終於搵到絕世好工,點解仲要第七次裸辭?

撰文:
最後更新日期:

上回提到,博客詩寧曾經裸辭6次,但認為當 working holiday 都係賺咗體驗。之但係,當第7次裸辭在眼前,今次,佢掙扎了……)

(網上圖片)

裸辭,第一次做會好驚,做完好爽,做多幾次,覺得同食飯一樣咁正常。人係有選擇開心嘅權利,如果某個地方令你長期唔舒服,盡過力都解決唔到,畀自己休息吓,真係對整個人生都好有幫助。我大學畢業之後,30 歲未夠就裸辭過 6 次,每次都好瀟灑,話走就走。

喺香港 working holiday 咗一年,迷失過、幼稚過、熱血過,終於搵到停落嚟嘅哋方,點知都係要面對第 7 次裸辭,這次是唯一一次無限挣扎……

裸辭 6 次之後 我搵到份絕世好工

唔計散工,一年之內裸辭 6 次,我覺得有啲攰。每次辭職之後就旅行,旅行完返嚟 send CV、見工、簽約,然後辭職、旅行……好多人去外國 working holiday 都係一年之後就覺得玩夠啦,同樣地,我喺香港嘅 working holiday 都係一年開始厭倦。

抖咗一年,我終於搵到份想長做嘅工。今次真係好畀心機做,投入到成日唔記得放工(作為打工仔,你明白「唔記得放工」係好難發生的),而且第一次覺得自己好好彩,搵到間有良心嘅好公司,有培訓、福利好,人工亦係咁多份工之中最高,重點係 OT 有補水之餘,仲要無取巧地補得好令人滿意!

我入職第一日諗,自己最少會喺度做 5 年,甚至一世。

公司好,當然係一個唔想辭職嘅原因。加上經過一年摸索期,已經知道乜嘢工作適合自己,好想喺一個位置發展事業。呢個心態上嘅轉變,原來真係話嚟就嚟。

為結婚 要家庭唔要得事業?

香港 working holiday 嗰年,我應承過男朋友,如果搵到份好工,就停落嚟結婚生仔。既然搵到,咁今年就係兌現承諾嘅時候。

一踏入 2016,我哋就買樓同排期結婚。「買樓同結婚」真係唔係打幾隻字出嚟咁簡單,除咗要用好多錢之外,仲要用好多好多好多時間去處理鎖碎事——按揭、裝修、傢具、家品、婚禮場地、攝影……加埋公事,真係連瞓都無得瞓,精神壓力勁大;我真係無諗過,裝部分體式冷氣原來都好多學問同法律問題,連續頂咗 5 個月忙到唔識形容嘅日子。

啊!我基本上係控制唔到情緒——忙碌、失眠、不停病同皮膚敏感……買樓同結婚都係洗濕個頭、係無得放棄的事,咁我唯一可以擠多啲時間出嚟嘅方法,就係:辭職。

  人生交叉點  

(iStock photo)

辭職=無錢,有時間;繼續做=有錢,

但,新屋同婚禮搞到天一半地半,點算好?

情義兩難存 辭職原來咁艱難

係,正常情況其實好多 options,例如拎 annual leave 或拎半個月 no pay leave 處理私事咪得囉!

但係個世界邊有咁易畀你過到骨?喺私事最忙嘅時候,亦係公司籌備全年最最最大型活動嘅時候,個活動仲要唔係 last 一日,係玩足兩個月!個個部門都做到金睛火眼,你拎 no pay 半個月?Sick leave一日都犯法呀!加上,當你對一份工認真,就會介意其他同事嘅眼光。怕是非,又怕唔好意思加重其他人工作量,結婚係你人生大事啫,其他人無義務要體諒你。

好怯。喺呢個咁等錢洗嘅情況之下,諗到要辭職,真係好怯……直到有一日,上司出咗個 email 同大家講,未來兩個月都要一星期返足 6 日。啊!我睇到真係晴天霹靂,私事就只能靠星期六日去處理呀!本來就已經唔夠時間,而家仲食埋我未來兩個月嘅星期六?如果你結過婚,你應該明星期六真係好重要好重要好重要。

最後我喺好唔捨得份糧同福利嘅情況之下,辭咗職。

上篇文我提到,裸辭最大本錢係「青春」,今時今日我喺心態上已經無咗呢個本錢。我終於都明白嗰啲我曾經睇唔起嘅人:

「一直無得升又賴死唔離開公司,因為要供樓。」

「俾客鬧到頭耷耷都仲要微笑,都係為咗頭家。」

「明明好憎大老闆個秘書,但佢生日會送禮物畀佢,因為個仔仲細。」

裸辭有得有失 最緊要做好眼前工作

出來工作,就係好多事要妥協,要忍讓。如果你明呢個道理,咁以後就唔好睇咁多裸辭文,因為唔關你事喇,成年人。如果你唔認同,就好快啲裸辭吓,有得抖好快啲抖,唔返散工不停遊山玩水點都好,最緊要唔好日日喺屋企瞓,每一份工、每一個經歷,都唔會白過。

不停裸辭嗰年,同唔同公司嘅同事做咗交心好友,佢地一聽到我又辭職,即刻介紹好多工畀我,有啲仲會做我婚禮嘅姊妹添!如果我無經歷一年香港 working holiday,就唔會識到佢地。

呢一刻,你可能做緊啲覺得對自己無乜大益處嘅嘢,或者讀一啲無乜關聯嘅科目,但只要你用心做好呢一刻,好處自然會喺將來出現。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。