【國泰炒人.博評】唯一出路 廉航才是王道

撰文:
最後更新日期:

前輩話過,寫鬼故事最易,因為應該冇人見過。

寫愛情故事最難,因為人人都係專家。

而家我寫航空公司,都有類似感覺。

坐飛機普及化,以前深不可測嘅航空業唔再離地,人人都有想法,但其實有唔少係先入為主嘅迷思。

本文通過比較國泰同新航,去做myth buster。

新航服務人人讚好,同業都讚,甚至覺得佢頂爛市縱壞客。(Singapore Airlines)

香港人往往亦只留意國泰。港航同快運都好多人坐,但冇上市,好多資料都唔公開。我哋眼光放遠啲,試下在國泰嘅死敵新加坡航空(新航)身上,睇唔睇到啲嘢。兩個城市好多嘢相似,而兩間公司規模亦差唔多,可以拎嚟比較。

近日講起國泰,你只會諗起炒人,同埋燃油對沖。先講燃油對沖,呢個唔係咩喪炒行為,新航一樣做,新航都一樣輸錢,不過人哋冇輸咁多。係管理層問題定運氣問題?唔知,但國泰確係做得好差,冇得兜。

不過「炒輸期油」係咪蝕錢嘅主因?似乎唔係。國泰舊年燃油對沖損失85億(港紙,下同),係搞到全年蝕6億。但前年對沖損失一樣咁上下金額,最後就賺到90億喎。點解?唔難估吖。國泰舊年收入得928億,前年係1023億 -收入冇咗95億,呢下先最傷嘛。至於點解收入暴跌?一百萬嘅問題嚟的,畀你諗下,陣間開估。

燃油對沖輸錢當然難睇,但話蝕錢完全甚至主要因為呢個原因,我就唔同意。況且呢啲對沖損失,算係週期性或一次性:未必好快消失,但應該見咗底。但頭先提到冇咗嘅收入,就好可能係結構性,唔知幾時先返到嚟,呢下先最傷。

講到炒人,今次國泰炒人,唔涉及空姐空少機師地勤,主要係炒啲中高層管理人員。其實好合理,一來總要有咁上下人先開到架機,減唔得幾多,二來亦係公關形象(IT人被炒同空姐喊晒個畫面又好唔同啦,世界係唔公平的),三來其實空姐空少人工唔算太高。而國泰嘅問題,似乎係管理層太臃腫了。

以下呢個表,本人精心泡製,新航同國泰年結月份唔同,坡紙匯率亦有波動,難求100%準確,但最緊要係個big picture。

睇到嘅係,兩間公司的確咁高咁大,收入差唔多,員工數目都差唔多。國泰員工多啲,收入多啲,總員工開支都大啲,但似乎不成比例。除返開每個員工計,國泰斷人頭嘅收入高過新航些少,但人工開支就多好多! 咁當然大家都明,任何企業都好,人工開支一定係畀少數超高層拉高。

當然,冇兩間公司係可以完全公平咁比較,新航旗下有廉航,亦好大程度上仲係國企,仲要相對地少短途線。但睇大數嘅股東同董事,就冇咁considerate。 而國泰平均人工講緊係74萬一年 – 當然唔會係因為空姐空少拉高,而肯定係啲中高級管理層 – 所以你見佢哋係重災區,之前連個CEO都走埋。若果同文麥嘉隆兄篇文(【編按:國泰CEO 人工值一蚊雞】)講嘅成真,CEO拎一蚊雞人工,咁肯定幫到好多,可惜大家都知唔會發生。

燃油對沖,會過去的。一堆中高管理層,炒咗。空姐機師,唔會炒(住)。CEO又唔會拎一蚊人工。咁但,返返去問題嘅核心:點解收入跌得咁快?

懶人嘅答案,當然係「因為服務越黎越差,冇人坐」。Really?數字唔呃人,坐國泰嘅人次,根本冇跌過。咁唔係量,就梗係價啦。唔使專家都估到,競爭大嘛,機票廿年前咁嘅價,而家都係一樣,甚至仲平。

點令你畀貴啲?係咪學網民或乜乜專家話齋,提高服質素就得?話咁易咩,更唔好講提升服務要成本。Steve Jobs話頭,好多時客人都唔知自己想要乜。事實係一路鬧一路睇嘅大有人在(例如TVB),而話好珍惜但永世唔幫襯嘅一樣大把(例如乜乜小店只有執笠先最多人)。航空公司做過好全面嘅調查,的確發現顧客滿意度,同公司收入,冇乜正關係。 RyanAir同聯合航空惡名昭彰,有口皆媽,但偏偏好賺錢,股價好掂。

仲係唔信?新航服務人人讚好,同業都讚,甚至覺得佢頂爛市縱壞客。 A380又係佢玩先,和諧客機全世界得四間玩,又有佢份,雙人床又係佢玩先,經濟艙有得飲香檳又係佢,飛機餐最多花臣又係佢。 結果呢?新航舊年收入一樣要跌,今年第一季直頭蝕咗8億港紙,3年首次,股價即時插水(講你都唔信,國泰今年股價表現跑贏新航成條街)。點解?外媒個題起得好:

flyers swap champagne for cheap seats。

乘客口中不說,但身體很誠實。

講到呢度,到重點了。一字咁簡單,廉航才是王道,甚至可能係唯一出路。 過去十幾廿年,廉航打到傳統航空公司落花流水,已經反客為主。 成個集團睇,新航比國泰最優勝嘅係乜?唔係服務好, 而係,佢有廉航! 證據? 你睇新航全年業績,主品牌利潤大跌,增長全部嚟自廉航虎航(Tiger)同酷航(Scoot),仲有Regional嘅勝安(Silk Air)。

今年第一季更加明顯:主品牌直頭蝕錢,靠Tiger,Scoot同Silk頂住。

睇少啲煽情嘅新聞,唔好以為國泰嘅核心問題係炒期油或服務唔好。世界同三十年前唔同咗,而機票N年冇加過價甚至仲要減,而家坐飛機嘅人亦唔同三十年前。 國泰同新航兩間公司其實同病相憐,受三路夾擊。 玩短途嘅, 就唔夠廉航玩 (新航相對地冇咁驚), 玩長途仲大劑, 中東油國或明或暗咁用國家財富補貼航空公司,鬥性價比,你邊夠人哋中東三寶(卡塔爾,阿提哈德和阿聯酋)鬥? 仲有最後一樣, 玩轉機嘅, 而家內地好多航空公司都由內地直接飛歐洲美國, 唔使經你香港新加坡。

同文麥嘉隆兄分析得好, 國泰最慘唔係服務差唔係炒輸油,而係搞唔掂市場定位,兩頭唔到岸。 本人答埋佢嘅問題, 兩頭?其實路得一條,就係廉航。

If you cant beat them, join them.

當然,馬後炮梗係易,大家閨秀要下海做脫星,拋開心理包袱打爛仔交話咁易咩。但歷史只係記得葉玉卿葉子楣之類嘅先行者,之後嘅再剝都冇人理。 正如中西里菜下海拍AV先最轟動,之後嘅都冇乜人會好關注。 新航一樣面對咁上下嘅問題,但就早啲下定決心。咁但,人哋係國企嘛,點同呢。睇到呢度, 你發現國泰新航就係雙城縮影, 新加坡好多嘢發展好過香港,唔係偶然,各有前因就莫羨人。 

(所有數據圖片均由作者提供,本文純屬作者意見,不代表香港01立場。)


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。