作為一個女人,我諗我明點解Stephy同方力申會分手…

旅遊節目《蜜月到訪》擷圖

撰文:
最後更新日期:
我唔太覺得係方力申偷食引致分手。我更相信係兩人價值觀越來越遠…
詩寧

今日應該好多人都討論緊方力申同鄧麗欣分手呢件事。金童玉女講分手,大部份人都表示驚訝、可惜。但我作為一個對Stephy有情意結的人(我知Stephy唱歌唔係特別好,演技又未夠,但童年回憶呢家嘢…好難講),總之,作為一個經常留意小方同Stephy新聞的人,我真係……一早預料到呢個結果。

其實由Stephy發展時裝事業開始,兩個人出席活動時就越來越貌合神離。

唔講乜嘢「女尊男卑」老土嘢,我亦唔太覺得係方力申偷食引致分手。我更相信係兩人價值觀越來越遠──Stephy專注事業:唱歌、拍戲、時裝生意、組織排球隊Loey Volley……仲邊有時間拍拖?

Stephy熱衷排球,早前組成了排球隊Loey Volley。(Facebook圖片)

仲記得Stephy初初興高采烈喺《東張西望》訪問中宣佈會搞排球隊,個樣明明好開心話呢個係佢一直以黎嘅夢想,但主持一問佢小方有咩睇法,Stephy就立即沉一沉,話方力申勸佢唔好搞咁多嘢。女朋友無時間陪自己,仲要喺外地工作,寂寞扭計都係人之常情,但扭多幾次對方都無改善,吵架、心灰就在所難免。

【失戀前一星期 小方扭腰摸胸跳艷舞】
【Stephy拒婚出事? 揭3大分手端倪】​
【十年情背後 究竟承受多少壓力?​】

上年TVB有個旅遊節目叫《蜜月到訪》,每集王祖藍同李亞男都會請一對情侶朋友去旅行、傾偈,其中有幾集就係方力申同Stephy做嘉賓。好記得去到節目尾聲,主持問兩個人幾時結婚,佢地即刻面色一沉,支吾其詞咁話一直都無傾過結婚,方力申半帶講笑話:「係呀…女人事業好緊要㗎…唔好放棄!」鏡頭一轉,Stephy一個無奈樣,叫小方「正經啲得唔得呀?」去到呢個位,心水清嘅似乎都感覺到女方太專注事業,埋下分手伏線。後來Stephy在節目中直言,令佢想結婚的動力只係生小朋友,婚姻本身無特別意義:「結左婚又點?結完又唔會令我地感情變好…」講到呢度,方力申個樣其實有點強顏歡笑,但畢竟喺鏡頭面前,就只能跟王祖藍舉杯說句:「係…我好同意…乾左佢!」意圖結束話題。

【小方流淚開腔:結婚十周年紀念日分手】
【方力申公開親吻 鄧麗欣感動落淚:為拍《紀念日》減少見面】

Stephy同小方喺節目入面話從來無傾過結婚。(旅遊節目《蜜月到訪》擷圖)

再者,Stephy單親家庭長大,佢未必係《不要離我太遠》入面那個弱質纖纖嘅女子,反而佢親自填詞的那首《黑白照》,講佢細細個已經無爸爸照顧,更加能夠突顯佢的強悍、獨立,習慣咩都自己處理。努力、忙碌令佢有安全感。

電影《紀念日》慶功記招上,小方公開吻Stephy又送禮物,令女友感動落淚。(資料圖片)

仲有,如果你分過手,應該都明白,一段感情斷氣前,總有一方會做啲平時唔會做嘅嘢去救亡。記得一月初電影《紀念日》有個宣傳活動,咁啱又係小方Stephy拍拖十周年紀念,方力申就偷偷同導演葉念琛一齊夾計,收埋一早買好嘅零食籃,然後喺台上當眾送比Stephy。當然件事係好值得開心,但Stephy 竟然因為一籃零食感動到喊,正當我諗緊籃零食有咩特別之際,Stephy話:「佢平時唔送驚喜等如驚喜,今次真係送驚喜,好感動!」 啊!原來喊嘅原因係方力申好少畀驚喜Stephy?少到一個咩程度,會連一個零食籃都可以令佢感動到喊?

【小方剖白 分手只因葉念琛?】
【歌曲情節疑幻疑真 作品預兆十年情路】
【Stephy聲明:我的世界不存在童話】

Stephy嗰次喊,在我看來,似感慨流淚多於感動流淚……又,無啦啦,小方十年來從來唔做嘅嘢,突然間做,仲唔係救亡?!感慨流淚,並唔係指失望或者嬲,而係…多謝你喺最後階段仍然努力嘗試,去搶救一段快將結束的關係。

OL紛紛表示金童玉女都分手,以後唔信愛情。「愛情」,從來都只是一剎那,想要天長地久,需要經營的不是愛,是「關係」。

沒有誰傷害誰,純粹價值觀不同、意見分歧而斷送十年感情,這比誰偷食、誰生厭更叫人傷心。這種分手,背後有個大家都不願承認的真相──原來你不是對的人。但換個角度,如果這步跨得過,會是永遠分不開的一對。

可惜的是,Stephy在節目中也說過:「如果我講得出(分手),就返唔到轉頭。」

【由《獨家試愛》走到《紀念日》的十大金句】
【由Stephy十年情告終談起 怎樣的戀人比較容易復合?】
【方力申鄧麗欣專頁】

旅遊節目《蜜月到訪》擷圖

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。