香港炒飛好嚴重？日本黃牛更加有市有價
一個「炒」字，可以話係香港人嘅身分象徵，炒樓、炒車牌、炒iPhone，近來更流行大炒演唱會飛，你望望張學友嗰20場演唱會嘅公開發售座位表，黑色嘅位，仿如掉進黑洞，搵都搵唔到。
日本人看似踏實，唔好話炒賣，連「炒魷魚」都好少聽到，不過身為JPOP迷妹，好想同大家分享日本「炒文化」，日文叫做「転売」或「高額転売」，其實日本人都好炒得。
日本每年有過萬場演出，當中包括演唱會、舞台劇、talk show、見面會、握手會、試映會、拳賽等等等等，門票炒賣文化早已極之成熟。初時，未明瞭此文化嘅我，多次追問粉絲：「咁貴，真係冇問題？安唔安全㗎？」基本上都會得到：「見到平好立即買啦！」感覺同香港人炒樓花一樣。
門票不公開發售 炒價以倍數計
其實點先叫做貴呢？！以日本國民組合嵐（Arashi）為例，將於11月開始舉行全國巡迴演唱會，門票定價9,000日圓（連稅），最新消息，暫時12月26至28日東京站，約6萬日圓以下未知道座位的黃牛，已賣得七七八八。
而每年巡迴均傳出最高交易金額，近兩年約40至50萬日圓之間，碰巧偶像生日場次，10萬日圓有山頂位都要偷笑，再提一次：正價係9,000日圓（連稅）。
原因在於其公司Johnny's事務所規定，所有門票均不會對外發售，只有歌迷會會員才有資格抽飛。以現時擁有超過180萬歌迷會籍的Arashi為例，每場演唱會約有4萬個位，每位歌迷可抽1至4張門票，每次巡迴約有10至15場演唱會，計一計，抽中的機率比香港中學生入大學更低。但身為J家迷（Johnny's 藝人粉絲），早已接受現實，輕輕講一句：「東京場6萬日圓，都算係咁」，價值觀早已崩壞。
加上近年國外歌迷激增，未能入會的強國迷妹不停大灑金錢，多次聽說朋友的朋友每年均花最少300萬日圓，去看遍所有地方巡迴，心中不禁大讚強國迷妹出手豪氣。歌迷總以「那你不讓我們入會，也怪不了誰，我們也是有付出的」來解釋一切。回頭看看，香港門票基本公開發售，但也有七成門票提早掉入黑洞。
有求有供 「炒文化」歪曲價值觀
票價急升，漸漸改變了一貫的日系「炒文化」，猶記得最誇張是去年Arashi舉行振興東北演唱會，場地略為偏遠，大會加開JR及巴士之餘，限量開放車位。本人在全國開賣前15分鐘，已於便利店購票機前行來行去，目的只為霸機，左眼仲要𥄫實對面間便利店有冇人爭。誰不知要買2日泊車券嘅我，順利購入首日後，其他日子已經斷飛，整個過程，只是30秒！上網一查，本來日租4,000日圓的位置，已炒到6萬日圓，買家不斷，連本為500日圓的巴士飛，亦被炒至3,000日圓。嗰一刻，不禁想將手上張飛高價轉賣，行路上東北。
由此可見，具財力的年輕買家甚多，同時提攜大量假黃牛騙案的出現，犯案者年齡小至16、17歲，詐騙金額由幾萬到千萬日圓不等，部分單純為錢，部分只為賺錢買飛入場，價值觀被「搵快錢」所歪曲。
業界聯合 反對炒黃牛
炒風盛行並不止於Johnny's事務所旗下藝人，大多JPop歌手、舞台劇藝員、寶塚歌劇團等亦深受其害。真正欣賞演出的人，礙於金錢限制而被迫放棄。最後所有演出，是否將變成有錢人獨享的娛樂節目？！所以今年年中，日本各大唱片公司、經理人公司，聯同旗下藝人發出「反對高額轉賣」聲明，勸大家不要再炒黃牛——「私たちは音楽の未来を奪うチケットの高額転売に反対します」（我們反對剝奪音樂未來的高額門票轉售行為）。同時於演唱會入場時，採用人面認證、IC門票或人名核對等措施，以打擊轉售風氣。雖然於黃牛網看來，炒風未見減弱，但歌迷之間亦隱約聽到反黃牛聲音，望有一日可回到初心。
其實JPop之餘，都好想睇Canton Pop。
借問SAMMI、學友、杰倫，正價何時有？
（文章純屬作者意見，不代表香港01立場。）