【櫻花】日本六大「爆花見」劣行，你有冇份？！
東京氣象局正式公佈今年櫻花開了，唔長又唔短的賞花期正式展開。
廉航當道，加上平價酒店、Airbnb即訂即住，唔少朋友已經準備出發。3、4、5月由東京掃到去北海道，想「發花癲」毫無難度！
大量遊客湧日賞櫻，日本報導稱此現象為「爆花見」，跟之前「爆買」一樣，負面味濃，矛頭直指大陸旅客，查實何罪之有呢？！身為香港人既你，又有冇做／見過？
櫻花殺手惡行 有幾多種？
據日本網民所講，「爆花見」惡行包括：
1. 大力拉扯櫻花 （目的：被花包圍）
2. 折斷花枝並帶走（目的：留念？！）
3. 搖動樹幹（目的：製作落花瓣效果）
4. 爬到樹上拍照留念 （目的：不明。但被指責時更理直氣壯道出這是國內賞花習慣）
5. 亂掉垃圾及留下食物殘渣
6. 破壞廁所清潔 等等。。。。。。
其實上述指控都幾真實，我亦曾於吉祥寺井之頭公園賞櫻時，目睹湖上情侶駛進櫻花樹下，眼見疑似女主角物體，將身邊櫻花左拉右扯，又推又搖，千姿百態，擺盡甫士，可惜男方唔爭條氣，久久未影到靚相，45分鐘後，櫻花折枝，花瓣散落湖上。友人即場爆出一句：「果位應該係大陸人吧！」（心諗：或者係香港人呢）。其實劣行，又豈止遊人，日本人亦都有份。相比遊客走馬看花，日本人視賞櫻為一個聚會，不少公司會休息半日霸位野餐。但開心過後，人去樓空，垃圾處處，慘了清道夫。
賞花之樂 遊客有咩要留意
櫻花期短暫，想把握時間影靚相，而又不失禮於人前，緊要留意小貼士：
1. 賞櫻不動手，不要為與櫻花拍貼面照而拉扯樹枝，以免折斷。更加不要亂爬樹
2. 影相要快手，遊人眾多，靚位有限，記得排隊之餘，不要長時間獨佔，禮讓第一
3. 避免用腳架，最好沿路邊行邊賞，以免阻塞通道或絆倒途人
4. 自拍要小心，特別是使用自拍神器，避免棒打旁人
5. 垃圾要分類，尤其於公園飲食或野餐，場內必定有大量分類垃圾箱，緊記臨走前要收拾好兼正確分類
6. 揸車要留心，自駕遊賞花友，緊記遇到靚景，將車輛置於不阻礙行車線地點，再落車欣賞。市區賞花就最好使用交通工具。
7. 慢駛BB車，請勿以BB車開路，如果預先知道賞花點人流較多，建議手抱
另外，不要喧嘩、遵守秩序、不要亂拋垃圾、不要爭先恐後等等，應該人人皆知。
最後，送上兩個影相小貼士，如果好想製造落花效果，不妨收集地上落花瓣，行埋一邊大玩特玩，或拍Slow Motion都唔錯。又如果你想影張被花包圍既相，亦可揀棵大大櫻花樹，站在樹下並以鏡頭低炒，包保你個頭變左櫻花爆炸頭（但要小心雙下巴）！
（相片由作者提供。文章純屬作者意見，不代表香港01立場。）