【AngryBirds上市.博評】Rovio上市唔奇 奇在而家先上

撰文:
最後更新日期:

Angry Birds(憤怒鳥)都搞上市?係喎。其實冇乜咁出奇,毛記都上市,袁彌明生活百貨都上市,咁Rovio (Angry Birds嘅開發商)都搞上市,好合理。Rovio係芬蘭公司,都係諗住芬蘭上市,估值20億美金左右,等於大家樂咁上下市值。

Rovio上市唔奇,但奇在而家先上,明顯已經錯過晒最好時機。不過遲到好過冇到,而家唔上之後更加唔使上。點解?下面同你分析下。

Rovio 歷來出品 VS 網民惡搞林峰演唱會曲目 (維基百科、香港網絡大典)

Rovio同毛記一樣,都係三個小伙子搞出嚟。絶大多數人都係因為Angry Birds 2009年爆紅,先識呢間公司。比較少人講嘅係人哋之前51隻遊戲全部仆直,公司幾乎破產。以為係勵志故事,搵到成功方法,從此平步青雲?其實更值得留意嘅係,第52隻遊戲Angry Birds成功之後,Rovio一樣冇一隻遊戲得。基本上就係Michael Learns to Rock 咁,一曲That's Why You Go Away走天涯。

見到Angry Birds出到太空版星球大戰版,令我聯想到網民惡搞林峰演唱會嘅曲目,只有愛不疚Acoustic Version唱到愛不疚清唱版。

但,至少林峰仲有《Chok》同《愛在記憶中找你》等等金曲,Angry Birds就真係只能玩到變型金剛版。問下身邊嘅人,對上一次玩Angry Birds嗰時,應該仲係曾蔭權做緊特首。

生意差,幾乎破產,當然就要炒人。Rovio2014同2015年炒咗400人咁滯——即係,半間公司。CEO亦都換咗幾次。

但實在係冇法,手機遊戲呢味嘢,入場門檻其實唔高(都話人哋三個學生搞出嚟)。而成唔成功真係好難預知,仲邪門過拍戲。同一間公司,搞一百幾十隻遊戲唔掂,忽然爆出一隻,但之後又可以係幾百隻都唔掂。

Zynga 股價(左)及King Digital 股價 (右)(Google Finance)

睇下當年開發開心農場(Farm Ville)嘅Zynga,一樣係一隻遊戲跑出後無以為繼,股價話咁快插水。開發Candy Crush嘅King Digital情況差不多,後來因為賣盤畀Activision Blizzard先反彈(下面會再講呢單賣盤)。

手機遊戲唔同電影,電影嘅,至少觀眾會睇明星,會睇導演,或者會因為原著(小說/舞台劇/遊戲)入場,而家荷里活啲大片,未上都封晒蝕本門,票房好少出大事。

講到電影,Rovio就卒之學精咗。點解Rovio幾乎破產後仲未死得,而家仲話可以搞上市?原因唔係公司扑中第二隻好遊戲,更加唔係憤怒鳥神奇女俠版(亂作的)取得成功,而係——公司轉型去拍戲!

舊年就拍咗《憤怒鳥大電影》(The Angry Birds Movie),我都有睇,都OK好睇,票房都得。(電影宣傳片Youtube截圖)

精準啲講,Rovio唔係拍戲,只係賣授權(呢幾年成日有人講的IP,Intellectual Property)。舊年就拍咗《憤怒鳥大電影》(The Angry Birds Movie),我都有睇,都OK好睇,票房都得。多得呢套戲,Rovio舊年轉虧為盈,全年賺到1800萬歐羅左右,幾好啦。

咁所以,就更加要趕上市啦!係馬後炮,但都要講,講Timing香港人真係叻盡全球,毛記就叻在快快手推上市。Rovio最錯就係2010年嗰期冇搞上市,嗰時公司估值拎到去90億美金咁滯。而家?話想拎20億美金,都畀人話大貪。

話佢大貪嘅都唔係無的放矢。之前講過開發Candy Crush 嘅King Digital,賣咗畀紐約上市嘅Activision Blizzard(機迷應好熟悉,Call of Duty,Diablo,StarCraft等等都係呢間公司),作價係60億美金,等於King 3年嘅收入。如果用返3年收入計,Rovio應該只值10億美金左右 – 而佢哋想拎20億美金估值,難怪畀人覺得大貪。

無論如何,時間唔係站在 Rovio 嗰邊。固然你可以搏奇蹟,可能公司忽然間有第二隻遊戲爆紅。但而家嘅世界,同2009年Angry Birds爆紅時已經係兩回事。Rovio自己走去搞主題樂園 (已經話唔再搞)走去拍戲,就話你知管理層都唔多信會搞得出第二隻好遊戲。

轉型拍戲?《憤怒鳥大電影》救得公司一時,但救唔到一世。公司已經宣佈拍續集,鐵定2019年上演,慶祝Angry Birds十周年。但,畀你拍埋續集又點? 之後一路拍到2047?《陰陽路》都唔掂啦。請記住套戲嘅成功都係嚟自隻遊戲,冇新遊戲嘅,我估拍三集點都收檔。況且,Angry Birds 上市其中一個目的,就係集資拍續集。上唔到市嘅,分分鐘第三集都唔使拍。

公司已經宣佈拍續集,鐵定2019年上演,慶祝Angry Birds十周年。但,畀你拍埋續集又點? 之後一路拍到2047?(The Angry Birds Movie Facebook Page)

Rovio上市,係8月左右傳出嚟嘅,當時話想9月初上,而家依然冇影,相信20億美金估值都凍過水。咁一係,夾平夾賤咁上,10億就10億,好過冇。一係,再望天打掛,搏有第二隻遊戲跑出——但可能到時已經破咗產。

Rovio呢類一曲走天涯嘅手機遊戲公司,好難有生存空間。想拍戲?都冇可能不停拍。搞主題樂園賣公仔?你又唔似迪士尼咁財雄勢大,只係捉老翻都有排煩。任天堂就唔怕Pokemon Go狂熱消散, 因為任天堂唔只係靠 Pokemon Go。

Rovio仲有咩出路?同King Digital一樣,唔上市但賣盤咯。其實呢個年代,科企都係Winners takes all。你見Whatsapp Instagram一樣唔(使)上市,直接賣盤。邊個會買Rovio?有咩好得過同樣係雀仔嘅企鵝騰訊? 唔係老作,騰訊之前買咗Clash of Clans嘅開發商Supercell,一樣係芬蘭公司,出手都幾濶綽(即係,畀人話係水魚)。況且,Rovio都認想入大陸市場,之前搵咗間大陸公司一齊「打造」中國版憤怒鳥。 舊年新聞話騰訊肯出30億美金買Rovio,既然如此,不如變做憤怒的企鵝算數。

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。