【英國大選．博評】文翠珊——A貨鐵娘子遠不如舊

後馬勒當拿時代，阿根廷有啲天份又夠矮嘅足球員，都畀人當係「新馬勒當拿」，但無數「新馬仔」都令人覺得名大於實，直到美斯出現。正如後米高佐敦年代，無數NBA籃球員都畀人寄望係「新佐敦」， 但結果不少老柴仍然覺得「波神」無可替代。

戴卓爾夫人（Margaret Thatcher）係鐵娘子，咁理所當然地，又係女人，又係首相，又係牛津畢業，媒體樂於叫文翠珊（Theresa May，下稱May姐）做新鐵娘子。特別戀英殖嘅香港媒體及網上社群尤其鍾意，畢竟元祖鐵娘子在香港聲望甚高。

May姐本人亦都十分樂於「消費」鐵娘子呢個形象去撈政治資本，側聞佢根本細細個就想做英國第一個女首相，點知畀人截咗糊，相當唔開心。媒體亦樂於研究May姐嘅豹紋高跟鞋，如同元祖嘅手袋一樣。佢嘅友好亦樂於順水推舟，前保守黨黨魁夏偉明（Michael Howard）甚至提過May姐會考慮出兵直布羅陀，彷如當年元祖出兵福克蘭大振英國聲威一樣。元祖一句"Sink it！"就打沉阿根廷戰艦，十分有型（當然只係電影對白）。

咁但， 藺相如司馬相如，名相如實不相如。新鐵娘子同元祖比，實在差得太遠。唔找數，轉軚，政治自殺，唔敢上電視，對住媒體變成人肉錄音機，一塌糊塗。

英國大選保守黨重創，有點不幸。 保守黨得票率其實係近30年（當年正係元祖鐵娘子）最高， 咁點解仲係輸議席？一來，得票唔均衡，有啲票倉就贏幾條街，但有啲「搖擺區」就輸。二來，保守黨得票比上次（2015）大選高，但工黨進步更多。 點解會咁？ 因為投票率高，特別係年青人投票率升咗好多，出晒嚟支持左翼嘅工黨。有理由相信，係年青人對舊年脫歐公投不滿，湧晒出嚟投對家，要保守黨票債票償。

政治只講結果，現實就係保守黨失去12個議席，唔夠半數，造成「懸峙國會」。 迷信咩英國政治倫理嘅，當然以為May姐會問責落台。 但哈哈，真係太睇少May姐嘅面皮，佢堅決唔走，同當年董建華一樣，要離開好易，留低先係勇氣。

冇呃你，有圖有真相，May姐自己在電視講，如果失去6個議席，就代表工黨郝爾彬（Jeremy Corbyn）做首相。而家輸夠12席，咁當然唔會找數啦，12席唔係6席嘛，語言偽術嘅嘢。

相比之下，大學教授Matthew Goodwin睇淡工黨，「工黨有38%得票我就食咗自己本新書」。結果工黨得票40%，此人即時在電視直播食書，呢啲就係找數真漢子。

近年4次英國投票， 2015嗰次係常規選舉，但另外3次都係保守黨食飽飯冇嘢做，自恃有民望而搞出嚟嘅政治豪睹，一次勉強過骨，兩次出晒事。2014年蘇格蘭獨立公投，背景就係當時首相卡梅倫（David Cameron）自恃民望高，蘇獨支持度唔高，諗住一勞永逸，「一鋪收你皮」。結果留英派驚險獲勝，但過程飽食驚風散。 明顯卡梅倫似賭仔，一次幸運就再玩大啲，2015年大選提出話脫歐公投，舊年就找數，亦係諗住「一鋪搞掂你」，結果爆大冷，脫歐派勝出。

卡梅倫無疑係自己攞嚟衰，但至少佢都問責下台，亦係因為咁May姐先上位。留意，May姐並唔係民眾直接投出嚟，咁所以佢好想「證明」自己都有民意。May姐拜相時話過唔會提出大選，兩個月前忽然一轉口風。元祖嘅名句係"The lady's not for turning"，May姐話turn就turn。

原因係乜？當然係見到當時保守黨民望大幅領先20%， 一樣諗住「一鋪搞掂你」，然後擴大保守黨嘅優勢，做強勢政府，有牙力去同歐盟傾脫歐。結果去到臨投票前，民望優先大幅收窄，最後投完票就一鋪清袋。事實就證明，佢畀卡梅倫更加冇民意。

May姐如何短時間內流失晒民望？導火線固然係被稱為老人痴呆稅（dementia tax）嘅政策，結果May姐又係快速轉軚。同時間，英國大選前倫敦有恐怖襲擊，May姐當然企圖spin去佢嘅反恐政策，點知又畀人搵返佢削警力嘅舊事，認真捉蟲。但我認為更加不堪嘅係佢對住鏡頭嘅表現。

英國作為政治大國，政客嘅嘢，衰啲講句真係唔打得都吹得，好少去到好似May姐咁差。難為仲有人覺得佢係優雅國度嘅政客講句嘢都有文化啲。May姐有幾唔掂？ 唔掂到佢直頭缺席電視辯論，人哋畀張空櫈佢，真係唔好以為英國政客就辯才好好。

OK，你可以話，其實當其時保守黨仲以為穩操勝券，我在上風使乜同你搏？使乜上電視畀對手有機會翻盤？咁但，電視辯論避到，同記者講幾句嘢總係避唔到。我建議你搵下"three minutes of nothing"嘅影片嚟睇，你可以睇到，人肉錄音機，真係唔係香港獨有，而係宗主國古已有之。

話說May姐去到普利茅斯（Plymouth），記者問佢脫歐會點惠及普利茅斯？佢只係答「將來會更加美好」，記者再問，你會保證改善普利茅斯嘅對外交通嘛？佢答「我知道對外交通好重要」。係咪好神奇呢？牛津畢業生英國首相，就係咁水平，唔怪得唔敢去電視辯論。咁嘅款想做「新鐵娘子」？會唔會大貪咗啲？

政治嘅嘢，已經成為showbiz。英國May姐，對住鏡頭對住傳媒，連香港加雞汁嘅May姐都不如。人貴自知，明明自己冷手執個熱煎堆，就唔好走去豪賭想一鋪清人袋。而家反被清袋，本人講乜都會有人話係馬後炮（事實我亦估唔到保守黨會失去12個議席）。咁但，May姐自己攞嚟又好，唔好彩又好，下台，應該係基本常識吧。聽聞而家仲有黨友撐佢，無非暫時想營造一個團結嘅形象，但我相信May姐自己唔走， 未來6個月內就會有人迫佢走。

（文章純屬作者意見，不代表香港01立場。）