【辦公室政治】升職與否 還看你屬哪個馬房

撰文:
最後更新日期:

有人嘅地方就有是非同政治,辦公室又點會無呢?梁振英表示放棄爭取連任之後,立即就彈出一個林鄭月娥,我諗稍稍有留意時事新聞嘅讀者,對於林鄭表示「重新考慮參選特首」呢件事都唔會驚訝。驚訝嘅人,可能係喺林鄭話唔選之後有唔小心落錯注/同佢唔係咁夾的下屬下屬下下屬。

以為你唔玩,一時鬆懈擦錯鞋,而家你返轉頭有可能做我大老闆,我份工點算先?

升職與否,還看你屬哪個馬房。(資料圖片)

一朝天子一朝臣,籌組班子呢個情況亦會出現喺唔少大公司,公司愈大,山頭愈多,作為下層下層下下層嘅你,根本無選擇,一入職就被歸咗去某一個「馬房」,點解?你老闆跟邊個老闆,你就等於係嗰房人啦。當然,做耐咗,同唔同嘅人熟絡後,你有權轉馬房,甚至喺A馬房做B馬房老闆嘅臥底。

呢篇文,有唔同朋友嘅經歷。老規矩,全部主角用同一個名。Jennifer,是她也是你和我。

表面風平浪靜嘅office,隱藏辦公室政治。(林勇攝)

  Jennifer 一號:拍錯碼頭慘過投錯胎

A公司,CEO好有心亦好願意洗錢去做好間公司,佢對下有幾個董事(暫且叫Peter、Paul & Mary)同埋關鍵人物總經理Judy。大家盛傳Judy係CEO個情婦,因為人人都覺得呢個Judy奸、交唔到貨,但偏偏CEO十分重用佢,畀佢管幾條team之餘,就算Judy嗰幾條team成績幾差都好,都仲可以不斷增聘人手。相反同佢打對台嘅董事Peter,條team有人走,就話因為要節省資源,暫時唔可以請人住,人手愈來愈少,手足們愈來愈辛苦,惡性循環下只會繼續有人走。兩個月時間,Peter條team就由10個人,走剩5個。Jennifer就係死頂爛頂唔肯走嘅其中一個,喺佢心目中,Peter係好大佬,所以佢想留得幾耐得幾耐。

士氣低落當然愈做愈差,交唔到數,最後Peter team被解散,Judy乘勢將Peter team嗰10個人嘅budget撥落自己team,進一步擴大山頭。

小薯點樣?如果你係Judy身邊紅人,當然升得快過火箭,但萬一你係Peter team其中一個如Jennifer,無論你幾勤力、幾做得嘢,唔止唔洗諗升職,分分鐘比人炒咗都唔知咩事。「錯馬房」,就是原罪。

高層鬥過你死我活,年中又波及幾多無辜打工仔?(istock)

  Jennifer 二號:打份工變做無間道​

B公司,Jennifer係剛畢業的小薯一粒,命水唔錯,一入公司就入咗當時最大權力嘅Judy team。Jennifer聽教聽話正常醒目,Judy對佢印象唔錯,觀察咗一年左右,Judy同Jennifer講:

「我覺得你做得幾好,想畀機會你學多啲嘢,我知道Peter一向好肯教人,好多同事都鍾意跟佢,你有無興趣調過去幫佢手,跟吓唔同人學嘢?你放心,我一樣會睇住你,遲啲返嚟幫我都唔出奇㗎。」

天真Jennifer點諗到Judy其實想派佢去Peter team做臥底吖。

過咗Peter team之後,Judy果然係繼續睇住Jennifer,定期都會叫佢入房傾吓計,但目的就係八吓對手搞緊咩。

天真Jennifer隨住年月都會長大嘅,加上其他同事又會散播唔同傳言,Jennifer開始知道自己被利用,加上新老闆Peter對佢都幾好,佢亦唔想捲入咁高層次嘅人事鬥爭,所以慢慢就無再將Peter team嘅嘢講比Judy知。Judy亦唔係傻的,發現呢隻棋子再無利用價值之後,就將佢流放。由於Judy權力佔上風,控制一粒小薯真係輕而易舉,當其他team有狗屎垃圾project唔夠人手,就叫人搵Jennifer幫手,任何team都可以叫佢做嘢,就務求做死佢為止。最後,Jennifer喺做死之前辭咗職。

唔想埋沒良心被利用,拒絕做棋子,結局就做死自己。(istock)

無論你咩職位,有幾唔鍾意政治,政治還是會找上你。努力工作只是基本,識做人、識睇位,先好諗升職。如果大家有職場疑問/心得想分享,歡迎到我facebook留言。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。