個月都要死7000蚊出嚟租劏房，否則瞓街，會唔會積極啲？我常跟 Costi 說，人工低啲都做啦，流下汗，出下力，體驗下自己搵食嘅快感，會比日日匿埋屋企打機開心好多。

（本文純屬作者意見，不代表香港01立場。）